លោកបន្តថា ក្រុមការងារគ្រប់គ្រងគ្រោះមហន្តរាយនៃវិស័យអប់រំ បានបន្តសហការជាមួយគ្រប់ភាគីពាក់ព័ន្ធ ជាពិសេសគណៈគ្រប់គ្រងគ្រឹះស្ថានសិក្សា  ដើម្បីត្រៀមលក្ខណៈអន្តរាគមន៍ទៅលើកត្តាចាំបាច់ តាមលទ្ធភាពជាក់ស្តែង។

អ្នកនាំពាក្យរូបនេះ បានប្រាប់សារព័ត៌មានថ្មីៗ តាមប្រព័ន្ធតេឡេក្រាមយ៉ាងដូច្នេះ ៖«នៅតាមបណ្តាខេត្តមួយចំនួនតូចដូចជា ខេត្តសៀមរាប រតនគិរី ស្ទឹងត្រែង និងខេត្តផ្សេងទៀត សាលារៀនមួយចំនួនតូចផ្អាកដំណើការជាបណ្តោះអាសន្តដោយសារជំនន់ទឹកភ្លៀង»។
 

ចំពោះវិធានការដោះស្រាយសម្រាប់សាលារៀន រងផលប៉ះពាល់ដោយសារជំនន់ទឹកភ្លៀងនេះ គឺក្រសួងអនុញ្ញាតសិស្សអាចទៅសិក្សានៅសាលារៀនក្បែរខាង ឬនៅទីតាំងផ្សេងៗ ដែលមានសុវត្ថិភាព អមដោយការរៀនតាមអនឡាញផងដែរ។ លោក រស់ សុវាចា លើកឡើងបែបនេះ។
 

ជាមួយគ្នានេះលោក រស់ សុវាចា បានអំពាវនាវដល់សិស្សានុសិស្ស លោកគ្រូ អ្នកគ្រូ បុគ្គលិកអប់រំ មាតាបិតា និងគ្រប់ភាគីពាក់ព័ន្ធទាំងអស់ បង្កើនការប្រុងប្រយ័ត្នឱ្យបានខ្ពស់នារដូវភ្លៀង ជាពិសេសត្រូវបន្តថែទាំសុខភាព និងរក្សាសុវត្ថិភាពទាំងអស់គ្នា។ ម្យ៉ាងទៀតដើម្បីចូលរួមការពារមិនឱ្យកូនលង់ទឹក មាតាបិតាបង្កើនការប្រុងប្រយ័ត្នឱ្យបានខ្ពស់ផងដែរ៕