ហេតុការណ៍រត់ជាន់គ្នាអំឡុងពិធីបុណ្យ Halloween នៅសង្កាត់ Itaewon កាលពីយប់ថ្ងៃទី២៩ ខែតុលា បណ្តាលឱ្យមនុស្សយ៉ាងតិច ១៥៦ នាក់បាត់បង់ជីវិត ហើយប្រហែល ១៩៧នាក់របួសផ្សេងទៀត។

 

ថ្លែងនៅកិច្ចប្រជុំត្រួតពិនិត្យច្បាប់សុវត្ថិភាពឡើងវិញថ្ងៃទី៧ ខែវិច្ឆិកា ប្រធានាធិបតីកូរ៉េខាងត្បូង យូន សុកយ៉ល ចេញមុខសុំទោសចំពោះហេតុការណ៍ដ៏សោកសៅនោះ។ 

 

« ខ្ញុំសុំទោសចំពោះគ្រួសារដែលមានសមាជិកបាត់បង់ជីវិតដែលកំពុងរងទុក្ខដោយសារតែសោកនាដកម្មដ៏សោកសៅ ហើយចំពោះអ្នកដែលចូលរួមរំលែកទុក្ខ»។ លោក យូន ថ្លែងបែបនេះក្រោយលើកឡើងថា លោកមិនអាចប្រៀបធៀបខ្លួនឯងជាមួយគ្រួសារដែលបាត់បង់កូនប្រុស និងកូនស្រីរបស់គេទេ ប៉ុន្តែក្នុងនាមជាប្រធានាធិបតីដែលគួរតែការពារអាយុជីវិត និងសុវត្ថិភាពរបស់ប្រជាជន លោកពិតជាឈឺចាប់។ 

 

ក្រៅពីនេះ ប្រធានាធិបតីកូរ៉េខាងត្បូងបេ្តជ្ញាកែទម្រង់ប្រព័ន្ធគ្រប់គ្រងសុវត្ថិភាពជាតិ ហើយស៊ើបអង្កេតឱ្យបានហ្មត់ចត់ និងនាំអ្នកដែលបរាជ័យមើលការខុសត្រូវទាំងនោះមកទទួលខុសត្រូវទាល់តែបាន។

 

សូមបញ្ជាក់ថា ប៉ុន្មានម៉ោងមុនហេតុការណ៍រត់ជាន់គ្នាស្លាប់នោះ ប្រជាជនបានហៅទូរសព្ទសង្រ្គោះបន្ទាន់ជាច្រើនលើក។ ប៉ូលិសកូរ៉េខាងត្បូងប្រឈមនឹងការរិះគន់យ៉ាងខ្លាំង ហើយក៏កំពុងស្ថិតក្រោមការស៊ើបអង្កេតចំពោះការឆ្លើយតបរបស់ខ្លួនអំឡុងសោកនាដកម្មនោះដែរ ខណៈមានតែមន្រ្តីប៉ូលិសត្រឹម១៣៧នាក់ប៉ុណ្ណោះដែលបញ្ជូនទៅពិធីបុណ្យដែលមានមនុស្សចូលរួមប្រហែល១០ម៉ឺននាក់៕