ដោយ៖ ឈិន សុភារើន (យុវជនសង្កាត់សំរោង)
ឧត្តរមានជ័យ៖ លោក អៃ សុគន្ធ នាយកវិទ្យាល័យ ហ៊ុន សែន ឧត្តរមានជ័យ ដែលមានទីតាំងស្ថិតក្នុងសង្កាត់សំរោង ក្រុងសំរោង ខេត្តឧត្តរមានជ័យ បានជំរុញ និងណែនាំ ឱ្យសិស្សានុសុស ប្រើប្រាស់ទូរសព្ទដៃ ដើម្បីជាប្រយោជន៍ដល់ការសិក្សា និងបង្កើនចំណេះដឹង ជាជាងការលេងហ្គេម។ ការជំរុញបែបនេះ គឺស្របពេលដែលទូរសព្ទដៃទំនើប កំពុងត្រូវបានប្រើប្រាស់យ៉ាងទូលាយ នៅក្នុងចំណោមសិស្សានុសិស្សនៅទីនេះ។
សម្រាប់លោក អៃ សុគន្ធ នៅក្នុងបច្ចុប្បន្ននេះ គេមិនអាចហាមឃាត់ សិស្សមិនឱ្យប្រើទូរសព្ទនោះទេ។ ប៉ុន្តែអ្វីដែលជាកង្វល់របស់គណៈគ្រប់គ្រងសាលា គឺបារម្ភថា សិស្សអាចឆ្លៀត ឬលួចប្រើទូរសព្ទខុសគោលដៅ ពោលគឺចំណាយពេលលេងហ្គេម ឬកម្សាន្តជ្រុលហួសហេតុ។ ដើម្បីទប់ស្កាត់បញ្ហាទាំងនេះ វិទ្យាល័យ ហ៊ុន សែន ឧត្តរមានជ័យ បានដាក់ចេញនូវការណែនាំ និងវិន័យរដ្ឋបាលមួយចំនួន ដើម្បីជាការព្រមានដល់សិស្សានុសិស្សដែល ល្មើល។
លោក អៃ សុគន្ធ ពន្យល់បន្ថែមដូច្នេះ៖ «យើងមិនអាចផ្តាច់ពីប្រព័ន្ធអេឡិចត្រូនិកហ្នឹងទេ ដោយសារសម័យនេះ គឺជាសម័យសិក្សាតាមប្រព័ន្ធអនឡាញ។ ដូច្នេះដើម្បីឱ្យការប្រើប្រាស់គាត់មានប្រសិទ្ធភាព គឺយើងមានបទបញ្ជាផ្ទៃក្នុងហ្នឹង បើសិនជាឃើញលេង ជាពិសេសគឺការមើលរឿងអាសអាភាស និងលេងហ្គេមហ្នឹង គឺយើងដកទូរសព្ទទុកជាការព្រមាន ពី១សប្តាហ៍ ទៅ១ខែតែម្តង បានប្រគល់ឱ្យវិញ។ គាត់ធ្លាប់ទទួលបានការពិន័យនេះ ធ្វើឱ្យគាត់រាងចាល មិនហ៊ានលេងទេ»។
លោកគ្រូ អៃ សុគន្ធ នាយកវិទ្យាល័យ ហ៊ុន សែន ឧត្តរមានជ័យ។
យ៉ាងណាក៏ដោយ នាយកសាលាដដែល ទទួលស្គាល់ថា ការហាមឃាត់សិស្សានុសិស្សមិនឱ្យប្រើប្រាស់ទូរសព្ទដៃសម្រាប់កម្សាន្ត ឬលេងហ្គេមនៅក្រៅបរិវេណសាលា គឺជារឿងដែលពិបាកធ្វើណាស់ដែរ។ ដូច្នេះអ្វីដែលគណៈគ្រប់គ្រងសាលារូបនេះ ធ្វើបានគឺការបន្តតាមដានពីសកម្មភាព និងលទ្ធផលសិក្សារបស់សិស្ស បន្ថែមលើការអប់រំ ណែនាំ និងជំរុញឱ្យសិស្សគោរពតាមបទបញ្ជាផ្ទៃក្នុងដែលមានចែង។ លោក អៃ សុគន្ធ ក៏បន្តលើកទឹកចិត្តដល់អាណាព្យាបាល ចូលរួមអប់រំ ណែនាំ និងជំរុញកូនៗ ឱ្យខិតខំសិក្សាបន្ថែមផងដែរ។
2សិស្សថ្នាក់ទី១២A នៃវិទ្យាល័យហ៊ុន សែន ឧត្តរមានជ័យ ពិភាក្សាគ្នាធ្វើលំហាត់ អំឡុងម៉ោងចេញលេង។
សម្រាប់ លោក អៃ សុគន្ធ ចង់ឃើញ ហើយក៏សង្ឃឹមថា សិស្សានុសិស្សនៃវិទ្យាល័យ ហ៊ុន សែន ឧត្តរមានជ័យទាំងអស់ នឹងប្រើប្រាស់ទូរសព្ទសម្រាប់ជាប្រយោជន៍ដល់ការសិក្សា និងអភិវឌ្ឍន៍សមត្ថភាពរបស់ខ្លួន។ លើសពីនេះ គឺចៀសវាងការលេងហ្គេម នៅក្នុងម៉ោងសិក្សា និងនៅក្នុងបរិវេណសាលា។ «ការសំណូមពររបស់ខ្ញុំ គឺគ្មានអីក្រៅពីសុំឱ្យប្អូនៗ ធ្វើម៉េចពេលគ្រូបង្រៀន បើសិនគាត់មិនឱ្យឆែកទូរសព្ទ គឺសុំឱ្យប្អូន កុំទាញទូរសព្ទមកឆែកអ្វីដែលគ្រូមិនបានអនុញ្ញាត។ ម៉ោងខ្លះ មុខវិជ្ជាខ្លះគាត់តម្រូវឱ្យសិស្សឆែកទូរសព្ទ។ អ៊ីចឹងអ្វីដែលក្រៅពីគ្រូអនុញ្ញាត គឺប្អូនត្រូវបិទសំឡេងទូរសព្ទ ហើយរក្សាទូរសព្ទនៅក្នុងកាតាប ដើម្បីកុំឱ្យរំខានអារម្មណ៍(ដល់)គ្រូ និងសិស្សរួមថ្នាក់»៕
(អត្ថបទនេះ គឺជាស្នាដៃរបស់ក្រុមយុវជន និងត្រូវបានរៀបរៀងឡើង ក្រោមជំនួយហិរញ្ញវត្ថុរបស់សហភាពអឺរ៉ុប និងទីភ្នាក់ងារសហប្រតិបត្តិការអភិវឌ្ឍអន្តរជាតិស៊ុយអ៊ែត តាមរយៈអង្គការតម្លាភាពកម្ពុជា និងអង្គការអាក់សិនអេតកម្ពុជា។ រាល់ខ្លឹមសារនៅក្នុងអត្ថបទនេះ គឺជាការទទួលខុសត្រូវរបស់ស្មេរ ឬផលិតករ ហើយមិនឆ្លុះបញ្ចាំងអំពីទស្សនៈរបស់សហភាពអឺរ៉ុប និងទីភ្នាក់ងារសហប្រតិបត្តិការ អភិវឌ្ឍអន្តរជាតិស៊ុយអ៊ែតនោះទេ)