​

បើតាមលោក អៃ សុគន្ធ អាហារូបករណ៍នេះ បានផ្តល់ឱកាសឱ្យសិស្សដែលមានជីវភាពលំបាក មានលទ្ធភាពបន្តការសិក្សា​ និងសម្រាលការលំបាករបស់គ្រួសារពួកគេ បានមួយចំណែកដែរ។ «​វាជាធម្មតាទេ តែគាត់ក្រ គាត់គ្មានលទ្ធភាព គាត់នឹងប្រញាប់បោះបង់កាសិក្សាហើយ។ បើសិនជាគាត់មានអាហារូបករណ៍ប៉ុណ្ណឹង គាត់នឹងអាចបន្តការសិក្សារហូត​។ ទោះជាយ៉ាងម៉េច ក៏គាត់អាចបានចប់ (​ថ្នាក់) ទី១២ដែរ។ ដូចដឹងស្រាប់ថា ថវិកាប៉ុណ្ណឹង វាមិនគ្រប់ទេ។ មួយឆ្នាំ ៩០ដុល្លារនោះ។ ក៏ប៉ុន្តែអាចនៅចំពេលដែលគាត់កំពុងលំបាក ទទួលបានថវិកាប៉ុណ្ណឹងវាច្រើនសម្រាប់គាត់។ ដូច្នេះគាត់នឹងអាចនៅសិក្សាបន្តទៀត​»។ នេះជាកា​រ​ពន្យល់របស់ លោក អៃ សុគន្ធ នាយកវិទ្យាល័យ ហ៊ុន សែន ឧត្តរមានជ័យ។

 

ក្រៅពីការឧបត្ថម្ភប្រចាំឆ្នាំពីរដ្ឋ លោក អៃ សុគន្ធ ក៏លើកឡើងដែរថា សិស្សដែលមានស្ថានភាពក្រីក្រលំបាកជាងគេបំផុត នៅក្នុងចំណោមសិស្សអាហារូបករណ៍ ក៏ទទួលបានការ​ឧបត្ថម្ភបន្ថែម​ប្រចាំខែ ពីគណៈគ្រប់គ្រងសាលា និងលោកគ្រូអ្នកគ្រូផងដែរ ដូចជាការផ្តល់សម្ភារសិក្សាជាដើម។ 

 

ក្នុងនាមជាគណៈគ្រប់គ្រងសាលា និងជាគ្រូបង្រៀនផង លោក អៃ សុគន្ធ បានលើកទឹកចិត្ត ដល់សិស្សានុសិស្សដែលទទួលបានអាហារូបករណ៍ តស៊ូសិក្សាឱ្យបានខ្ពស់ ដើម្បីកែប្រែ  ស្ថានភាពរបស់ខ្លួន ទៅថ្ងៃអនាគត៕