នៅក្នុងសន្និសីទស្តីពីបម្រែបម្រួលអាកាសធាតុលើកទី២៧របស់អង្គការសហប្រជាជាតិ (UN)  COP27 ដោយមានការចូលរួមពីមេដឹកនាំផ្សេងៗរួមទាំងអគ្គលេខាធិការ UN លោកអាន់តូនីញ៉ូ ហ្គូតេរ៉េស នាយករដ្ឋមន្ត្រីប៉ាគីស្ថានលោក Shehbaz Sharif បានអះអាងថា បំណុលរបស់ ប៉ាគីស្ថានកំពុងតែរារាំងការងើបឡើងវិញរបស់ប្រទេសមួយនេះ ក្រោយជួបប្រទះគ្រោះទឹកជំនន់។

 

«ពួកយើងបានប្រមូលគ្រប់ធនធានដែលពួកយើងមានសម្រាប់កិច្ចខិតខំជួយសង្គ្រោះជាតិ។ ប៉ុន្តែវាមិនគ្រប់គ្រាន់»។ លោក Sharif ថ្លែងបែបនេះដោយចង់សំដៅលើតម្រូវការជួសជុល ស្ពានបាក់បែកជាច្រើនឡើងវិញ និងការស្រោចស្រង់ចំពោះវាលកសិកម្ម និងតម្រូវការជាច្រើនទៀត។

 

មេដឹកនាំប៉ាគីស្ថានរូបនេះបានបន្តថា មនុស្សរាប់លាននាក់កំពុងតែប្រឈមមុខនឹងការគ្មានទីជម្រក អំឡុងរដូវរងារខាងមុខ ជាពិសេសស្ត្រី និងកុមារកំពុងតែស្វែងរកការផ្គត់ផ្គង់តម្រូវការចាំបាច់ផងដែរ។ ហេតុដូច្នេះ ការបន្ធូរបន្ថយបំណុល និងការទទួលបានសំណងសម្រាប់ការខូច ខាតដោយសារគ្រោះធម្មជាតិគឺសំខាន់ណាស់សម្រាប់ប៉ាគីស្ថាន។

 

ក្នុងពេលជាមួយគ្នានេះ លោកហ្គូតេរ៉េសទទូចឱ្យគ្រឹស្ថានហិរញ្ញវត្ថុអន្តរជាតិដូចជាធនាគារ ពិភពលោក និងមេដឹកនាំប្រទេសនានាដែលនឹងចូលរួមក្នុងកិច្ចប្រជុំប្រទេសសេដ្ឋកិច្ចរីកចម្រើនទាំង ២០  (G20) ឱ្យធ្វើកំណែទម្រង់គោលនយោបាយដែលនឹងជួយបន្ធូរបន្ថយបំណុល និងការសម្រេចចិត្តកម្ចីសម្បទានដើម្បីជួយប្រទេសដែលមានចំណូលមធ្យមកម្រិតទាបដូចជាប៉ាគីស្ថានផ្តោតលើការកសាងឡើងវិញជាជាងការសងបំណុល។

 

«វាគួរតែមានវិធីមួយដើម្បីឱ្យមានការដោះដូរ(បំណុល) និងផ្លាស់ប្តូរការសងបំណុលទៅការ វិនិយោគលើការស្តារឡើងវិញនិងការកសាងឡើងវិញបន្ទាប់ពីគ្រោះមហន្តរាយធម្មជាតិ។

 

គួរបញ្ជាក់ថា ប៉ាគីស្ថាន និងប្រទេសដែលងាយរងគ្រោះអាកាសធាតុផ្សេងទៀតកំពុងទាម ទារឱ្យកិច្ចពិភាក្សាស្តីពីអាកាសធាតុរបស់ UN នៅឆ្នាំនេះចាត់វិធានការដើម្បីប្រមូលមូលនិធិ «ការបាត់បង់ និងការខូចខាត» សម្រាប់ប្រទេសដែលរងគ្រោះដោយគ្រោះមហន្តរាយ។ ប្រទេសមួយចំនួនទទូចឱ្យប្រទេសអ្នកមានរ៉ាប់រងកាតព្វកិច្ចបង់ថ្លៃចំណាយទាំងនេះដោយសារតែការបំភាយឧស្ម័នជាប្រវត្តិសាស្ត្ររបស់ប្រទេសអ្នកមានពីមុនមក៕