ជាលើកទីពីរក្នុងរយៈពេល៨ឆ្នាំចុងក្រោយ អាម៉េរិកកំពុងធ្វើជាម្ចាស់ផ្ទះរៀបចំកិច្ចប្រជុំកំពូលបីថ្ងៃជាមួយបណ្តាប្រទេស៤៩មកពីទ្វីបអាហ្វ្រិកដើម្បីលើកស្ទួយកិច្ចសហប្រតិបត្តិការបន្ថែម។ នេះជាពេលដ៏សំខាន់សម្រាប់ក្រុងវ៉ាស៊ីនតោនក្នុងការពង្រឹង និងកែលម្អទំនាក់ទំនងឡើងវិញជាមួយបណ្តាប្រទេសទាំងនោះទីដែលខ្លួនចាត់ទុកថាជាតំបន់ភូមិសាស្ត្រនយោបាយដ៏សំខាន់ ស្របពេលចិនឈានជើងវិនិយោគនៅតំបន់នោះវ៉ាដាច់ក្រុងវ៉ាស៊ីនតោន រីឯរុស្ស៊ីកំពុងបង្កើនឥទ្ធិពលឱ្យរួចផុតពីសម្ពាធរបស់លោកខាងលិចដែលដាក់ទណ្ឌកម្មលើខ្លួន។

 

មុនកិច្ចប្រជុំកំពូល រដ្ឋមន្រ្តីការពារជាតិអាម៉េរិក ឡយ អូស្ទីន ក៏ជួបមេដឹកនាំអាហ្វ្រិកជាច្រើន។ លោក អូស្ទីន លើកឡើងថា ដៃគូប្រកួតប្រជែងរបស់ខ្លួនដែលចង់សំដៅលើចិន និងរុស្ស៊ី មានយុទ្ធសាស្រ្តផ្សេងគ្នាដើម្បីបញ្ជ្រាបឥទ្ធិពលក្នុងតំបន់។ លោក អូស្ទីន បញ្ជាក់ថា ចិនកំពុងពង្រីកវត្តមាននៅទ្វីបអាហ្វ្រិកជារៀងរាល់ថ្ងៃតាមរយៈឥទ្ធិពលសេដ្ឋកិច្ច។

 

«បញ្ហានៅទីនោះគឺថា ពួកគេតែងតែមិនមានតម្លាភាពទៅលើអ្វីដែលពួកគេកំពុងធ្វើ ហើយប្រសិនបើពួកគេមិនទាន់ត្រៀមខ្លួនរួចរាល់ វានឹងបង្កើតបញ្ហាដែលយូរៗទៅក្លាយជាអស្ថិរភាព»។ ប្រមុខការពារជាតិអាម៉េរិក លើកឡើងបែបនេះនៅថ្ងៃទី១៣ ខែធ្នូ។​

 

បើតាមរដ្ឋមន្រ្តីការពារជាតិអាម៉េរិករូបនេះ រុស្ស៊ីក៏កំពុងធ្វើឱ្យតំបន់អាហ្វ្រិកអស្ថិរភាពដែរតាមរយៈការបន្តលក់អាវុធថោកៗ ហើយពង្រាយទាហានស៊ីឈ្នួលនៅពាសពេញទ្វីបនេះ។ ប៉ុន្តែ រដ្ឋាភិបាលលោក ចូ បៃឌិន មិនបានបង្ហាញចេតនាឱ្យអាហ្វ្រិកជ្រើសរើសភាគីណាមួយទេ។ អគ្គរដ្ឋទូតចិនប្រចាំក្រុងវ៉ាស៊ីនតោន លោក Qin Gang ក៏បានច្រានចោលការរិះគន់របស់អាម៉េរិក ដោយអះអាងថា អាហ្វ្រិកមិនគួរចាត់ទុកជាតំបន់ដែលប្រទេសមហាអំណាចប្រជែងគ្នាទេ។

 

មុនកិច្ចប្រជុំកំពូលចាប់ផ្តើមមួយថ្ងៃ សេតវិមានប្រកាសផែនការក្នុងការប្តេជ្ញាវិនិយោគលើសុខាភិបាល សន្តិសុខ និងសេដ្ឋកិច្ចក្នុងទំហំ៥៥ពាន់លានដុល្លារនៅតំបន់អាហ្វ្រិកសម្រាប់៣ឆ្នាំបន្ទាប់ទៀត។ ទន្ទឹមនេះ ក្រុងវ៉ាស៊ីនតោនក៏បានចាត់តាំង​ លោក Johnnie Carson ជាប្រេសិតពិសេសថ្មីដែលទទួលបន្ទុកលើបញ្ហាទាំងនេះក្នុងតំបន់៕