ធនាគារអភិវឌ្ឍន៍អាស៊ី(ADB)បានអនុម័តកញ្ចប់ថវិកាចំនួន៦២,៩ លានដុល្លារ ដើម្បីជួយកម្ពុជាលើកកម្ពស់សន្តិសុខស្បៀង និងជំរុញកំណើនសេដ្ឋកិច្ចប្រកបដោយបរិយាប័ន្ន។ កញ្ចប់ថវិកានេះ នឹងគាំទ្រជាពិសេសដល់ខ្សែច្រវាក់តម្លៃ ក៏ដូចជាការធ្វើពាណិជ្ជកម្មផ្លូវការ និងផលិតផល បសុសត្វនៅកម្ពុជា។
អនុវិស័យបសុសត្វ មានសារៈសំខាន់ណាស់ ចំពោះជីវភាពរស់នៅតាមតំបន់ជនបទ ប្រកបដោយនិរន្តរភាព និងសន្តិសុខស្បៀងនៅកម្ពុជា។ អនុវិស័យនេះ គឺផ្តល់ឱកាសជាច្រើនសម្រាប់កសិករលក្ខណៈគ្រួសារ រួមទាំងស្ត្រី និងកសិអាជីវកម្មខ្នាតតូច និងមធ្យម។ នេះជាការលើកឡើងរបស់លោក Srinivasan Ancha អ្នកជំនាញជាន់ខ្ពស់ផ្នែកបំរែបំរួលអាកាសធាតុរបស់ ADB ប្រចាំតំបន់អាស៊ីអាគ្នេយ៍។
លោក Srinivasan Ancha បានបញ្ជាក់ថា ជំនួយថវិកា៦២,៩លានដុល្លារ ដែលADB សម្រេចផ្តល់ឱ្យកម្ពុជា នៅថ្ងៃទី១៣ ធ្នូ ឆ្នាំ២០២៣ វានឹងអនុញ្ញាតឱ្យអនុវិស័យនេះ អាចទាញយកសក្តានុពលនៃកំណើនខ្ពស់ ដែលនាំឱ្យកើនឡើងនៃការប្រើប្រាស់សាច់ក្នុងស្រុក តាមរយៈកំណើនសេដ្ឋកិច្ច នគរូបនីយកម្ម ចំនួនប្រជាជន និងឱកាសពាណិជ្ជកម្ម ជាពិសេសការគ្រប់គ្រងជំងឺ និងអាហារូបត្ថម្ភសម្រាប់សត្វ។
បើតាមសេចក្តីប្រកាសព័ត៌មានរបស់ADB ជំនួយដែលកម្ពុជាទទួលបាននេះ គឺស្ថិតនៅក្នុងគម្រោងកែលម្អសុខភាព និងខ្សែសង្វាក់តម្លៃបសុសត្វឆ្លងព្រំដែន ក្នុងមហាអនុតំបន់មេគង្គ (GMS)។ ការអនុវត្តគម្រោងនេះ នឹងផ្តល់អត្ថប្រយោជន៍ដោយផ្ទាល់ដល់ពលរដ្ឋយ៉ាងហោចណាស់៤ម៉ឺនគ្រួសារ ដែលស្ថិតនៅរាជធានីភ្នំពេញ ខេត្តកំពង់ចាម ឧត្តរមានជ័យ ព្រៃវែង សៀមរាប និងតាកែវ តាមរយៈការជំរុញការវិនិយោគលើហេដ្ឋារចនាសម្ព័ន្ធ សមត្ថភាពស្ថាប័ននិងបច្ចេកទេស និងគោលនយោបាយគាំទ្រសំខាន់ៗ។
ADB បានបញ្ជាក់ថា៖ «កញ្ចាប់ថវិកានេះ ក៏នឹងអភិវឌ្ឍហេដ្ឋារចនាសម្ព័ន្ធនៅក្នុងខេត្តកណ្តាល កំពង់ធំ និងពោធិសាត់ ដើម្បីបំពេញតម្រូវការទូទាំងប្រទេសសម្រាប់វ៉ាក់សាំងបសុសត្វ និងការបង្កាត់ពូជសិប្បនិម្មិត។ គម្រោងនេះនឹងលើកកម្ពស់ផលិតភាព និងភាពធន់នៃអនុវិស័យបសុសត្វ ដោយកាត់បន្ថយហានិភ័យនៃជំងឺសត្វឆ្លងដែន ជំងឺឆ្លងពីសត្វ និងភាពសាំនឹងថ្នាំសម្លាប់មេរោគ បង្កើតការត្រួតពិនិត្យសុខភាពសត្វ និងការផ្តល់សេវា ធ្វើឱ្យប្រសើរឡើងនូវសុវត្ថិភាពម្ហូបអាហារ និងជំរុញកិច្ចសហប្រតិបត្តិការអនុតំបន់ក្នុងមហាអនុតំបន់មេគង្គ»។
