ទីក្រុង CHICAGO រដ្ឋ ILLINOIS — ភាពយន្ត 'Return to Seoul' ឬ «វិលត្រឡប់ទៅទីក្រុងសេអ៊ូល» របស់ផលិតករភាពយន្តខ្មែរបារាំងលោក ជូ ដាវី (Davy Chou) ត្រូវបានជ្រើសយកឲ្យតំណាងប្រទេសកម្ពុជា នៅក្នុងកម្មវិធីពានរង្វាន់ភាពយន្ត Academy Awards ឬ Oscarលើកទី ៩៥ ដែលនឹងប្រារព្ធធ្វើឡើងនៅថ្ងៃទី ១២ ខែមីនា ឆ្នាំ ២០២៣។ នេះបើតាមសេចក្តីប្រកាសរបស់ក្រុមហ៊ុនផលិតកម្មភាពយន្ត Anti Archive នៅលើបណ្តាញសង្គម។
ភាពយន្តនេះត្រូវបានដាក់បញ្ចូលក្នុងប្រភេទភាពយន្តអន្តរជាតិខ្នាតធំ ដែលមានប្រទេសប្រមាណ ៩០ មកពីជុំវិញពិភពលោកផ្សេងទៀត ចូលរួមប្រកួតយកពានរង្វាន់
Oscar សម្រាប់ភាពយន្តអន្តរជាតិខ្នាតធំ ឆ្នាំ ២០២៣។ នៅខែធ្នូខាងមុខនេះ គណៈកម្មការវិនិច្ឆ័យនឹងបោះឆ្នោតជ្រើសយកភាពយន្តតែមួយចំនួនប៉ុណ្ណោះ ហើយក្រោយមក ភាពយន្តចំនួន ៥ នឹងត្រូវបានជ្រើសយកក្នុងជុំផ្តាច់ព្រ័ត្រ ហើយភាពយន្តតែមួយគត់ នឹងត្រូវប្រកាសជ័យលាភីពានរង្វាន់អូស្ការសម្រាប់ភាពយន្តអន្តរជាតិខ្នាតធំ នៅខែមីនា នាឆ្នាំក្រោយនេះ។
ភាពយន្ត 'Return to Seoul' ឬ «វិលត្រឡប់ទៅទីក្រុងសេអ៊ូល» នេះ ទើបតែបានឈ្នះពានរង្វាន់ Audience Award នៅមហោស្រព
Hamptons International Film Festival នៅទីក្រុងញូវយ៉ក សហរដ្ឋអាមេរិក កាលពីថ្ងៃទី ១៦ ខែតុលាកន្លងទៅនេះ ហើយក៏បាន
ឈ្នះពានរង្វាន់ Top Jury Prize នៅមហោស្រពភាពយន្តអន្តរជាតិ Athens International Film Festival នៅប្រទេសក្រិក កាលពីខែមេសាផងដែរ។ កាលពីខែឧសភាកន្លងទៅភាពយន្តរបស់លោក ជូ ដាវី នេះ ក៏ត្រូវបានអញ្ជើញឲ្យចូលរួមចាក់បញ្ចាំងជាអន្តរជាតិនៅមហោស្រពភាពយន្ត
Cannes Film Festival លំដាប់ពិភពលោកដ៏ល្បីល្បាញ។
VIDEO
ទាំងនេះគឺជាសមិទ្ធិផលដ៏គួរឲ្យស្ងប់ស្ងែងសម្រាប់លោក ជូន ដាវី ដែលជាផលិតករភាពយន្តវ័យក្មេងដ៏ឆ្នើម ដែលបានតំណាងឲ្យកម្ពុជា និងដែលកំពុងតែធ្វើកិច្ចការជាច្រើន ដើម្បីជំរុញឲ្យមានការផ្លាស់ប្តូរវិជ្ជមានក្នុងវិស័យភាពយន្តរបស់ប្រទេសកម្ពុជាផងដែរ។
