សេចក្ដីថ្លែងការណ៍កូរ៉េខាងជើងនៅថ្ងៃទី៨ ខែវិច្ឆិកា បានច្រានចោលការចោទរបស់អ្នកនាំពាក្យ សន្តិសុខជាតិសេតវិមាន លោក John Kirby កាលពីសប្ដាហ៍មុនដែលបានអះអាងថាអាវុធរបស់ កូរ៉េខាងជើងត្រូវបានបញ្ជូនទៅរុស្ស៊ី តាមរយៈការដឹកជញ្ជូនទៅកាន់តំបន់មជ្ឈឹមបូព៌ា ឬតំបន់ អាហ្វ្រិក។ ការមិនទទួលស្គាល់នេះកើតឡើង ខណៈពេលភាពតានតឹងកំពុងតែកើនឡើងនៅឧបទ្វីបកូរ៉េដោយសារតែកូរ៉េខាងជើងបានតេស្តមីស៊ីលជាច្រើនលើកច្រើនសាររួមទាំងមីស៊ីបាលីស្ទីកអន្តរទ្វីប ខណៈដែលអាម៉េរិកនិងកូរ៉េខាងត្បូងធ្វើសមយុទ្ធយោធាអាកាសរួមគ្នាដ៏ធំមិនធ្លាប់មាន។

 

«ថ្មីៗនេះអាម៉េរិកកំពុងបន្តផ្សព្វផ្សាយពាក្យចចាមអារ៉ាមគ្មានមូលដ្ឋាននៃការផ្គត់ផ្គង់អាវុធរវាងកូរ៉េខាងជើង និងរុស្ស៊ី»។ អនុប្រធានកិច្ចការយោធាបរទេសនៃក្រសួងការពារជាតិកូរ៉េខាងជើង បាននិយាយនៅក្នុងសេចក្តីថ្លែងការណ៍មួយបែបនេះបើយោងតាម KCNA។ សេចក្ដីថ្លែង ការណ៍ដដែលនោះបន្តថា កូរ៉េខាងជើងមើលឃើញពាក្យចចាមអារ៉ាមនេះជាផ្នែកមួយនៃទង្វើ ព្រៃផ្សៃរបស់អាម៉េរិកដែលបានបំណងធ្វើឱ្យខូចមុខមាត់កូរ៉េខាងជើង។

 

ក្រុងព្យុងយ៉ាងសង្កត់ធ្ងន់បន្ថែមថា ពួកគេមិនមានការជួញដូរអាវុធជាមួយរុស្ស៊ីនោះឡើយ ហើយពួកគេក៏នឹងមិនធ្វើបែបនេះនៅពេលអនាគតផងដែរ។

 

គួរបញ្ជាក់ថា លោក Kirby ធ្លាប់បានអះអាងថា មន្ត្រីអាម៉េរិកមិនបានដឹងច្បាស់ថារុស្ស៊ីបានទទួលអាវុធទាំងនោះ ឬអត់ ក៏ប៉ុន្តែរុស្ស៊ីច្បាស់បានព្យាយាមតាមដានការដឹកជញ្ជូននោះ៕