សម្រាប់គូទី១ កីឡាករជម្រើសជាតិកម្ពុជា កូនកាត់ខ្មែរ-អ៊ូសបេគីស្ថាន រ៉ាចាពៅ អាប់ឌុលឡា ត្រូវជួបប្រកួតជាមួយកីឡាករកូរ៉េខាងត្បូង Haneul Jung ក្នុងប្រភេទទម្ងន់ ៩២គីឡូក្រាម ដោយការប្រកួតចាប់ផ្តើមនៅម៉ោង៤ល្ងាច។ 

ចំណែកកីឡាករកូនកាត់ខ្មែរ-អ៊ូសបេគីស្ថានមួយរូបទៀត ណាស្រេឌីនូវ អាន់វ៉ា ត្រូវជួបតទល់ ជាមួយម្ចាស់មេដាយប្រាក់២សម័យកាលថៃ Weerapon Jongjoho លើប្រភេទទម្ងន់ ៨០គីឡូក្រាម នៅម៉ោង១០យប់។

 

លោក ប៊ុយ សោភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជា ថាការចូលរួមប្រកួតក្នុងទឹកដីហ្ស៊កដានីជាការវាស់ស្ទង់កម្រិតសមត្ថភាពកីឡាករត្រៀមស៊ីហ្គេម២០២៣ នៅកម្ពុជា។ លោក សោភ័ណ្ឌ រំលេចថា ការរៀបចំគឺមានកម្រិតលំដាប់តំបន់អាស៊ី ហើយកីឡាករលំដាប់អាស៊ានប៉ុណ្ណោះដែលមានឈ្មោះចូលរួមប្រកួត។ ថ្លែងប្រាប់សារព័ត៌មានថ្មីៗ នៅថ្ងៃទី៣ ខែវិច្ឆកា លោក អគ្គលេខាធិការមានជំនឿចិត្តយ៉ាងមុតមាំចំពោះកម្រិតសមត្ថភាពកីឡាករជម្រើសជាតិកម្ពុជា អាចប្រជែងមេដាយនៅស៊ីហ្គេម២០២៣។

 

លោក ប៊ុយ សោភ័ណ្ឌ បញ្ជាក់ថា៖«សម្រាប់ការប្រកួតនេះមានកម្រិតខ្ពស់ជាងកម្រិតស៊ីហ្គេម ដែលសម្រាប់តំបន់អាស៊ានមានតែប្រទេសខ្លាំងៗប៉ុណ្ណោះដែលបញ្ជូនកីឡាករ-ការិនីមកចូលរួមប្រកួត។ វាជាការវាស់ស្ទង់ដ៏សំខាន់សម្រាប់កីឡាករកម្ពុជា ដែលពួកគាត់យើងត្រូវមកប្រកួតជាមួយកីឡាករលំដាប់អាស៊ី និងពិភពលោក ទើបពួកគាត់អាចពង្រឹងសមត្ថភាពឈានទៅដណ្តើមមេដាយកម្រិតស៊ីហ្គេម បាន»៕