កម្ពុជា បានសម្រេចកែសម្រួលនូវវិធានការសុខាភិបាលចំពោះអ្នកដំណើរមកពីបរទេស ដោយដកចេញវិធានការបង្ហាញសុខភាពរបស់អ្នកធ្វើដំណើរពីក្រៅប្រទេស និងកាតវ៉ាក់សាំងពេលមកកម្ពុជា។ ដោយឡែកក្រសួង នៅតែបន្តរក្សាទុកម៉ាស៊ីនវាស់កម្តៅពីចម្ងាយនៅតាមច្រកទ្វារចេញ-ចូលប្រទេស​ និងមន្ត្រីមួយចំនួនដើម្បីពិនិត្យសុខភាពអ្នកដំណើរ។ យ៉ាងណាមិញ វិស័យទេសចរណ៍​នៅកម្ពុជាកំពុងងើបឈរឡើងជាបណ្តើរៗហើយ ខណៈសមាគមទេសចរណ៍បន្តពង្រឹងផ្នែកបដិសណ្ឋារកិច្ចដូចគ្នា។

 

អ្នកស្រី ឆាយ ស៊ីវលីន ប្រធានសមាគមទេសចរណ៍កម្ពុជា រៀបរាប់ថា វិធានការនេះគឺជាការសម្រួលដ៏ល្អ នឹងជំរុញកៀរគរឱ្យទេសចរអន្តរជាតិមកកម្ពុជាកាន់តែច្រើន។ អ្នក​ស្រី រំពឹងថាភ្ញៀវនឹងជ្រើសរើសកម្ពុជា ជាគោលដៅទេសចរណ៍អំឡុងខែវិច្ឆិកា ខែធ្នូខាងមុខនេះ។ ដោយឡែក ការហូរចូលនៃភ្ញៀវទេសអន្តរជាតិមកកាន់កម្ពុជា ឬទៅកាន់ប្រទេសថៃ និងប្រទេសវៀតណាមក៏មានច្រើនដូចគ្នា។ ទេសចរ នឹងជ្រើសរើសពី ២ទៅ៣ប្រទេសសម្រាប់ការដើរកម្សាន្តក្នុងរយៈពេលវែង។

ប្រធានសមាគមទេសចរណ៍កម្ពុជា រូបនេះបន្តថា ភ្ញៀវអាចធ្វើដំណើរតាមផ្លូវគោក ផ្លូវទឹក និងផ្លូវអាកាស​ដោយឆ្លងកាត់ពីប្រទេសជិតខាងមកកម្ពុជា ​និងពីកម្ពុជាទៅប្រទេសជិតខាងវិញ។ យ៉ាងណាមិញ កម្ពុជានៅតែក្រសោបទេសចរបានតាមរយៈការពង្រឹងផ្នែកបដិសណ្ឋារកិច្ចឱ្យបានល្អ ដើម្បីប្រកួតប្រជែងជាមួយប្រទេសជិតខាង។

 

«បើទោះវិស័យនេះកំពុងដើរទៅមុន តែកម្ពុជានៅតែមានបញ្ហាប្រឈមទៅលើការតភ្ជាប់ជើងហោះហើរត្រង់ពី កម្ពុជាទៅប្រទេសធំៗដទៃ ដោយយើងខ្វះខាតការដឹកជញ្ជូនផ្នែកផ្លូវអាកាស។ អ៊ីចឹង! យើងមិនសូវជាមានជម្រើសទៅឱ្យភ្ញៀវទេសចរ ដែលកើតជាឧបសគ្គដើម្បីមកកម្ពុជា»។ នេះជា​ការ​លើក​ឡើង​របស់​អ្នកស្រី ស៊ីវលីន ដោយ​បន្ថែមថា លើសពីការខ្វះជើងហោះហើរ កម្ពុជាក៏ខ្វះនូវធនធានមនុស្ស និងការចូលរួមសម្រាប់បម្រើក្នុងវិស័យទេសចរណ៍ ដោយសារការជាប់គាំងជាង ២ឆ្នាំមកនេះ។ ប៉ុន្តែអ្នកស្រី គិតថា ទេសចរជាតិនឹងចូលរួមគាំទ្រផលិតផលជាតិឱ្យបានច្រើនតាមរយៈការចាយវាយក្នុងស្រុក ច្រើនជាងការចំណាយលើប្រទេសជិតខាង។


 លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក រុបភាពពី៖ PATA Cambodia Chapter
 

ទន្ទឹងនឹងនោះ លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក(PATA) បានអះអាងថា បច្ចុប្បន្នចំនួនទេសចរអន្តរជាតិ ដែលមកកម្សាន្តនៅកម្ពុជាគឺមានកម្រិតនៅឡើយ។ ចំណែក កម្ពុជា ថៃ និងវៀតណាម ក៏មានលក្ខណៈប្រហាក់ប្រហែលគ្នា គ្រាន់តែប្រវិត្តផ្សេងគ្នា។ លោក ធួន ស៊ីណាន មិនអាចប្រៀបធៀបគ្នា ឬប្រកួតទីផ្សារទេសចរណ៍បាននោះឡើយ ពីព្រោះកម្ពុជាមានកត្តាជាច្រើនដែលមិនទាន់បានស្រោចស្រង់ឱ្យបានប្រសើរ។
 

