ស្ថានភាពនៅឧបទ្វីបកូរ៉េប៉ុន្មានសប្តាហ៍ចុងក្រោយនេះកាន់តែតានតឹងដោយសារកូរ៉េខាងជើងបាញ់មីស៊ីលដល់ទៅ៧លើកក្នុងសមយុទ្ធជាង២សប្តាហ៍ ក្នុងនោះក៏មានមីស៊ីលចម្ងាយមធ្យមហោះរំលងជប៉ុនផងដែរ។ កូរ៉េខាងត្បូង អាម៉េរិក ក៏ដូចជាជប៉ុនឯណេះ ក៏ព្យាយាមជំរុញកូរ៉េខាងជើងរំសាយអាវុធនុយក្លេអ៊ែរ តែក៏សម្ងែងអំណាចយោធាតាមរយៈសមយុទ្ធរួមជាសម្ពាធកុំឱ្យក្រុងព្យុងយ៉ាងធ្វើតេស្តនុយក្លេអ៊ែរជាថ្មី។ ប៉ុន្តែ ក្រុងព្យុងយ៉ាងកាន់តែផ្គើន ហើយបិទរាល់ផ្លូវចរចារំសាយនុយក្លេអ៊ែរថែមទៀត។ 

 

« កូរ៉េខាងជើងកំពុងបន្តអភិវឌ្ឍ និងពង្រឹងអាវុធនុយក្លេអ៊ែររបស់ខ្លួន ហើយគំរាមដល់មិនត្រឹមតែកូរ៉េខាងត្បូងទេ ថែមទាំងពិភពលោកទៀត ប៉ុន្តែខ្ញុំជឿថា កូរ៉េខាងជើងមិនទទួលបានអ្វីពីអាវុធនុយក្លេអ៊ែរនោះទ»។ ប្រធានាធិបតីកូរ៉េខាងត្បូងកូរ៉េខាងត្បូង យូន សុកយ៉ល ប្រាប់អ្នកកាសែតបែបនេះនៅថ្ងៃទី១១ ខែតុលា។ 

 

បើតាមប្រធានាធិបតីកូរ៉ខាងត្បូង ដោយសារការគំរាមនុយក្លេអ៊ែរកាន់តែធ្ងន់ធ្ងរពីមួយថ្ងៃទៅមួយថ្ងៃ កូរ៉េខាងត្បូងនឹងត្រៀមខ្លួន ហើយឆ្លើយតបដោយផ្អែកលើសម្ព័ន្ធភាពដ៏មាំទាំជាមួយអាម៉េរិក ក៏ដូចជាកិច្ចសហប្រតិបត្តិការត្រីភាគីជាមួយអាម៉េរិក និងជប៉ុន។ 

 

ប្រព័ន្ធផ្សព្វផ្សាយកូរ៉េខាងជើង KCNA ចេញផ្សាយនៅថ្ងៃទី១០ ខែតុលាថា លោក គីម ជុងអ៊ុន មេដឹកនាំកូរ៉េខាងជើងបានដឹកនាំយោធាធ្វើសមយុទ្ធពីថ្ងៃទី២៥ ខែកញ្ញាដល់ថ្ងៃទី៩ ខែតុលារួមមានការបាញ់មីស៊ីលបំពាក់គ្រាប់នុយក្លេអ៊ែរយុទ្ធសាស្រ្ត និងបាញ់មីស៊ីលបាលីស្ទីកដែលអាចបំពាក់ក្បាលនុយក្លេអ៊ែរពីក្រោមអាងស្តុកទឹកជាដើម។ លំហាត់យោធាជាង២សប្តាហ៍នេះត្រូវបានលោកខាងលិច ក៏ដូចជាកូរ៉េខាងត្បូងរិះគន់ជាខ្លាំង ព្រមទាំងព្រមានឆ្លើយតបផងដែរ៕