ក្រុងស្ទឹងសែន, កំពង់ធំ៖ នៅ​មណ្ឌលសុខភាពមានបុគ្គលិកសរុប៩នាក់ ក្នុងនោះស្រីមានចំនួន៨នាក់។ សម្រាប់ ចំនួនគ្រូពេទ្យដែលកំពុងបម្រើការងារនៅទីនេះ គឺគ្រប់គ្រាន់ និងអាចអនុញ្ញាតឱ្យការ​បែងចែកការងារប្រចាំការទាំងថ្ងៃ​និងយប់ បានដោយងាយស្រួលផងដែរ។
 

​អ្នកស្រី ឡុង សនិកា ប្រធានមណ្ឌលសុខភាពស្រយ៉ូវ បានឱ្យដឹងថា ​មណ្ឌលសុខភាពស្រយ៉ូវ មានផ្ដល់សេវាសុខភាពបឋមជូនប្រជាពលរដ្ឋទូទៅ ចាស់ជរា កុមារ ស្ត្រីមានផ្ទៃពោះ និងជនមានពិការភាពជាដើម។ អ្នកគ្រូពេទ្យ ឡុង សនិកា បានបញ្ជាក់ថា ៖«គ្រូពេទ្យនៅមណ្ឌលសុខភាពគ្រប់គ្រាន់ដើម្បីផ្ដល់សេវាជូនប្រជាពលរដ្ឋ និងបែងចែកវេនប្រចាំការទាំងវេនយប់ទាំងវេនថ្ងៃ។

បែងចែកប្រចាំការ ២៤ម៉ោងលើ ២៤ម៉ោង ចាប់ពីថ្ងៃចន្ទ ដល់ថ្ងៃអាទិត្យ»។

 

ប្រធានមណ្ឌលរូបនេះ បានបញ្ជាក់ថា ក្នុងមួយខែៗមានប្រជាពលរដ្ឋមកទទួលសេវាពិនិត្យនិងថែទាំសុខភាពចន្លោះ ៤៥០ ទៅ ៥០០នាក់ ខណៈនៅមុនការរាតត្បាតនៃជំងឺកូវីដ-១៩ មណ្ឌលផ្តល់ការពិនិត្យសុខភាពដល់ពលរដ្ឋប្រមាណ៦០០នាក់។
 

ដ្បិតថា ចំនួនពលរដ្ឋដែល​មករកសេវាសុខភាពធ្លាក់ចុះ ប៉ុន្តែសម្រាប់អ្នកស្រី ឡុង សនិកាវាជាសញ្ញាល្អមួយដែលថា ពលរដ្ឋមានសុខភាពល្អ មិនសូវឈឺថ្កាត់ និងការរស់នៅរបស់ពលរដ្ឋមានអនាម័យល្អជាងមុន។

 

​នៅក្នុងឆ្នាំ២០២៣នេះ អ្នកគ្រូពេទ្យ សនិកា នៅតែបន្តតាំងចិត្តខ្ពស់ ក្នុងការផ្ដល់សេវាពិនិត្យ និងថែទាំសុខភាព ជូនពលរដ្ឋឱ្យមានប្រសិទិ្ធភាពកាន់តែប្រសើរថែមទៀត៕
 

​អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