អន្តរជាតិ
អ្នកការទូតអូស្ត្រាលី៖ គ្មានការផ្លាស់ប្ដូរគោលនយោបាយការពារជាតិឡើយ ក្រោយជួបមេដឹកនាំចិន នាយករដ្ឋមន្រ្តីអូស្ត្រាលី អាន់ថូនី អាល់បានីស ចាប់ដៃប្រធានាធិបតីចិន ស៊ី ជិនភីង នាជំនួបនៅឥណ្ឌូណេស៊ី។ រូបថត Xinhua
× អ្នកការទូតអូស្ត្រាលី លោក Arthur Sinodinos នៅថ្ងៃទី១៥ ខែវិច្ឆិកា លើកឡើងថា ជំនួបរវាងនាយករដ្ឋមន្ត្រីអូស្ត្រាលី អាន់ថូនី អាល់បានីស និងប្រធានាធិបតីចិន ស៊ី ជិនភីង មិននាំឱ្យមានការផ្លាស់ប្ដូរគោលនយោបាយពាក់ព័ន្ធយុទ្ធសាស្ត្រការពារជាតិរបស់អូស្ត្រាលីឡើយ។
នាកម្មវិធីមួយក្នុងវិទ្យាស្ថានអន្តរជាតិសម្រាប់ការសិក្សាយុទ្ធសាស្ត្រ (IISS) ក្នុងទីក្រុងវ៉ាស៊ីនតោន នៅថ្ងៃទី១៥ ខែវិច្ឆិកា ឯកអគ្គរាជទូតអូស្ត្រាលីប្រចាំអាម៉េរិក លោក Arthur Sinodinos លើកឡើងពីជំនួបទ្វេភាគីមេដឹកនាំអូស្ត្រាលីនិងចិន នៅឥណ្ឌូណេស៊ី។ លោក Sinodinos អះអាងថា ជំនួបទ្វេភាគីជាជំហានឆ្ពោះទៅរកការសម្រួលទំនាក់ទំនងរវាងអូស្ត្រាលី និងចិនឱ្យមានមានលក្ខណៈធម្មតាឡើងវិញ បន្ទាប់ពីប្រទេសទាំងពីរផ្អាកទំនាក់ទំនងការទូតជាច្រើនឆ្នាំ។
យ៉ាងណាមិញ លោក Sinodinos បញ្ជាក់ថា ជំនួបនេះមិនបាននាំឱ្យមានការផ្លាស់ប្តូរគោលនយោបាយការពារជាតិរបស់ទីក្រុងកង់បេរ៉ាឡើយ ហើយបំណងអូស្ត្រាលីដែលចង់ឱ្យទំនាក់ទំនងខ្លួនជាមួយចិនមានភាពធម្មតានោះ ផ្ដោតលើវិស័យពាណិជ្ជកម្មប៉ុណ្ណោះ។
បើតាមលោក Arthur Sinodinos ទីក្រុងកង់បេរ៉ាចង់កាត់បន្ថយភាពតានតឹងក្នុងទំនាក់ទំនងជាមួយចិន បន្ទាប់ពីបានដោះស្រាយបញ្ហាទណ្ឌកម្មសេដ្ឋកិច្ច និងពាណិជ្ជកម្មរបស់ចិនមកលើខ្លួន។ អូស្ត្រាលីកន្លងមកបានស្នើឱ្យចិនដកទណ្ឌកម្មពាណិជ្ជកម្មដែលបានដាក់លើការនាំចេញក្នុងវិស័យកសិកម្ម និងការនាំចេញរ៉ែ។ តែទោះយ៉ាងណា រដ្ឋមន្ត្រីការពារជាតិ Richard Marles អះអាងថាអូស្ត្រាលីនឹងមិនជ្រើសរើសរវាងទំនាក់ទំនងការទូត និងការការពារជាតិឡើយ។
គួររំលឹកថា មេដឹកនាំអូស្ត្រាលីនិងចិន នៅថ្ងៃទី១៥ ខែវិច្ឆិកា បានជួបគ្នាលក្ខណៈទ្វេភាគីរយៈពេល ៣០នាទី នៅក្រៅកិច្ចប្រជុំកំពូលប្រទេសមានសេដ្ឋកិច្ចជឿនលឿនទាំង២០ (G20)។ នេះជាជំនួបទ្វេភាគីលើកដំបូងគិតតាំងពីឆ្នាំ ២០១៦។
ទំនាក់ទំនងអូស្ត្រាលី និងចិន មានភាពល្អក់កករនាប៉ុន្មានឆ្នាំចុងក្រោយនេះ ក្រោយចិនដាក់ទណ្ឌកម្មលើការនាំចូលមួយចំនួនពីអូស្ត្រាលី ដើម្បីឆ្លើយតបទៅនឹងរដ្ឋាភិបាលកង់បេរ៉ា ដែលបានអំពាវនាវសហគមន៍អន្តរជាតិស្រាវជ្រាវពីប្រភពនៃកូវីដ-១៩។ លើសពីនេះ អូស្ត្រាលី និងចិនបានប្រជែងគ្នាជុំវិញបញ្ហាសន្តិសុខនៅក្នុងប្រជុំកោះប៉ាស៊ីហ្វិក ខណៈទីក្រុងប៉េកាំងបានចុះកិច្ចព្រមព្រៀងសន្តិសុខជាមួយកោះសូឡូម៉ុន៕
© រក្សាសិទ្ធិដោយ thmeythmey.com