ជាតិ
ឆ្នាំនេះ ផលត្រីទឹកសាបកើន៤០ភាគរយ ដោយសារការទប់ស្កាត់បទល្មើសខុសច្បាប់មានប្រសិទ្ធភាព ឆ្នាំនេះផលត្រីទឹកសាបកើន៤០ភាគរយ បើធៀប២០២១-២០២២)
× ភ្នំពេញ៖ ផលត្រីនេសាទដាយត្រីនៅរាជធានីភ្នំពេញ និងខេត្តកណ្ដាល ចាប់ពីថ្ងៃទី២៩ខែធ្នូ ដល់ថ្ងៃទី២ ខែមករាឆ្នាំ២០២៣ ប្រមូលបានសរុប ១៤៨១តោន។ បរិមាណនេះ កើន៤០ភាគរយ បើធៀបនឹងផលត្រីទឹកសាប ក្នុងឆ្នាំ២០២១-២០២២។
ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងរយៈពេល៥ថ្ងៃ ចាប់ពីថ្ងៃទី២៩ខែធ្នូ ដល់ថ្ងៃទី២ ខែមករាឆ្នាំ២០២៣ ផលត្រីនេសាទដាយត្រីនៅភ្នំពេញ និងខេត្តកណ្ដាល ប្រមូលបាន ១៤៨១តោន។ ទិន្នផលនេះ មានការកើនឡើង ៤០ភាគរយ បើធៀបនឹងឆ្នាំ២០២១-២០២២ ផលត្រីបានត្រឹម ៨៩០តោនប៉ុណ្ណោះ។
រូបភាពដោយ ក្រសួងកសិកម្ម រុក្ខាប្រមាញ់ និងនេសាទ
ចំពោះប្រភេទត្រីដែលប្រមូលបានរួមមាន ត្រីរៀល ៤៥ភាគរយ, ស្លឹកឫស្សី៣០ភាគរយ, ខ្នងវែង៥ភាគរយ, កញ្រ្ជូក៣ភាគរយ, ច្រកែង២ភាគរយ, ឈ្វាត៥ភាគរយ និងត្រីចម្រុះ១០ភាគរយ។ ដោយឡែក ពលរដ្ឋមកទិញត្រីធ្វើប្រហុក ផ្អក ត្រីឆ្អើរ និងទឹកត្រី មានប្រហែល៨ពាន់នាក់ ដោយ៩០ភាគរយជាអ្នកមកពីបណ្ដាខេត្ត។
កើនឡើងផលនេសាទនេះ ក្រសួងកសិកម្ម បញ្ជាក់ថា បណ្ដាលមកពីការទប់ស្កាត់នូវបទល្មើសខុសច្បាប់ក្នុងបឹងទន្លេសាប ប្រកបដោយប្រសិទ្ធភាព និងមានការចូលរួមសហការការពារថែរក្សាចំនួនត្រីនៅក្នុងទឹកសាបពីគ្រប់ភាគីពាក់ព័ន្ធ។ លើសពីនេះក្រសួងកសិកម្ម រុក្ខាប្រមាញ់ និងនេសាទ នឹងបន្តអនុវត្តច្បាប់យ៉ាងម៉ឺងម៉ាត់បំផុតចំពោះបទល្មើសជាក់ស្ដែង និងបទល្មើសខុសច្បាប់គ្រប់ទម្រង់៕
Tag:
រដូវត្រីត្រូវ
ផលនេសាទ
ត្រីទឹកសាប
© រក្សាសិទ្ធិដោយ thmeythmey.com