ម៉ាឡេស៊ី នឹងរៀបចំការបោះឆ្នោតជ្រើសរើសសមាជិកសភានៅថ្ងៃទី១៧ ខែវិច្ឆិកា។ កៅអីសមាជិក២២២ នឹងត្រូវដាក់ឱ្យប្រជែងក្នុងការបោះឆ្នោតដែលត្រូវមើលឃើញថា នឹងស្វិតស្វាញខ្លាំង។ ទាំងសម្ព័ន្ធភាពកាន់អំណាច និងក្រុមបក្សប្រឆាំងសុទ្ធតែដាក់ក្ដីរំពឹងខ្ពស់ក្នុងការឃោសនារកសំឡេងឆ្នោតរៀងៗខ្លួន។

 

លោក អាន់វ៉ា អ៊ីប្រាហ៊ីម អ្នកនយោបាយដ៏សំខាន់នៃក្រុមប្រឆាំង អះអាងថា បើជាប់នាយករដ្ឋមន្រ្តី លោកនឹងមិនយកប្រាក់ខែឡើយ ហើយកាត់ប្រាក់ខែរបស់គណៈរដ្ឋមន្រ្តីថែមទៀត។ ថ្លែងក្នុងការឃោសនានៅរដ្ឋ Johor លោក អាន់វ៉ា បញ្ជាក់ថា ក្រៅពីមិនយកប្រាក់ខែដោយសារស្ថានភាពសេដ្ឋកិច្ចប្រទេសមិនល្អ លោកចង់ដកឫសគល់នៃវិបត្តិពុករលួយក្នុងប្រទេសដែលមេដឹកនាំ បក្សពួក និងគ្រួសាររបស់ពួកគេកេងប្រវ័ញ្ចទ្រព្យសម្បត្តិរដ្ឋ។

 

«ដូច្នេះការបដិសេធមិនទទួលប្រាក់បៀវត្សរ៍ ជាសារបង្ហាញថា មេដឹកនាំទាំងអស់មិនសុទ្ធតែពុករលួយ និងលោភលន់នោះឡើយ។» លោក អាន់វ៉ា បន្ថែមបែបនេះ។

 

អ្នកនយោបាយដដែល ក៏បានព្រមានពីការទិញសន្លឹកឆ្នោតដោយសម្ព័ន្ធភាពកាន់អំណាច Barisan Nasional ផងដែរ ពិសេសនៅតំបន់ដែលមានសង្ឃឹមឈ្នះតិចតួច៕