ជំនួយរបស់ADB ដែលកម្ពុជាទទួលបាននេះ នឹងលើកកម្ពស់ផលិតកម្មបសុសត្វបត់បែន តាមអាកាសធាតុ ដែលជាវិធីសាស្រ្តធ្វើអន្តរកម្ម និងតម្រង់ទិសប្រព័ន្ធបសុសត្វឆ្លើយតបនឹងការប្រែប្រួលអាកាសធាតុ ព្រមទាំងកាត់បន្ថយការបំភាយឧស្ម័នផ្ទះកញ្ចក់ និងរួមចំណែកដល់ការប្រឹងប្រែងស្តាឡើងវិញពីកូវីដ-១៩។ នេះបើយោងតាមសេចក្តីប្រកាសព័ត៌មាន ADB ។
ADB បានបន្ថែមថា ជំនួយនេះក៏នឹងគាំទ្រដល់ការអនុវត្តវិធីសាស្រ្ត One Health ដែលមានបំណងធ្វើឱ្យមានតុល្យភាពប្រកបដោយនិរន្តរភាព និងធ្វើឱ្យសុខភាពរបស់មនុស្ស សត្វ និងប្រព័ន្ធអេកូឡូស៊ីកាន់តែប្រសើរឡើង ពង្រឹងការចូលរួមរបស់វិស័យឯកជន និងជួយធ្វើអន្តរកម្មការគ្រប់គ្រងបសុសត្វឆ្ពោះទៅរកប្រព័ន្ធគ្រប់គ្រងឌីជីថល និងសេវាកម្មព័ត៌មាន។
បើតាមADB កញ្ចប់ថវិកាសរុប៦២,៣លានដុល្លារដែលកម្ពុជានឹងទទួលបានសម្រាប់អនុវត្តគម្រោងកែលម្អសុខភាព និងខ្សែសង្វាក់តម្លៃបសុសត្វឆ្លងព្រំដែន ក្នុងមហាអនុតំបន់មេគង្គ (GMS)នេះ គឺមាន៥០លានដុល្លា រជាកម្ចីពីធនធានសម្បទានរបស់ADB, ថវិកា១២លានដុល្លារគឺជាជំនួយមូលនិធិអភិវឌ្ឍន៍អាស៊ី(ADF) និង៩០ម៉ឺនដុល្លារទៀត ជាជំនួយឥតសំណងពីមូលនិធិបំរែបំរួលអាកាសធាតុ(CCF)។ មូលនិធិអភិវឌ្ឍន៍អាស៊ី ផ្តល់ជំនួយដល់ប្រទេស សមាជិកកំពុងអភិវឌ្ឍរបស់ADB ហើយមូលនិធិអភិវឌ្ឍន៍អាស៊ី មានគោលបំណងពង្រឹងការគាំទ្រដល់ ការអភិវឌ្ឍប្រកបដោយកាបូនទាបនិងភាពធន់នឹងអាកាសធាតុក្នុងប្រទេសសមាជិកកំពុងអភិវឌ្ឍ។
ADB បានបញ្ជាក់ថា ធនាគារវិនិយោគហេដ្ឋារចនាសម្ព័ន្ធអាស៊ី (AIIB)នឹងផ្តល់ប្រាក់កម្ចីចំនួន ៤៣ លានដុល្លារដល់គម្រោងខាងលើ ដែលទំហំថវិកាសម្រាប់អនុវត្តគម្រោងនឹងត្រូវគ្រប់គ្រងដោយ ADB។ គម្រោងកែលម្អសុខភាព និងខ្សែសង្វាក់តម្លៃបសុសត្វឆ្លងព្រំដែន ក្នុងមហាអនុតំបន់មេគង្គនេះ គឺស្របតាមផែនការអភិវឌ្ឍន៍ជាតិរបស់រាជរដ្ឋាភិបាល និងយុទ្ធសាស្ត្រភាពជាដៃគូប្រចាំប្រទេស របស់ ADB សម្រាប់ប្រទេសកម្ពុជា ឆ្នាំ ២០១៩-២០២៣៕