«សម្រាប់ហេតុផលសុវត្ថិភាព ក្រុមការងាររបស់យើងបានផ្អាកប្រតិបត្តិការនៅថ្ងៃនេះ»។ អ្នកនាំពាក្យ ICRC បានលើកឡើងបែបនេះក្នុងសារអ៊ីម៉ែលមួយផ្ញើទៅកាន់ទីភ្នាក់ងារព័ត៌មាន Reuters ជុំវិញការ​ផ្អាកប្រតិបត្តិការនៅអ៊ុយក្រែនក្រោយរងការវាយប្រហារពីរុស្ស៊ី។ 

 

ICRC មានបុគ្គលិកប្រហែល ៧០០​នាក់ដែលកំពុងធ្វើការនៅទីតាំងចំនួន១០នៅទូទាំងអ៊ុយក្រែន ហើយបានផ្តល់ជំនួយ និងថ្នាំពេទ្យ​ដល់​មនុស្សរាប់លាននាក់រួមទាំងអ្នកផ្លាស់ទីលំនៅដោយសារជម្លោះផង។

 

ជាមួយគ្នានេះ ក្រុមប្រឹក្សាជនភៀសខ្លួនន័រវេស (NRC) ក៏ប្រកាសបញ្ឈប់ប្រតិបត្តិការផ្ដល់​ជំនួយ​នៅ​អ៊ុយក្រែនរហូតដល់មានសុវត្ថិភាពក្នុងការដំណើរការឡើងវិញ។ អគ្គលេខាធិការ NRC សង្កត់ធ្ងន់ថា ពួកគេមិនអាចផ្តល់ជំនួយដល់សហគមន៍ដែលងាយរងគ្រោះបានទេ ព្រោះក្រុមការងារ​ផ្ដល់​ជំនួយ​របស់​គេត្រូវលាក់ខ្លួនគេចពីគ្រាប់បែក និងរងភាពភ័យខ្លាចដោយសារមានការ​វាយ​ប្រហារ​ម្តង​ហើយ​ម្តង​ទៀត​៕