ជាតិ
សេដ្ឋកិច្ច
អ្នកមានប្រាក់បៀវត្សត្រឹម ១លាន៥សែនរៀល មិនជាប់ពន្ធឡើយ! រូបតំណាង៖ បុគ្គលិករបស់ក្រុមហ៊ុនមួយកន្លែងនៅរាជធានីកំពុងបំពេញការងារប្រចាំថ្ងៃរៀងៗខ្លួន នាថ្ងៃទី៥មករា ឆ្នាំ២០២២
× ប្រាក់បៀវត្សទាបបំផុតដែលជាប់ពន្ធ៥ភាគរយក្នុងចំនួនលើស ១លាន៣សែនរៀល ត្រូវបានដំឡើងដល់លើសពី ១លាន៥សែនរៀល។ នេះជាការបន្ធូរបន្ថយរបស់រដ្ឋាភិបាលលើប្រាក់បៀវត្សដែលត្រូវអនុវត្តចាប់ពីមករា ឆ្នាំ២០២៣តទៅ។
ពលរដ្ឋដែលទទួលបានប្រាក់បៀវត្សលើសពី១លាន៥សែនរៀលទើបជាប់ពន្ធ។ មានន័យថា អ្នកដែលមានប្រាក់បៀវត្សត្រឹម១លាន៥សែនរៀល គឺមិនជាប់ពន្ធឡើយ។ នេះបើយោងតាមសេចក្តីណែនាំស្តីពី ការអនុវត្តអត្រាពន្ធលើប្រាក់បៀវត្សថ្មីរបស់ក្រសួងសេដ្ឋកិច្ច និងហិរញ្ញវត្ថុ កាលពីឆ្នាំចុងឆ្នាំ២០២២។
ក្រសួងសេដ្ឋកិច្ចបន្តរៀបរាប់ថា សម្រាប់ពលរដ្ឋដែលមានបៀវត្សលើសពី ២លានរៀលដល់ ៨លាន៥សែនរៀលត្រូវជាប់ពន្ធ១០ភាគរយ។ អ្នកដែលមានប្រាក់បៀវត្សលើសពី ៨លាន៥សែន ដល់ ១២លាន៥សែន រៀល ត្រូវជាប់ពន្ធ១៥ភាគរយ ហើយអ្នកដែលមានបៀវត្សលើសពី១២លាន៥សែនរៀល ត្រូវជាប់អត្រាពន្ធ២០ភាគរយ។
លោក ផៃ ស៊ីផាន ជាអ្នកនាំពាក្យរដ្ឋាភិបាលបានប្រាប់សារព័ត៌មានថ្មីៗថា ការអនុគ្រោះបន្ធូរបន្ថយពន្ធលើប្រាក់បៀវត្សរបស់រដ្ឋាភិបាលនាពេលនេះ គឺការចូលរួមកាត់បន្ថយភាពក្រីក្រ និងជួយសម្រួលដល់អ្នកដែលមានចំណូលតិច ។
គិតមកទល់បច្ចុប្បន្ន កម្ពុជាបានធ្វើវិសោធនកម្មច្បាប់ទាក់ទងនឹងប្រាក់បៀវត្សអប្បបរមាដែលត្រូវជាប់ពន្ធ ចំនួន៥លើករួចមកហើយ។ លើកទីមួយ៖ ចំនួនប្រាក់បៀវត្សរួចពន្ធ៥០ម៉ឺនរៀល ត្រូវបានកែមក៨០ម៉ឺនរៀលរួចពន្ធនៅឆ្នាំ២០១៥។ លើកទីពីរ៖ ដំឡើងដល់១លានរៀលនៅក្នុងឆ្នាំ២០១៧, លើកទីបី៖ ដំឡើងដល់១លាន២សែនរៀលក្នុងឆ្នាំ២០១៨, លើកទីបួន៖ ដំឡើងដល់១លាន៣សែនរៀលក្នុងឆ្នាំ២០២០។ សម្រាប់លើកទីប្រាំ៖ ពន្ធប្រាក់បៀវត្សនេះត្រូវបានដំឡើងលើសពី១លាន៥សែនទើបជាប់ពន្ធ ដែលត្រូវបានអនុវត្តចាប់ពីខែមករា ឆ្នាំ២០២៣ តទៅ៕
© រក្សាសិទ្ធិដោយ thmeythmey.com