ភ្នំពេញ៖ Cambodia Amazing Trip Planner សហការជាមួយក្រសួងបរិស្ថាន បង្កើតផែនទីទស្សនាចរណ៍នៅតំបន់ចំនួន ៣រួមមាន ឧទ្យានជាតិព្រះជ័យវរ្ម័ន-នរោត្តម «ភ្នំគូលែន», តំបន់បេតិកភណ្ឌធម្មជាតិភ្នំត្បែង និងដែនជម្រកសត្វព្រៃគូលែន-ព្រហ្មទេព។ បើតាមលោក សា ឌីណា ស្ថាបនិក Cambodia Amazing Trip Planner ផែនទីនេះ នឹងជួយដល់សេដ្ឋកិច្ចរបស់ពលរដ្ឋ និងផ្ដល់ភាពងាយស្រួលដល់ភ្ញៀវទេសចរ។
ក្រុមការងារ Cambodia Amazing Trip Planner បានចំណាយពេល ១ឆ្នាំ ដើម្បីចងក្រងផែនទីទស្សនាចរណ៍នៅតំបន់ចំនួន៣ ដែលស្ថិតនៅភាគឧត្តរនៃប្រទេសកម្ពុជា ក្រោមសហការរបស់ក្រសួងបរិស្ថាន។ ផែនទីទាំងនោះរួមមាន ផែនទីទស្សនាចរណ៍ឧទ្យានជាតិព្រះជ័យវរ្ម័ន-នរោត្តម «ភ្នំគូលែន» ដែលមានតំបន់កម្សាន្តចំនួន ៨៥ទីតាំង, តំបន់បេតិកភណ្ឌធម្មជាតិភ្នំត្បែង មានតំបន់កម្សន្តចំនួន ៣០ទីតាំង និងដែនជម្រកសត្វព្រៃគូលែន-ព្រហ្មទេព មានតំបន់កម្សាន្តចំនួន ២០ទីតាំង។
ផែនទីដែនជម្រកសត្វព្រៃគូលែន-ព្រហ្មទេព
ផែនទីភ្នំត្បែង
ក្នុងបទសម្ភាសជាមួយសារព័ត៌មាន Thmey Thmey 25 លោក សា ឌីណា ស្ថាបនិក Cambodia Amazing Trip Planner លើកឡើងថា គោលបំណងនៃការរៀបចំផែនទីនេះ ដើម្បីបង្ហាញទីតាំងទេសចរណ៍ជាច្រើនកន្លែងដែលទេសចរមួយចំនួនមិនបានទៅដល់ និងមិនបានដឹង។ ជាមួយគ្នានេះ ផែនទីនេះ នឹងផ្ដល់ភាពងាយស្រួលដល់ទេសចរ ជាពិសេសផ្ដល់ចំណូលដល់ពលរដ្ឋ តាមរយៈការចំណាយរបស់ភ្ញៀវ បានទៅដល់ដៃប្រជាជននៅតាមតំបន់ទាំងនោះ ដែលធ្វើឱ្យជីវភាពរបស់ពួកគាត់ប្រសើរឡើង។
រូបភាពពីCambodia Amazing Trip Planner
សូមអញ្ជើញទស្សនាបទសម្ភាសរវាងអ្នកស្រី ញឹក ស្រីល័ក្ខ និពន្ធនាយិកា Thmey Thmey 25 ជាមួយលោក សា ឌីណា ស្ថាបនិកក្រុម Cambodia Amazing Trip Planner ដូចតទៅ៖
ទន្ទឹមនឹងភាពជោគជ័យនៃការលេចចេញជារូបរាងផែនទីទស្សនាចរណ៍នេះ ក៏មានផលលំបាកសម្រាប់លោក សា ឌីណា និងក្រុមការងារផងដែរ។ «ការពិតទៅ នៅពេលយើងរៀបចំគម្រោងអ្វីក៏ដោយ មិនអាចថារលូន ឬមួយក៏ជោគជ័យ និងផ្ដល់ភាពងាយស្រួលរហូតទេ។ អ៊ីចឹងតែងតែជួបនឹងឧបសគ្គមួយចំនួន ប៉ុន្តែសំខាន់បំផុតការតាំងចិត្ត ដោយធានាឱ្យបានសម្រចគោលដៅជាក់លាក់ដែលយើងបានកំណត់»។ នេះជាការបញ្ជាក់របស់លោក សា ឌីណា ដោយបន្តថា ការលំបាកដំបូងបំផុត គឺបញ្ហាជំងឺកូវីដ-១៩ ដោយសារគម្រោងនេះរៀបចំ ចំពេលជំងឺនេះកើតឡើង។
