ជាតិ
ប្រទេសនិយាយភាសាអង់គ្លេសបានល្អបំផុត៖ ហូឡង់ លេខ១, សិង្ហបុរីលេខ២ ឯកម្ពុជាលេខ៩៤
× ភាសាអង់គ្លេស ជាភាសាដែលនិយាយយ៉ាងទូលំទូលាយបំផុតនៅលើពិភពលោក ហើយអ្នកនិយាយភាសាអង់គ្លេសភាគច្រើនមិនមែនជាជនជាតិដើមដែលប្រើប្រាស់ភាសាអង់គ្លេសជាភាសាកំណើតឡើយ។ ប្រជាជនជាច្រើនលើពិភពលោកអាចប្រើប្រាស់ភាសាអង់គ្លេសបានជាភាសាទី២ ហើយប្រទេសខ្លះវិញថែមទាំងបានដាក់ភាសាអង់គ្លេសជាភាសាជាតិរបស់ខ្លួនទៀតផង។
បើតាមទិន្នន័យពីវេបសាយ World Economic Forum ក្នុងឆ្នាំ២០១៩ មនុស្សប្រមាណ១,៥ពាន់លាននាក់អាចនិយាយភាសាអង់គ្លេសបាន ដែលក្នុងចំណោមនោះមានតែមនុស្សជាង៤០០លាននាក់ប៉ុន្តែដែលប្រើប្រាស់ភាសាអង់គ្លេសជាភាសាកំណើត។ នេះមានន័យថាមនុស្សជាង១ពាន់លាននាក់មកពីប្រទេសផ្សេងៗគ្នាអាចប្រើប្រាស់ភាសាអង់គ្លេសបានក្រៅតែពីភាសាកំណើតខ្លួន។
បើតាមការស្រាវជ្រាវចុងក្រោយរបស់សន្ទស្សន៍ការនិយាយភាសាអង់គ្លេសក្នុងឆ្នាំ ២០២២ ដែលស្រាវជ្រាវលើប្រទេសជុំវិញពិភពលោកដែលរៀនភាសាអង់គ្លេស និងគុណភាពនៃការបង្រៀននៅក្នុងប្រទេសនីមួយៗ ប្រទេសហូឡង់ប្រទេសដែលអាចនិយាយភាសាអង់គ្លេសល្អបំផុត មានពិន្ទុ៦៦១។ សិង្ហបុរី៖ ជាប្រទេសមួយក្នុងតំបន់អាស៊ី សិង្ហបុរីឈរនៅលំដាប់ទី២ ដែលមានប្រជាជនអាចនិយាយភាសាអង់គ្លេសជាភាសាទី២ ជាមួយនឹងអូទ្រីសដែរជាមួយពិន្ទុ៦២៨។
ឯន័រវេស នៅលេខបន្ទាប់ដោយមានពិន្ទុ៦២៧ ឯដាណឺម៉ាកដែលជាប្រទេសមួយស្ថិតនៅតំបន់អឺរ៉ុបខាងជើងនិងមានភាសាដាណឺម៉ាកជាភាសាជាតិ មានពិន្ទុ៦២៥។
បែលហ្ស៊ិក នៅចំណាត់ថ្នាក់បន្ទាប់មានពិន្ទុ៦២០ តាមពីក្រោយដោយស៊ុយអែតមាន៦១៨ពិន្ទុ, ហ្វាំងឡង់មាន៦១៥ពិន្ទុ, ព័រទុយហ្គាល់មាន៦១៤ពិន្ទុ និងអាល្លឺម៉ង់មានពិន្ទុ៦១៣។
ចំណែកកម្ពុជាឈរនៅលំដាប់ទី៩៤ ក្នុងចំណោមប្រទេសចំនួន ១១១ ដែលមានប្រជាជនអាចនិយាយភាសាអង់គ្លេសបាន ខណៈប្រទេសថៃឈរនៅលំដាប់លេខ៩៧ វៀតណាមនៅលំដាប់ទី៦០ និងឡាវនៅលំដាប់ទី ១១១៕
© រក្សាសិទ្ធិដោយ thmeythmey.com