អន្តរជាតិ
ក្រសួងសុខាភិបាលថៃ ប្រាប់ពលរដ្ឋពាក់ម៉ាស់នៅកន្លែងមានមនុស្សច្រើន ក្រោយករណីឆ្លងកូវីដ-១៩ ងើបឡើងវិញ រូបថត Xinhua
× ក្រសួងសុខាភិបាលថៃ នៅថ្ងៃទី២៥ ខែវិច្ឆិកា ណែនាំឱ្យប្រជាពលរដ្ឋពាក់ម៉ាស់មុខនៅកន្លែងមានមនុស្សកកកុញ ខណៈចំនួនអ្នកឆ្លងជំងឺកូវីដ-១៩ ប្រចាំថ្ងៃកើនឡើងគួរឱ្យកត់សម្គាល់។
លោកវេជ្ជបណ្ឌិត Opas Karnkawinpong និងជាលេខាធិការអចិន្ត្រៃយ៍ក្រសួងសុខាភិបាលថៃបានលើកឡើងនៅថ្ងៃទី២៥ ខែវិច្ឆិកាថា ចំនួនអ្នកឆ្លងជំងឺកូវីដ-១៩ ប្រចាំថ្ងៃនៅថៃបច្ចុប្បន្នបានកើន១០ ទៅ ២០ ភាគរយ។ ជាមួយការការព្រមាននេះ លោកវេជ្ជបណ្ឌិត បានណែនាំដល់មន្ទីរពេទ្យនៅតាមតំបន់ផ្សេងៗ លើកទឹកចិត្តប្រជាជនឱ្យចាក់វ៉ាក់សាំងការពារខ្លួន។
«ក្រសួង (ក្រសួងសុខាភិបាល) ចង់ឱ្យពលរដ្ឋ៧០ភាគរយនៃចំនួនប្រជាជនសរុបចាក់វ៉ាក់សាំងដូសជំរុញ ប៉ុន្តែវានៅតែពិបាកក្នុងការឈានដល់គោលដៅនោះ»។ លោកវេជ្ជបណ្ឌិត Opas បានលើកឡើងបែបនេះមុនបន្តថា ចំនួនអ្នកវ៉ាក់សាំងដូសជំរុញកំពុងថយចុះ ដោយឃើញថាស្ថានភាពរាលដាលនៃជំងីកូវីដ-១៩ បានប្រសើរឡើងកន្លងមក។
បើទោះបីជាការកើនឡើងនៃករណីឆ្លងជំងីកូវីដ-១៩ ជារលកតូចក្តី ប៉ុន្តែអ្នកស្លាប់អាចកើនឡើងដោយសារជំងីកូវីដ-១៩។ នេះបើតាមលោកវេជ្ជបណ្ឌិត Opas មុនបន្តថា ចំនួនអ្នកស្លាប់ប្រចាំថ្ងៃដែលទាក់ទងនឹងជំងីកូវីដ-១៩មានជាង ១០ នាក់នាពេលបច្ចុប្បន្ន។ យ៉ាងណាមិញលោកវេជ្ជបណ្ឌិតបានសង្កត់ធ្ងន់ថា ចំនួនអ្នកស្លាប់អាចកើនឡើងខណៈចំនួនអ្នកឆ្លងជំងឺកូវីដ-១៩ ប្រចាំថ្ងៃបានកើនឡើង។
ទោះព្រមានពីការកើនឡើងនៃចំនួនអ្នកឆ្លងជំងឺកូវីដ-១៩នេះ លោកវេជ្ជបណ្ឌិត Opas បានអះអាងថាមន្ទីរពេទ្យអាចទប់ទល់នឹងស្ថានភាពនេះបាន ដោយសារករណីឆ្លងភាគច្រើនជាករណីដែលអ្នកជំងឺព្យាបាលនៅផ្ទះ និងមានរោគសញ្ញាស្រាល។
ទន្ទឹមនឹងនេះ លោកវេជ្ជបណ្ឌិត Opasបាននិយាយថា BA.2.75 ដែលជាមែកធាងនៃជំងឺកូវីដ-១៩បំប្លែងខ្លួនអូមីក្រុងកំពុងរីករាលដាល។ យ៉ាងណាមិញ នៅមិនទាន់មានព័ស្តុតាងណាមួយបញ្ជាក់ថាវាបណ្តាលឱ្យមានជំងឺធ្ងន់ធ្ងរនៅឡើយ។ ទោះជាយ៉ាងណាក៏ដោយ មន្រ្តីដដែល នៅតែណែនាំឱ្យមនុស្សគួរតែពាក់ម៉ាសនៅកន្លែងដែលមានមនុស្សច្រើនដើម្បីការពារខ្លួន និងអ្នកដទៃ។
គួរបញ្ជាក់ថា ចាប់តាំងពីផ្ទុះជំងឺកូវីដ-១៩ក្នុងឆ្នាំ២០១៩មក ថៃគិតត្រឹមពេលនេះមានករណីឆ្លងសរុបជាង ៤,៧ លានករណី ខណៈអ្នកស្លាប់មានជាង ៣ម៉ឺន៣ពាន់នករណី។ បើតាមទិន្នន័យពីកាសែត Bangkok Post ចំនួនករណីអ្នកឆ្លងជំងឺកូវីដ-១៩បច្ចុប្បន្នមានជាង២ម៉ឺននាក់៕
© រក្សាសិទ្ធិដោយ thmeythmey.com