ក្នុងសន្និសីទកាសែតមួយក្រៅកិច្ចប្រជុំកំពូលរបស់មេដឹកនាំនៃរដ្ឋឯករាជ្យដែលបែកខ្ញែកក្រោយការដួលរលំសហភាពសូវៀតក្នុងទឹកដីកាហ្សាក់ស្ថាន មេដឹកនាំរុស្ស៊ីបញ្ជាក់ថា ការប្រមូលទ័ពបន្ថែម​ដែលប្រកាសកន្លងមក បានរួចរាល់ ហើយនឹងបញ្ចប់សព្វគ្រប់ត្រឹមក្នុងពីរសប្តាហ៍។

 

ជាមួយគ្នានេះ លោក ពូទីន ក៏អះអាងថា លោកមិនបានរៀបចំផែនការវាយប្រហារទ្រង់ទ្រាយធំបន្ថែម​ទៀតនោះឡើយសម្រាប់ពេលនេះ ហើយគោលបំណងរបស់វិមានក្រេមឡាំង​មិនមែន​ចង់​បំផ្លាញ​អ៊ុយ​ក្រែនទាំងស្រុងឡើយ។

 

«វាមិនមានការចាំបាច់សម្រាប់ការវាយប្រហារខ្នាតធំនោះឡើយ។ (ពួកយើង) មានការងារផ្សេង​ទៀត​ដែលត្រូវបំពេញ»។ លោក ពូទីន បានសង្កត់ធ្ងន់បែបនេះ។

គួរបញ្ជាក់ថា មកទល់ពេលនេះ សរុបចំនួនកងទ័ព៣៣,០០០នាក់មាននៅក្នុងអង្គភាពយោធារុស្ស៊ី​រួចហើយក្រោយការធ្វើកំណែន ដោយក្នុងនោះ១៦,០០០នាក់ បានចូលរួមនៅក្នុងប្រតិបត្តិការ​យោធា​នៅ​អ៊ុយក្រែន៕