លោក ជូ ដាវី បានចំណាយពេលជាងបីឆ្នាំនិពន្ធសាច់រឿងនេះឡើង ដែលផ្តោតលើដំណើរឈ្វេងយល់ពីអត្តសញ្ញាណនិងដើមកំណើតរបស់ស្ត្រីជនជាតិបារាំងដើមកំណើតកូរ៉េខាងត្បូងម្នាក់។ នេះជារឿងរ៉ាវដែលរូបលោកខ្លួនឯងផ្ទាល់បានឆ្លងកាត់ ក្នុងជីវិតជាកូនរបស់ឪពុកម្តាយដែលជាជនភៀសខ្លួនខ្មែរនៅក្នុងប្រទេសបារាំង។
នៅក្នុងបទសម្ភាសន៍ជាមួយបណ្តាញផ្សព្វផ្សាយ The Upcoming លោក ជូ ដាវី បានឲ្យដឹងថា លោកបានផុសគំនិតផ្តួចផ្តើមនិពន្ធនិងផលិតភាពយន្តនេះ ដោយសារបទពិសោធន៍ជីវិតផ្ទាល់ខ្លួនរបស់មិត្តភក្តិរបស់លោកម្នាក់ ដែលបានកើតនៅប្រទេសកូរ៉េខាងត្បូង ហើយត្រូវបានជ្រើសយកធ្វើជាកូនចិញ្ចឹមរបស់គ្រួសារមួយនៅប្រទេសបារាំង។
លោកបានរៀបរាប់ថា មិត្តភក្តិរបស់លោកមានភាពស្ទាក់ស្ទើរក្នុងការជួបជាមួយឪពុកម្តាយបង្កើតរបស់ខ្លួន នៅពេលធ្វើដំណើរទៅកាន់ប្រទេសកូរ៉េខាងត្បូងដែលជាប្រទេសកំណើតរបស់ខ្លួន ក៏ប៉ុន្តែបានសម្រេចជួបឪពុកនិងជីដូនបង្កើត។ លោក ជូ ដាវី បានបញ្ជាក់ទៀតថា លោកបានធ្វើដំណើរជាមួយមិត្តភក្តិរបស់លោកទៅជួបឪពុកនិងជីដូនបង្កើតនោះ ហើយបានកត់សម្គាល់ឃើញបទពិសោធន៍ដ៏ស្មុគស្មាញនិងពិសេសមួយ គ្រាដែលមិត្តភក្តិរបស់លោកបានព្យាយាមឈ្វេងយល់ពីគ្រួសារបង្កើតរបស់ខ្លួននៅប្រទេសកូរ៉េខាងត្បូង។ ហើយបទពិសោធន៍ដ៏ស្មុគស្មាញ ដែលលាយលំដោយមនោសញ្ចេតនាជាច្រើន បានជំរុញឲ្យលោកនិពន្ធភាពយន្ត 'Return to Seoul' ឬ «វិលត្រឡប់ទៅទីក្រុងសេអ៊ូល» នេះឡើង។
នៅខែវិច្ឆិកាខាងមុខនេះ ភាពយន្ត 'Return to Seoul' ឬ «វិលត្រឡប់ទៅទីក្រុងសេអ៊ូល» នឹងចាក់បញ្ចាំងនៅប្រទេសកម្ពុជា ឲ្យប្រជាជនខ្មែរបានទស្សនាផងដែរ។
ភាពយន្តនេះត្រូវបានគ្រប់គ្រងផលិតដោយក្រុមហ៊ុន Aurora Films នៅប្រទេសបារាំង ដោយសហការជាមួយក្រុមហ៊ុន Anti Archive នៅប្រទេសកម្ពុជា ក្រុមហ៊ុន Vandertastic Films នៅប្រទេសអាល្លឺម៉ង់ និងក្រុមហ៊ុន Frakas Pictures នៅប្រទេសបែលហ្សិក៕
អត្ថបទដោយ៖ ទែន សុខស្រីនិត