ក្រោយកាន់តំណែងបាន ៣៧ថ្ងៃ លោក Kwasi Kwarteng រដ្ឋមន្រ្តីហិរញ្ញវត្ថុអង់គ្លេស បានលាចេញពីតំណែងតាមសំណើរបស់នាយករដ្ឋមន្រ្តីអង់គ្លេស​ លោកស្រី Liz Truss។ នេះជាការកាន់តំណែងរដ្ឋមន្រ្តីហិរញ្ញវត្ថុដ៏ខ្លីបំផុត បើគិតចាប់ពីឆ្នាំ១៩៧០ មក។ 

 

«អ្នកបានស្នើខ្ញុំឱ្យលាឈប់ពីរដ្ឋមន្រ្តីហិរញ្ញវត្ថុរបស់អ្នក»។ លោក Kwasi Kwarteng បានបញ្ជាក់បែបនេះ នៅក្នុងសេចក្តីប្រកាសមួយ ដែលលោកបានបង្ហោះលើបណ្តាញសង្គម Twitter នៅប៉ុន្មានម៉ោងក្រោយការចេញផ្សាយរបស់សារព័ត៌មាន BBC ក្នុងថ្ងៃទី១៤ ខែតុលា។ 

 

ជាការឆ្លើយតប ក្នុងសន្និសីទសារព័ត៌មានមួយក្នុងថ្ងៃដដែល នាយករដ្ឋមន្រ្តីអង់គ្លេសបានបង្ហាញការសំទោស និងលើកឡើងថា លោកស្រី និងលោក Kwarteng មានចក្ខុវិស័យដូចគ្នា។ 

 

ស្របគ្នានេះ លោកស្រីនាយករដ្ឋមន្រ្តីក៏បានប្តេជ្ញាបន្តកាន់តំណែងជាប្រមុខរដ្ឋាភិបាលអង់គ្លេសទៀតដែរ ខណៈសមាជិកជាន់ខ្ពស់នៃបក្សអភិរក្សនិយម បានអំពាវនាវឱ្យលោកស្រី Truss ចុះចេញពីតំណែង។ បើតាមប្រមុខរដ្ឋាភិបាលអង់គ្លេស អាទិភាពរបស់លោកស្រី គឺធ្វើឱ្យប្រាកដថារដ្ឋាភិបាលអាចផ្តល់ស្ថិរភាពសេដ្ឋកិច្ច និងការពារផលប្រយោជន៍ជាតិ។ ក្នុងសន្និសីទនៅថ្ងៃទី១៤ ខែតុលា លោកស្រី Truss ក៏បានបង្ហាញរដ្ឋមន្រ្តីហិរញ្ញវត្ថុអង់គ្លេសថ្មីផងដែរ គឺលោក Jeremy Hunt៕