លោក បញ្ជាក់ដូច្នេះ៖ «ការដឹកជញ្ជូនតាមផ្លូវអាកាសរបស់យើង គឺមិនអាចប្រៀបធៀបជាមួយប្រទេសវៀតណាម ឬថៃបាននោះឡើយ។ ជាពិសេសតម្លៃសំបុត្រក៏មានតម្លៃថ្លៃ ដែលធ្វើឱ្យភ្ញៀវទេសចរពិបាកចូលមកកាន់កម្ពុជា និងធ្វើដំណើរច្រើនដំណាក់កាល រីឯកញ្ចប់សេវាកម្មក៏មានតម្លៃខ្ពស់ជាងគេដែរ»។

ប្រធានសមាគមទេសចរណ៍រូបនេះ បន្ថែមថា តាមការពិតចរន្តភ្ញៀវទេសចរច្រើនគឺ បានមកពីសមាជិកអាស៊ាន មិនមានទេសចរណាឆ្ងាយនោះទេ។ ចំណែកភ្ញៀវមកពីក្រៅតំបន់អាស៊ាន មានចំនួនតិចតួចនៅឡើយ។ ប្រសិនបើយើង ចង់បានភ្ញៀវច្រើនជាងគេ ទាល់តែយើងមានចំណុចខ្លាំងជាងគេ ដើម្បីទាក់ទាញភ្ញៀវដូចប្រទេសដទៃ។

 

ជាមួយគ្នានេះ លោក តុប សុភ័ក្រ អ្នកនាំពាក្យក្រសួងទេសចរណ៍ លើកឡើងថា ចាប់តាំងពីរដ្ឋាភិបាល បានបើកប្រទេសឡើងវិញក្នុងឆ្នាំ២០២១ សង្កេតឃើញថាភ្ញៀវទេសចរមកកម្ពុជាចាប់ផ្តើមមានការកើនឡើង ចំណែកការតភ្ជាប់ជើងហោះហើរក៏ មានជាបន្តបន្ទាប់ឡើងវិញ។ នេះអាចនិយាយបានថា កម្ពុជាក៏ជាគោលដៅទេសចរសុវត្ថិភាព មានទំនុកចិត្ត។

 

អ្នកនាំពាក្យរូបនេះ បន្តថា៖ «នយោបាយទេសចរណ៍ គឺមានការធ្វើដំណើរផ្លាស់ប្តូរគ្នារវាងប្រទេសជិតខាងជារឿងធម្មតា។ កម្ពុជាក៏មានសក្តានុពលយ៉ាងសម្បូរបែបដូចប្រទេសជិតខាងដែរ គ្រាន់តែប្រទេសគេរីកចម្រើនមុន។ ម្យ៉ាងវិញទៀត ប្រទេសគេមានក្រុមហ៊ុនអាកាសចរណ៍ផ្ទាល់ខ្លួនច្រើន ដែលផ្តល់ភាពដល់អ្នកដំណើរ»។
 

លោក តុប សុភ័ក្រ បន្ថែមថា ចំណុចសំខាន់ដែលយើងត្រូវធ្វើនៅពេលនេះ គឺការផ្តល់ស្នាមញញឹម ការផ្តល់បដិសណ្ឋារកិច្ចល្អ ដើម្បីពង្រឹងសេវាកម្មទេសចរណ៍ឱ្យមានភាពប្រសើរជាងនេះ។ ក្នុងនោះយើងក៏ត្រូវតែជំរុញទៅលើការផលិតផលធម្មជាតិ និងកែច្នៃឱ្យបានច្រើន ដើម្បីជាការទាក់ទាញមួយកម្រិតទៀត ក្នុងវិស័យទេសចរណ៍កម្ពុជា។
 

សូមរម្លឹកថា  រយៈពេល ៨ខែដើមឆ្នាំ ២០២២ កម្ពុជាទទួលបានទេសចរអន្តរជាតិ ១ លាននាក់ កើនឡើង ៥៨០% ធៀបរយៈពេលដូចគ្នាឆ្នាំ២០២១ និង ថយចុះ ៨៥% ធៀបរយៈពេលដូចគ្នាឆ្នាំ២០១៨។ ក្នុងនោះទេសចរផ្ទៃក្នុងធ្វើដំណើរកម្សាន្តទូទាំងប្រទេសប្រមាណ ៤,៥ លាននាក់ កើនឡើង ២៤៥% ក្នុងនោះទេសចរជាតិប្រមាណ ៧,៦ លាននាក់ កើនឡើង ២២៦% និងទេសចរបរទេសផ្ទៃក្នុងប្រមាណ ៨៧ ម៉ឺននាក់ កើនឡើង ២៥៣%ធៀបរយៈពេលដូចគ្នាឆ្នាំ២០២១។ យោងតាមការព្យាករណ៍ចុងក្រោយ កម្ពុជាអាចទទួលបានទេសចរអន្តរជាតិប្រមាណ ១,៥ ទៅ ២ លាននាក់ ក្នុងឆ្នាំ២០០២នេះ៕