នាយកអនុវិទ្យាល័យកោះរំដួល លោកស្រី ប៉ូច កែវ បានលើកឡើងថា សព្វថ្ងៃនៅក្នុងអនុវិទ្យាល័យកោះរំដួល បានសិស្សមានពិការភាពមួយចំនួនតូចប៉ុណ្ណោះ ដែលទទួលបានការអប់រំ។ កុមារទាំងនេះ ភាគច្រើន មានពិការភាពផ្នែកខ្លះនៃកាយសម្បាទា ពោលគឺមិនរហូតដល់ ដើរមិនរួច ឬជិះរទេះ​នោះទេ។ 

 

កុមារមានពិការភាព ត្រូវបានយកចិត្តទុកដាក់ និងផ្ដល់អាទិភាពខ្ពស់ ជាងកុមារដទៃ។ ទន្ទឹមនេះ អនុវិទ្យាល័យកោះរំដួល បានសង់ជម្រាលសម្រាប់ជនមានពិការភាពរួចរាល់ តាមអគារសិក្សាចំនួន១ និងបន្ទប់ទឹកមួយកន្លែង ដើម្បីសម្រួលដល់ការធ្វើដំណើរ ក្នុងករណីទទួលបានសិស្សមានពិការភាពកម្រិតធ្ងន់មកសិក្សាផងដែរ។

 

លោកស្រី ប៉ូច កែវ ចាត់ទុកជម្រាលសម្រាប់ជនមានពិការភាព ជាផ្នែកមួយជំរុញឱ្យកុមារពិការមានទទួលបានការអប់រំខ្ពស់ ជាពិសេសកាត់បន្ថយបញ្ហាបោះបង់ការសិក្សា។ នាយកអនុវិទ្យាល័យរូបនេះ បន្ថែមដូច្នេះថា៖«ការធ្វើជម្រាលនេះ មានប្រយោជន៍ច្រើន ដល់ប្អូនៗជនពិការ។ ទី១អាចឱ្យពួកគេ អាចមករៀន ទៀងទាត់ដូចកុមារដទៃ ឧទាហរណ៍ថា ប្រសិនបើ គ្មានជម្រាលទេ គាត់អត់អាចជិះរទេះមកសិក្សាបានទេ។ ទី២ អត់ប្រឈមនឹងការបោះបង់ការសិក្សា អ៊ីចឹង សាលាយើង ក៏ត្រូវគិតគូរពីបញ្ហាហ្នឹងដែរ»។ 

 

នៅឆ្នាំ២០២២ អនុវិទ្យាល័យកោះរំដួល បានសិស្សចំនួន ៣៩៧នាក់ ក្នុងនោះ មានអ្នកពិការកម្រិតស្រាលម្នាក់។ បន្ថែមពីនេះ សាលា ក៏មានផែនការសង់ជម្រាលជនពិការមួយកន្លែងបន្ថែមទៀតដែរ ដើម្បីធានាការសិក្សារបស់សិស្ស មានពិការភាពនាពេលអនាគត។ 

 

ជាមួយគ្នានេះ អ្នកស្រី ប៉ូច កែវ បានអំពាវនាវ ដល់អាណាព្យាបាលដែលមានកូនពិការ គួរតែផ្ដល់ឱកាសដល់ពួកគេ មកទទួលសេវាអប់រំ ដើម្បីអនាគតប្រសើរ ជៀសផុតពីភាពលំបាក​៕ 

 

អានអត្ថបទពាក់ព័ន្ធផ្សេងទៀត៖ យុវជនសកម្មសេវាល្អ