«យើងចាត់ទុកចំនួនអ្នកស្លាប់ ជាផលវិបាកដែលយើងត្រូវតែប្រឈម»។ ប្រធានាធិបតីស្តីទីរបស់បក្សរួបរួមជាតិមីយ៉ាន់ម៉ាលោក Duwa Lashi La ថ្លែងបែបនេះក្នុងសន្និសីទ Reuters NEXT នៅថ្ងៃទី១ ខែធ្នូ ។

 

បន្ថែមពីលើអ្នកស្លាប់ពីរពាន់នាក់ក្នុងការតស៊ូប្រឆាំងយោធាមីយ៉ាន់ម៉ានេះ ជនស៊ីវិលជាង ២ ៥០០ នាក់ទៀតត្រូវបានសម្លាប់ក្នុងការបង្រ្កាប។ នេះបើតាមសមាគមជំនួយអ្នកទោសនយោបាយ។ 

 

លោក Duwa Lashi La ត្រូវបានតែងតាំងជាប្រធានាធិបតីស្តីទីនៃរដ្ឋាភិបាលរួបរួមជាតិមីយ៉ាន់ម៉ារបស់លោកស្រី អ៊ុងសាន ស៊ូជី ដែលត្រូវបានធ្វើរដ្ឋប្រហារទម្លាក់កាលពីឆ្នាំ២០២១។ របបសឹកមីយ៉ាន់ម៉ាចាត់ទុកលោក និងរដ្ឋាភិបាលលោកជាភេរវករ ហើយហាមប្រាមប្រជាជនមិនឱ្យទាក់ទងជាមួយ។ តែរដ្ឋាភិបាលស៊ីវិលទទួលបានគាំទ្រយ៉ាងច្រើនពីជនស៊ីវិល។

 

ស្របពេលប្រទេសនៅតែជាប់គាំងក្នុងវិបត្តិជម្លោះប្រដាប់អាវុធ និងការបង្រ្កាបលើអ្នកប្រឆាំងរបបសឹក លោក Duwa Lashi La លើកឡើងថា ប្រសិនបើទទួលបានគាំទ្រពីអាម៉េរិក និងសហភាពអឺរ៉ុបដូចអ៊ុយក្រែន ការធ្វើទុក្ខបុកម្នេញលើប្រជាជននឹងបញ្ចប់ភ្លាមៗ។ បន្ថែមពីនេះ បើមានអាវុធប្រឆាំងយន្តហោះ កងកម្លាំងការពារប្រជាជនរបស់រដ្ឋាភិបាលលោកនឹងយកឈ្នះសង្រ្គាមក្នុងរយៈពេលប្រាំមួយខែ។

 

សូមបញ្ជាក់ថា បើទោះបណ្តាប្រទេសលោកខាងលិចបង្ហាញគាំទ្ររដ្ឋាភិបាលរួបរួមជាតិ ហើយដាក់ទណ្ឌកម្មលើមេដឹកនាំរបបយោធា និងក្រុមហ៊ុនយោធាមីយ៉ាន់ម៉ា ប្រទេសទាំងនេះមិនបានផ្តល់ជំនួយយោធាទេ។ លោកខាងលិចអះអាងថា អាស៊ានដែលគោរពគោលការណ៍មិនជ្រៀតជ្រែកកិច្ចការផ្ទៃក្នុងរបស់រដ្ឋសមាជិក ជាប្លុកដ៏ល្អបំផុតដើម្បីដោះស្រាយវិបត្តិនៅមីយ៉ាន់ម៉ា៕