កីឡាជាតិ
ជាតិ
ស៊ីហ្គេម២០២៣
CAMSOC ជំរុញគណៈកម្មការជំនាញដោះស្រាយបញ្ហាសេសសល់ឱ្យអស់ មុនស៊ីហ្គេម២០២៣ លោក វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC។
× គណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) ជំរុញគណៈកម្មការជំនាញដោះស្រាយបញ្ហានៅសេសល់ឱ្យបានរួចរាល់មុនកីឡាស៊ីហ្គេម ស្របពេលឆ្នាំឆ្នាំ២០២៣ជិតចូលមកដល់។ CAMSOC លើកឡើងដូច្នេះក្នុងកិច្ចប្រជុំជាមួយគណៈកម្មការជំនាញនៅទីស្នាក់ការ NOCC នៅថ្ងៃទី២១ ខែធ្នូ។
លោក វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC ប្រាប់អ្នកសារព័ត៌មានក្រោយបញ្ចប់កិច្ចប្រជុំ គណៈអចិន្ត្រៃយ៍ នៃគណៈកម្មាធិការជាតិ CAMSOC-CAMAPGOC ថា គណៈកម្មការជំនាញគ្រប់ផ្នែកត្រូវយកចិត្តទុកដាក់ពិនិត្យមើលលើបញ្ហាដែលនៅសេសសល់មួយចំនួន ដែលត្រូវឱ្យរួចរាល់មុនព្រឹត្តិការណ៍ស៊ីហ្គេម២០២៣ មកដល់។
លោក វ៉ាត់ ចំរើន និយាយថា៖«កិច្ចប្រជុំនេះបានត្រួតពិនិត្យវឌ្ឍនភាពការងាររបស់គណៈកម្មការជំនាញរបស់ខ្លួនទាំងអស់ ពិសេសពិនិត្យមើលបញ្ហាប្រឈម ដូចជាការស្នាក់នៅ ហូបចុក ការទទួលបដិសណ្ឋារកិច្ច និងទីលានប្រកួតជាដើម គណៈកម្មការគ្រប់ផ្នែកត្រូវឱ្យរួចរាល់ទាន់ពេលវេលានៅបំណាច់ឆ្នាំ២០២២ ចូលឆ្នាំ២០២៣»។
ព្រឹត្តិការណ៍កីឡាស៊ីហ្គេមលើកទី៣២ នឹងប្រារព្ធពិធីបើកការប្រកួតផ្លូវការនៅថ្ងៃទី៥ ខែឧសភា និងពិធីបិទនៅថ្ងៃទី១៧ ខែឧសភា ឆ្នាំ២០២៣។ បើគិតពីថ្ងៃទី២៣ ខែធ្នូ ឆ្នាំ២០២២ រហូតដល់ថ្ងៃបើកគឺនៅសល់រយៈពេល ១៣៣ថ្ងៃគត់។
រីឯការប្រកួតកីឡាអាស៊ានប៉ារ៉ាហ្គេមលើកទី១២ នឹងប្រព្រឹត្តទៅពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣ ខាងមុខ។ ប៉ុន្ដែមុនឈានដល់ព្រឹត្តិការណ៍ប្រវត្តិសាស្ដ្រនេះ កម្ពុជានឹងមានកម្មវិធីជាច្រើនទៀត ដូចកម្មវិធីរាប់ថយក្រោយ ១០០ថ្ងៃឆ្ពោះទៅស៊ីហ្គេមលើកទី៣២ ដែលគ្រោងរៀបចំនាថ្ងៃទី២៥ ខែមករា ឆ្នាំ២០២៣ និងកម្មវិធីរត់ភ្លើងគប់ ក៏ដូចជាកម្មវិធីផ្សេងៗទៀត៕
Tag:
ស៊ីហ្គេម២០២៣
អាស៊ានប៉ារ៉ាហ្គេម២០២៣
CAMSOC
© រក្សាសិទ្ធិដោយ thmeythmey.com