«កងទ័ពយើងក្នុងប៉ុន្មានថ្ងៃមុននេះ របួស៣នាក់ ក្នុងប្រទេសម៉ាលី ដោយសារការដាក់មីនស្កាត់ផ្លូវ ក្នុងពេលដែលកងទ័ពរបស់យើងធ្វើដំណើរ»។ នេះបើតាមប្រមុខរដ្ឋាភិបាល ដែលបានបន្ថែមថា បច្ចុប្បន្នកងទ័ពមួកខៀវកម្ពុជា កំពុងបំពេញបេសកកម្មនៅប្រទេសចំនួន៤ រួមមាន លីបង់ ស៊ូដង់ខាងត្បូង ម៉ាលី និងអាហ្វ្រិកកណ្តាល។

បើតាមលោកស្រី កុសល មាលីនដា អគ្គនាយករងមជ្ឈមណ្ឌលជាតិរក្សាសន្តិភាព យោធិនទាំង៣នាក់ដែលរងគ្រោះនោះ មានឈ្មោះ ម៉ី គឹមថុង ជាបុគ្គលិកពេទ្យ, ពេញ រស្មី ជាតៃកុងទ្បាន និង លោក ម៉ែន ថារ៉ា ជាបុគ្គលិកស្រាវជ្រាវរុករក។  លោកស្រី បានបញ្ជាក់ថាប្រាប់សារព័ត៌មានថ្មីៗនារសៀលថ្ងៃទី១ធ្នូនេះ ថា បច្ចុប្បន្ន សុខភាពរបស់យោធិនទាំង៣រូបនេះ គឺមានភាពល្អប្រសើរឡើងច្រើនហើយ ដែលកំពុងទទួលការព្យាបាលនៅមន្ទីពេទ្យកម្រិត២ របស់អង្គការសហប្រជាជាតិ៕​