ភ្លាមៗបន្ទាប់បានធ្វើដំណើរទៅដល់មូលដ្ឋានទ័ពអាកាសម៉ាឡេស៊ីនៅទីក្រុង Subang ស្តេចស៊ុលតង់ព្រុយណេ Hassanal Bolkiah បានសម្រេចចិត្តបើករថយន្តដោយខ្លួនឯង ខណៈដែលនាយករដ្ឋមន្ត្រីម៉ាឡេស៊ីលោក អាន់វ៉ា អ៊ីប្រាហ៊ីម អង្គុយនៅកៅអីអ្នកដំណើរខាងមុខ។ លើសពីនេះដែរ បុត្រារបស់ស្តេចស៊ុលតង់ព្រុយណេ ព្រះអង្គម្ចាស់ Pengiran Muda Abdul Mateen Bolkiah ក៏បានរួមដំណើរដោយបានអង្គុយនៅកៅអីក្រោយផងដែរ។ 

 

រថយន្តដែលបើកដោយចស៊ុលតង់ព្រុយណេ Hassanal Bolkiahនេះ បានធ្វើដំណើរឆ្ពោះទៅទីក្រុង Putrajaya ដែលមានចម្ងាយជាង ៤១ គីឡូម៉ែត្រពីមូលដ្ឋានទ័ពអាកាសម៉ាឡេស៊ី RMAF ដោយអមដោយរថយន្តអម និងរថយន្តសន្តិសុខ។ 

 

គួរបញ្ជាក់ថា ជំនួបរវាងនាយករដ្ឋមន្ត្រីម៉ាឡេស៊ីនិងស្តេចស៊ុលតង់ព្រុយណេ ជាជំនួបដំបូងរវាងភាគីទាំង២ចាប់​តាំង​ពី​លោក អាន់វ៉ា បាន​តែងតាំង​ជា​នាយក​រដ្ឋមន្ត្រី​ទី ១០ របស់ម៉ាឡេស៊ី។

 

បើតាមក្រសួងការបរទេសម៉ាឡេស៊ី ដំណើរទស្សនកិច្ចចុងក្រោយបង្អស់របស់ស្តេចស៊ុលតង់មកម៉ាឡេស៊ី គឺតាំងពីខែមីនា ឆ្នាំ២០១៩ មកម្ល៉េះ ដើម្បីចូលរួមការកិច្ចជំនួបពិគ្រោះយោបល់របស់មេដឹកនាំប្រចាំឆ្នាំលើកទី ២២ រវាងម៉ាឡេស៊ី និងព្រុយណេ។ 

 

ក្នុងដំណើរទស្សនកិច្ចពិសេសនេះ មេដឹកនាំនៃប្រទេសទាំងពីរត្រូវបានគេរំពឹងថានឹងពិភាក្សាពីសក្តានុពលថ្មី ដើម្បីកែលម្អទំនាក់ទំនង និងកិច្ចសហប្រតិបត្តិការរវាងប្រទេសទាំងពីរឱ្យកាន់តែស៊ីជម្រៅ។ គួរបញ្ជាក់ថា គិតត្រឹមឆ្នាំ ២០២១ ព្រុយណេគឺជាដៃគូពាណិជ្ជកម្មធំជាងគេទី ៣០ របស់ម៉ាឡេស៊ី និងធំជាងគេទី ៦ ក្នុងតំបន់អាស៊ាន ជាមួយនឹងទំហំពាណិជ្ជកម្មសរុបដែលមានតម្លៃប្រមាណ ៨,០៣ ពាន់លានដុល្លារ៕