លោក ស៊ី ជិនភីង អគ្គលេខាធិការបក្សកុម្មុយនីស្តចិន និងថ្នាក់ដឹកនាំសំខាន់ៗជាច្រើន ចូលរួមពិធីបើកសមាជលើកទី២០ នៅថ្ងៃទី១៦ ខែតុលា។ ចំពោះសមាជិកអង្គសមាជជាង២ពាន់នាក់ លោក ស៊ី ថ្លែងរបាយការណ៍ប្រមាណ២ម៉ោង ដោយផ្ដោតលើចំណុចជាច្រើនទាំងក្នុងប្រទេស និងកិច្ចការអន្តរជាតិផង។

 

បើតាមទីភ្នាក់ងារព័ត៌មានរដ្ឋចិន Xinhua លោក ស៊ី ដែលជាប្រធានាធិបតីចិនផងនោះ អះអាងថា ចិនឈរយ៉ាងរឹងមាំប្រឆាំងនឹងគ្រប់ទម្រង់នៃអនុត្តរភាព និងនយោបាយប្រើអំណាច គំនិតសល់ពីសង្រ្គាមត្រជាក់ ការជ្រៀតជ្រែកក្នុងកិច្ចការផ្ទៃក្នុងរបស់ប្រទេសដទៃ និងស្តង់ដារពីរជាន់។ 

 

ចិននៅតែប្រកាសន់ជំហររឹងមាំក្នុងការបន្តគោលនយោបាយការបរទេសឯករាជ្យ និងសន្តិភាព។ ចិនតែងតែសម្រេចគោលជំហរ និងគោលនយោបាយរបស់ខ្លួនលើបញ្ហាដោយផ្អែកលើគុណសម្បត្តិផ្ទាល់ខ្លួនដែរ។ នេះជាការបញ្ជាក់របស់លោក ស៊ី ដែលរំពឹងទទួលបានការគាំទ្រសម្រាប់បន្តអំណាច៥ឆ្នាំទៀត រួចបន្តថា ចិនក៏ខិតខំរក្សាបទដ្ឋានដែលគ្រប់គ្រងទំនាក់ទំនងអន្តរជាតិ និងការពារភាពត្រឹមត្រូវ និងយុត្តិធម៌អន្តរជាតិ។

 

តាមពិតទៅ នេះជាមិនមែនជាលើកទី១ឡើយដែលមេដឹកនាំបញ្ជាក់បែបនេះ។ ប៉ុន្តែក្នុងការថ្លែងបើកសមាជ មេដឹកនាំចិនលើកឡើងថា សមាជពេលនេះធ្វើឡើងក្នុងស្ថានភាពដ៏សំខាន់។ 

 

សមាជដែលធ្វើឡើងរាល់៥ឆ្នាំម្ដងនេះ នឹងបញ្ចប់នៅថ្ងៃទី២២ ខែតុលា។ មួយថ្ងៃបន្ទាប់ ក្បាលម៉ាស៊ីនដឹកនាំថ្មី នឹងបង្ហាញមុខ ដោយលោក ស៊ី នឹងនៅតែជាលេខាបក្សដដែល៕