អន្តរជាតិ
នយោបាយអន្តរជាតិ
មេដឹកនាំប៉ាឡេស្ទីនថា មិនជឿអាម៉េរិក តែទុកចិត្តរុស្ស៊ីក្នុងការដោះស្រាយបញ្ហាជាមួយអ៊ីស្រាអែល ប្រធានាធិបតីប៉ាឡេស្ទីន Mahmoud Abbas និងប្រធានាធិបតីរុស្ស៊ី វ៉្លាឌីមៀ ពូទីន។ រូបថត AFP
× ប្រធានាធិបតីប៉ាឡេស្ទីនលោក Mahmoud Abbas ជួបជាមួយប្រធានាធីបតីរុស្ស៊ី វ្ល៉ាឌីមៀ ពូទីន នៅថ្ងៃទី១៣ ខែតុលា ហើយបានបង្ហាញពីការមិនទុកចិត្តលើក្រុងវ៉ាស៊ីនតោនក្នុងការដោះស្រាយជម្លោះជាមួយអ៊ីស្រាអែល ក៏ប៉ុន្តែបានសម្ដែងការកោតសរសើរចំពោះតួនាទីរុស្ស៊ី។
នាជំនួបនៅទឹកដីកាហ្សាក់ស្ថាន មេដឹកនាំប៉ាឡេស្ទីន រំលឹកឡើងវិញពីការគាំទ្ររបស់លោកចំពោះក្រុមសម្របសម្រួលអន្តរជាតិ Quartet ចំពោះវិបត្តិជាមួយអ៊ីស្រាអែលដែលមានរុស្ស៊ី អាម៉េរិក និងអង្គការសហប្រជាជាតិផង។ ក៏ប៉ុន្តែលោកបានលើកឡើងថា ចំពោះអាម៉េរិកមិនគួរត្រូវទទួលបានសេរីភាពក្នុងការធ្វើការងារណាមួយដោយឯកឯងនោះឡើយ។
«ពួកយើងមិនជឿជាក់លើអាម៉េរិកនោះទេ ហើយអ្នកក៏ដឹងជំហររបស់ពួកយើងដែរ»។ លោក Abbasប្រាប់លោក ពូទីន បែបនេះអំឡុងសន្និសីទស្តីពីអន្តរកម្មនិងវិធានការកសាងទំនុកចិត្តនៅអាស៊ី (CICA) នៅទឹកដីកាហ្សាក់ស្ថាន។ លោក Abbas បន្តថា បាឡេស្ទីនមិនជឿហើយ ក៏មិនពឹងផ្អែកលើអាម៉េរិកក្នុងការដោះស្រាយបញ្ហាទោះបីក្នុងកាលៈទេសៈណាមួយក៏ដោយ។
ត្រង់នេះ មេដឹកនាំប៉ាឡេស្ទីនចង់សំដៅលើភាពជិតស្និទ្ធរវាងអាម៉េរិក និងអ៊ីស្រាអែលដែលនឹងធ្វើឱ្យអា ម៉េរិកលម្អៀងទៅរកអ៊ីស្រាអែលក្នុងការដោះស្រាយជម្លោះរាប់សិបឆ្នាំរវាងប្រទេសទាំងពីរ។
ទន្ទឹមនេះ លោក Abbas ក៏បានកោតសរសើពីរុស្ស៊ីដែលបានដោះស្រាយបញ្ហាប្រកបដោយយុត្តិធម៌ និងគោរពច្បាប់អន្តរជាតិ។ សម្រាប់មេដឹកនាំរូបនេះ ការណ៍ដែលរុស្ស៊ីបានមានជំហរស្របជាមួយច្បាប់ អន្តរជាតិបែបនេះគឺគ្រប់គ្រាន់សម្រាប់ប៉ាឡេស្ទីន និងជាអ្វីដែលប្រទេសខ្លួនចង់បាន ហើយប៉ាឡេស្ទីនសប្បាយចិត្ត និងពេញចិត្តចំពោះគោលជំហររបស់រុស្ស៊ី៕
Tag:
ប៉ាឡេស្ទីន
អាម៉េរិក
រុស្ស៊ី
© រក្សាសិទ្ធិដោយ thmeythmey.com