ប្រធានាធិបតីរុស្ស៊ី នៅវ្ល៉ាឌីមៀ ពូទីន នៅថ្ងៃទី៧ ខែតុលា បានឈានចូលវ័យ ៧០ឆ្នាំ។ ការឈានវ័យ ៧០ឆ្នាំរបស់មេដឹកនាំរុស្ស៊ីរូបនេះ ធ្វើឡើងស្របពេលរុស្ស៊ី កំពុងរងសម្ពាធ និងទណ្ឌកម្មពីប្រទេសលោកខាងលិច និងអាស៊ីមួយចំនួន។ 

 

ដើម្បីអបអរខួបកំណើតលោកពូទីន សម្តេចសង្ឃនិកាយOrthodox Kirill បានសរសើរលោកពូទីនថា បានជួយកែប្រែមុខមាត់រុស្ស៊ី ពង្រឹងអធិបតេយ្យ និងសមត្ថភាពការពារជាតិ រួមទាំងការពារប្រយោជន៍ជាតិ។ 

 

«ព្រះជាម្ចាស់បានតែងតាំងអ្នក (លោកពូទីន)ឱ្យកាន់អំណាច។ ដូច្នេះ អ្នកអាចមានការទទួលខុសត្រូវដ៏សំខាន់លើវាសនារបស់ប្រទេស»។ សម្តេចសង្ឃនិកាយOrthodox របស់រុស្ស៊ី បានបញ្ជាក់បែបនេះ។ ប្រមុខនិកាយOrthodox ដដែលនេះ ក៏បានជូនពរឱ្យលោកពូទីនមានសុខភាពល្អ និងអាយុវែងផងដែរ ស្របពេលលោកពូទីន បានកាន់តំណែងជានាយករដ្ឋមន្រ្តី និងប្រធានាធិបតីច្រើនជាង ២០ឆ្នាំ។ បើតាមសម្តេចសង្ឃ លោកពូទីនជាមេដឹកនាំមួយរូប ដែលបានប្តេជ្ញា និងស្រលាញ់រុស្ស៊ី។ 

 

តាមការចុះផ្សាយរបស់សារព័ត៌មាន Moscow Times ក្នុងខួបកំណើតចូលវ័យ ៧០ឆ្នាំនេះ លោកពូទីន មិនបានអបអរ ឬធ្វើដំណើរទៅបរទេសអ្វីឡើយ ដោយលោកបន្តធ្វើការ និងចូលរួមកម្មវិធីមួយនៅក្រុង St. Petersburg។ នៅឆ្នាំកន្លងមក លោនពូទីន បានឡើងភ្នំនៅតំបន់ Siberia ជាមួយរដ្ឋមន្រ្តីការពារជាតិរុស្ស៊ី លោក Sergei Shoigu ឬលេងកីឡា hockey៕