រូបភាពពីCambodia Amazing Trip Planner
ទោះជួបផលលំបាក តែលោក សា ឌីណា មិនបានចាត់ទុកជាបញ្ហាចម្បងសម្រាប់លោក និងក្រុមការងារឡើយ ពោលលោក ចាត់ទុកជាបទពិសោធ។ ក្នុងដំណើរចងក្រងផែនទីទស្សនាចរណ៍នេះ លោក សា ឌីណា និងក្រុមការងារ បានឆ្លងកាត់ស្ទឹង អូរ និងគេងក្នុងព្រៃ ដោយការបោះតង់ ចងអង្រឹងជាច្រើនយប់ថ្ងៃ ដើម្បីចងក្រងផែនទីទាំងនេះ។
ក្រោយបញ្ចប់គម្រោងនេះ ក្រុម Cambodia Amazing Trip Planner នឹងចងក្រងផែនទីទស្សនាចរណ៍នៅតំបន់ផ្សេងៗទៀត។ លោក សា ឌីណា សង្ឃឹមយ៉ាងមុតមាំថា ផែនទីទស្សនាចរណ៍នេះ នឹងអាចបម្រើដល់សេចក្ដីត្រូវការរបស់មជ្ឈដ្ឋានទូទៅ ជាពិសេសភ្ញៀវទេសចរជាតិ-អន្តរ។
រូបភាពពីCambodia Amazing Trip Planner
ផែនទីទស្សនាចរណ៍ឧទ្យានជាតិព្រះជ័យវរ្ម័ន-នរោត្តម «ភ្នំគូលែន» មានតំបន់កម្សាន្តចំនួន ៨៥ទីតាំង ក្នុងនោះចែកជា ១១ផ្នែក រួមមាន មជ្ឈមណ្ឌលស្រាវជ្រាវ និងអភិរក្សកេសរកូល, ព្រះអង្គធំ, ភូមិបុរាណ, ផ្ទះគ្រូចារ្យ (បន្ទាយ ឬរាជវាំង), ក្រុមប្រាសាទថ្មដាប់, ស្រះដំរី, ពើងគំនូរ, សត្វមករ, ព្រះអង្គជប់, តំបន់ក្បាលស្ពាន និងតំបន់របៀងអភិរក្សចង្រ្កានរយ។ ចំណែកតំបន់បេតិកភណ្ឌធម្មជាតិភ្នំត្បែង មានតំបន់កម្សាន្ត ៣០ទីតាំង ដោយចែកជា ៦ផ្នែក រួមមាន តំបន់វត្តដំបូកខ្មៅដំបៅជ្រុំ, តំបន់ភ្នំស្រួច, តំបន់ល្អាងកួយ, តំបន់ថ្មបីដុំ, តំបន់តាំងយូ និងតំបន់បាក់កាំ។
ដោយឡែក ដែនជម្រកសត្វព្រៃគូលែន-ព្រហ្មទេពវិញ មានតំបន់កម្សាន្តចំនួន ២០ទីតាំង ក្នុងនោះចែកជា ខេត្តសៀមរាប, ខេត្តព្រះវិហារ និងខេត្តឧត្តរមានជ័យ ព្រោះដែនជម្រកនេះស្ថិតក្នុងខេត្តចំនួន ៣៕
រូបភាពពីCambodia Amazing Trip Planner
រូបភាពពីCambodia Amazing Trip Planner
រូបភាពពីCambodia Amazing Trip Planner
រូបភាពពីCambodia Amazing Trip Planner
រូបភាពពីCambodia Amazing Trip Planner