តាមរយៈការបង្ហោះលើទំព័រហ្វេសប៊ុកផ្លូវការបស់សហព័ន្ធកីឡាបាល់ទាត់កម្ពុជា (FFC) ក្រុមគោព្រៃ បានធ្វើដំណើរទៅដល់ប្រទេសឥណ្ឌូណេស៊ីនៅម៉ោង១០:៤៥នាទីយប់ ថ្ងៃទី២១ ខែធ្នូ ខុសពីគម្រោងរបស់ខ្លួន ដែលគ្រោងឱ្យដល់ទីនោះនៅពេលល្ងាច ដើម្បីមានពេលហ្វឹកហាត់គ្រប់គ្រាន់។​ កម្ពុជា បានចេញដំណើរពីទឹកដីខ្លួនតាំងពីប្រលឹមថ្ងៃទី២១ ខែធ្នូ ហើយទៅដល់ឥណ្ឌូណេស៊ីដោយប្រើពេលជាង១៥ម៉ោង។
 

«ទៅដល់ឥណ្ឌូណេស៊ី នៅវេលាម៉ោង ១០:៤៥នាទីយប់ក្រោយជើងហោះហើរត្រូវបានពន្យាពេល ២លើក។ ក្រុមត្រូវបន្តធ្វើដំណើរទៅកាន់សណ្ឋាគារក្នុងរយៈពេល ១ម៉ោងទៀត»។ នេះជាការបញ្ជាក់របស់ FFC លើផេកហ្វេសប៊ុកខ្លួន។
 

FFC បន្ថែមថាដោយសារយឺតពេល គម្រោងដែលនឹងត្រូវទៅដល់ឥណ្ឌូណេស៊ីពេលល្ងាច ដើម្បីមានពេលហ្វឹកហាត់ពីរលើក ត្រូវបានលុបចោលវិញ។ ដូច្នេះក្រុមកម្ពុជា នៅសល់ពេលហ្វឹកហាត់តែមួយថ្ងៃប៉ុណ្ណោះនៅថ្ងៃទី២២ ខែធ្នូនេះ ដើម្បីត្រៀមខ្លួនជួបឥណ្ឌូណេស៊ី។
 

ជុំវិញការពន្យាជើងយន្តហោះដល់ទៅ២លើកនេះ បានធ្វើឱ្យអ្នកចាត់ការទូទៅក្រុមគោព្រៃលោក Honda មិនសប្បាយចិត្តនោះទេ។ លើសពីនេះទៅទៀត ខាងសណ្ឋាគារដែលក្រុមកម្ពុជាស្នាក់នៅក៏មានការរំខានថែមទៀត។
 

អ្នកចាត់ការសញ្ជាតិជប៉ុន បង្ហាញការមិនពេញចិត្តចំពោះការរៀបចំសេវាកម្មនៅសណ្ឋាគារសម្រាប់កម្ពុជា ពីសំណាក់ម្ចាស់ផ្ទះឥណ្ឌូណេស៊ីនៅលើបណ្តាញសង្គម Twitter ថា៖ ខ្ញុំទទួលបានការគេទូរសព្ទចូលពីរទៅ៣លើកក្នុងបន្ទប់សណ្ឋាគារដែលខ្ញុំបានស្នាក់នៅក្នុងប្រទេសឥណ្ឌូណេស៊ី ក្រឡែកទៅមើលនាឡិកាម៉ោង ៤ ទាបភ្លឺទៅហើយ។ ការហៅទូរស័ព្ទទាំងពីរលើកនោះគ្មានការឆ្លើយតបឡើយ មុនពេលមានការហៅចូលម្តងទៀតទើបឆ្លើយតប។ ខ្ញុំនឹងធ្វើវានៅថ្ងៃស្អែក ហើយក៏ជាការប្រកួតដ៏សំខាន់ ដូច្នេះខ្ញុំនឹងប្រាប់កីឡាករអំពីរឿងរ៉ាវក៏ដូចជាវិធានការឆ្លើយតបចំពោះបញ្ហានៅយប់នេះ។ »។

 

បើទោះមិនបានសម្រាកគ្រប់គ្រាន់ និងខកពេលហាត់មួយថ្ងៃក្តី លោក Honda ដែលដឹកនាំក្រុមកម្ពុជាឈ្នះហ្វីលីពីននៅជំនួបបើកឆាក នៅតែមានវិធានការដើម្បីទប់ទល់ជុំវិញបញ្ហាខាងលើនេះ ដ្បិតជំនួបទល់ឥណ្ឌូណេស៊ីជាជំនួបសំខាន់។
 

កម្ពុជា ត្រូវជួបឥណ្ឌូណេស៊ីនៅថ្ងៃទី២៣ ខែធ្នូ ក្នុងជំនួបលើកទី២ពូល A ពាន AFF Mitsubishi Electric Cup នៅថ្ងៃទី២៣ ខែធ្នូ វេលាម៉ោង ៧:៣០នាទីយប់៕