សេវាសន្តិសុខអ៊ុយក្រែន ឬ SBU នៅថ្ងៃទី១០ ខែតុលាបានបញ្ចេញឈ្មោះមន្រ្តីសន្តិសុខជាន់ខ្ពស់រុស្ស៊ីជាច្រើនរូបដែលស្ថិតក្នុងបញ្ជីតាមចាប់ខ្លួន។ បើតាម SBU បុគ្គលទាំងនោះភាគច្រើនជាសមាជិកក្រុមប្រឹក្សាសន្តិសុខរុស្ស៊ីដែលរងបទចោទក្រោមមាត្រា១១០នៃក្រមព្រហ្មទណ្ឌអ៊ុយក្រែន ទាក់ទងនឹងការបំពានបូរណភាពទឹកដី និងព្រំដែនអ៊ុយក្រែន។

 

បើតាមទីភ្នាក់ងារព័ត៌មានរុស្ស៊ី Tass ស្រង់សេចក្តីថ្លែងការណ៍របស់ SBU ចេញផ្សាយលើបណ្តាញ Telegram ប្រធានសេវាសន្តិសុខសហព័ន្ធរុស្ស៊ី Alexander Bortnikov, ប្រធានសភាជាន់ទាបរុស្ស៊ី Vyacheslav Volodin, ប្រធានក្រុមប្រឹក្សាសហព័ន្ធរុស្ស៊ី Valentina Matviyenko, ប្រធានចារកិច្ចបរទេស Sergey Naryshkin, រដ្ឋមន្រ្តីការពារជាតិ Sergey Shoigu, តំណាងប្រធានាធិបតីប្រចាំស្រុកសហព័ន្ធកណ្តាល Igor Schegolev, លេខាធិការក្រុមប្រឹក្សាសន្តិសុខ Nikolay Patrushev, អ្នកនាំពាក្យក្រសួងការបរទេសរុស្ស៊ី Maria Zakharova, អ្នកនាំពាក្យក្រសួងការពារជាតិរុស្ស៊ី Igor Konashenkov និងមន្រ្តីជាន់រុស្ស៊ីដទៃទៀត សុទ្ធតែមានឈ្មោះក្នុងបញ្ជី។ 

 

បញ្ជីបុគ្គលខាងលើនេះដែលសេវាសន្តិសុខអ៊ុយក្រែនចាប់ផ្តើមដាក់បញ្ចូលតាំងពីរុស្ស៊ីចាប់ផ្តើមឈ្លានពានអ៊ុយក្រែនមកម្ល៉េះក៏រួមមានវត្តមានអតីតប្រធានាធិបតីរុស្ស៊ី Dmitry Medvedev ដែលបច្ចុប្បន្នជាអនុប្រធានក្រុមប្រឹក្សាសន្តិសុខរុស្ស៊ីផងដែរ។

 

យ៉ាងណាមិញ គេមិនទាន់ពីមូលហេតុដែលអង្គភាពសន្តិសុខអ៊ុយក្រែបញ្ចេញឈ្មោះទាំងអស់ពេលនេះឡើយ ស្របពេលដែលការវាយប្រយុទ្ធរវាងអ៊ុយក្រែន និងរុស្ស៊ីនៅតែមាននៅភាគខាងត្បូង និងខាងកើត។ ការវាយប្រហារទីក្រុងកៀវពីសំណាក់រុស្ស៊ី រឹតតែធ្វើឱ្យស្ថានភាពកាន់តែតានតឹង៕