លោក បន្តនិយាយថា ការអនុវត្តទម្លាប់សន្សំប្រាក់ ជាពិសេស សន្សំជាមួយសា្ថប័នហិរញ្ញវត្ថុផ្លូវការ​ គឺទទួលបានអត្ថប្រយោជន៍ជាច្រើន ជាពិសេស គឺចៀសវាងនូវហានិភ័យ។ «សូមចាប់ផ្តើមបណ្តុះនូវទម្លាប់សន្សំប្រាក់នេះដល់កុមារ ឬក្មេងតូចៗ ឱ្យឆាប់តាមដែលអាចធ្វើទៅបាន ដើម្បីឱ្យគាត់មានបំណិនជីវិតដ៏សំខាន់មួយនេះ។ ការគ្រប់គ្រងហិរញ្ញវត្ថុហិរញ្ញវត្ថុដ៏មានប្រសិទ្ធភាពគួរតែចាប់ផ្តើម ដោយការប្រាក់សន្សំទុក មុននឹងចាត់ចែងចំណាយ»។ នេះ ជាការលើកឡើងរបស់ ប្រធានសមាគមមីក្រូហិរញ្ញវត្ថុកម្ពុជា។ 

 

បើតាមលោកបណ្ឌិត អ៊ិន ចាន់នី សមាជិកក្រុមប្រឹក្សាភិបាលសមាគមធនាគារនៅកម្ពុជា ការសន្សំប្រាក់នៅតាមគ្រឹះស្ថានធនាគារ គឺជាការរួមចំណែកដល់ការអភិវឌ្ឍសេដ្ឋកិច្ច សង្គម ដោយគ្រឹះស្ថានធនាគារ នឹងចាត់ចែងប្រាក់សន្សំនេះ ទៅផ្តល់ជាទុនសម្រាប់ពលរដ្ឋកម្ពុជា ដែលមានតម្រូវការចាប់ផ្តើម និងពង្រីកមុខរបរអាជីវកម្ម ដែលនាំឲ្យមានតម្រូវការធនធានមនុស្ស។ លើសពីនេះ ប្រាក់សន្សំរបស់ពលរដ្ឋក្នុងប្រព័ន្ធធនាគារ និងហិរញ្ញវត្ថុ ក៏បានរួមចំណែកផ្តល់ការងារដល់កម្ពុជា កាត់បន្ថយអត្រាអត់ការងារធ្វើ និងបង្កើនប្រាក់ចំណូលរបស់ពួកគេ ដែលជាការចូលរួមចំណែកដល់ការពង្រឹង និងការរីកលូតលាស់នៃសេដ្ឋកិច្ចជាតិប្រកបដោយចីរភាព។  លោក ក៏បានអំពាវនាវដល់សមាជិកគ្រឹះស្ថានធនាគារ នៃសមាគមធនាគារនៅកម្ពុជា ឱ្យចូលរួមបង្កើត និងពង្រីកយន្តការផលិតផល និងសេវាសន្សំប្រាក់ដែលមាននវានុវត្តន៍ ដើម្បីបំពេញតាមតម្រូវការរបស់អតិថិជន និងសម្រួលដល់ការសន្សំប្រាក់របស់ពលរដ្ឋកម្ពុជា​ និងបង្កើនទំនុកចិត្តដល់ប្រជាពលរដ្ឋមកដាក់ប្រាក់សន្សំនៅគ្រឹះស្ថានធនាគារផ្លូវការ ផងដែរ។
 

ប្រព័ន្ធធនាគារកំពុងដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ច និងសង្គមកិច្ច។ លោក រ័ត្ន សុវណ្ណនរៈ បានអះអាងថា ជាក់ស្ដែង គ្រឹះសា្ថនធនាគារ និងហិរញ្ញវត្ដុ បន្តពង្រឹងប្រតិបត្តិការចម្បងរបស់ខ្លួន ក្នុងការផ្តល់សេវាឥណទាន ប្រាក់បញ្ញើ និងសេវាទូទាត់សងប្រាក់ ព្រមទាំងបន្តធ្វើទំនើបកម្មសេវាទាំងនេះ​ តាមរយៈការផ្ដល់សេវាធនាគារបែបឌីជីថល​ ថែមទៀត។ ដូចជា៖ ការស្នើសុំឥណទានតាមអ៊ិនធើណេត និងទូរសព្ទចល័ត សេវាទូទាត់ស​ង​ប្រាក់អន្តរធនាគារ និងការប្រើប្រាស់គណនីអ៊ីវ៉ាឡេត (e-wallet​)​...ជាដើម។ 

 

របាយការណ៍ពីឧបការីទេសាភិបាល និងជាអគ្គនាយកត្រួតពិនិត្យ ​ធនាគារជាតិនៃកម្ពុជា  ​បានបង្ហាញថា គិតត្រឹមខែសីហា ឆ្នាំ២០២២ ​​គ្រឹះស្ថានធនាគារ និ​ង​​ហិរញ្ញវត្ថុ បាន​​​និងបន្តចូលរួមលើកកម្ពស់បរិយាបន្នហិរញ្ញវត្ថុ ជាពិសេស ប្រាក់បញ្ញើបានកើនឡើងដល់ ១៦០,៦ភាគ នៃផលិតផលក្នុងស្រុកសរុប(ផ.ស.ស) ​ ស្មើ ​១៧០​,៦​​ទ្រីលានរៀល (៤១,៥​ ប៊ីលានដុល្លារអាម៉េរិក។ ចំនួន​គណនីប្រា​ក់​​បញ្ញើអតិថិជនក៏កើនឡើងដល់ប្រ​មាណ​​ ១៤,៣ លានគណនី ផងដែរ។  ក្នុងនោះ មាន​១១​,៧​ លានគណនី នៅធនាគារពា​ណិជ្ជ​និ​ង ២,៦ លានគណនីទៀត នៅ​គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ។​ 

 

ជាមួយគ្នានេះ គ្រឹះ​ស្ថា​នធនាគារ និ​ង​ហិ​រញ្ញ​​វ​​ត្ថុ​បានពង្រី​​ក​ប្រព័ន្ធប្រតិបត្តិការ ដោយមានសាខាដល់ ២,៥៩៣ សាខា និងម៉ា​ស៊ី​ន​ដកនិងដាក់ប្រាក់ស្វ័យប្រវត្តិ (ATM) ចំនួន ៤,២១៩ ម៉ា​ស៊ី​ន នៅគ្រប់រាជធានី-ខេត្តទូទាំងប្រទេស ព្រមទាំងធ្វើពិ​ពិធ​កម្មផលិតផល និងសេវាហិរញ្ញវត្ថុច្រើនបែ​ប​ស្របតាមតម្រូវការនិងនិន្នាការបច្ចុប្បន្ន ថែមទៀត​៕