ជាតិ
យុវជនសកម្ម សេវាល្អ
ពោធិ៍សាត់៖ មេឃុំអូរសណ្ដាន់ថា ការផ្ដល់សេវារដ្ឋបាលដ៏ល្អជូនពលរដ្ឋ ជាកាតព្វកិច្ចរបស់អាជ្ញាធរ
×
ដោយ៖ បុត្រ លក្ខិណា(យុវជនឃុំអន្លង់ត្នោត)
ពោធិ៍សាត់៖ ឃុំអូរសណ្ដាន់មានផ្ដល់សេវាជាច្រើនដូចជា ធ្វើអត្រានុកូលដ្ឋាន សំបុត្រកំណើត សំបុត្រមរណភាព ការវាស់វែងដីធ្លី និងចុះសំបុត្រអាពាហ៍ពិពាហ៍ជាដើម។ល។ បើតាមលោក ម៉ម ធន មេឃុំអូរសណ្ដាន់ ការផ្ដល់សេវាសាធារណៈជូនពលរដ្ឋ គឺជាកាតព្វកិច្ចរបស់អាជ្ញាធរនៅក្នុងមូលដ្ឋាន។
លោក ម៉ម ធន មេឃុំអូសណ្តាន់ បានឱ្យដឹងថា នៅឆ្នាំ២០២១-២០២២ ការផ្ដល់សេវាសាធារណៈជូនពលរដ្ឋ មានពេលខ្លះក៏ប្រសើរ ពេលខ្លះក៏មិនបានល្អ ព្រោះប្រជាពលរដ្ឋខ្លះពុំទាន់យល់ច្បាស់ពី ឯកសារពាក់ព័ន្ធដែលតម្រូវសម្រាប់ការរៀបចំឯកសារ។ ប៉ុន្តែភាគច្រើនពលរដ្ឋ គឺមានការយល់យល់ និងនៅរង់ចាំទទួលសេវាតាមលំដាប់លំដោយនៅពេលដែលពួកគេមកទទួលសេវាពីរដ្ឋបាលឃុំ។
លោក ម៉ម ធន មេឃុំអូរសណ្ដាន់
ដោយសង្កេតឃើញបែបនេះ អាជ្ញាធរឃុំបានស្នើសុំដាក់ជំនួយការចំនួន ២នាក់ទៀត ដើម្បីជួយសម្រួលដល់ការផ្ដល់សេវាសាធារណៈ ជូនពលរដ្ឋឱ្យបានឆាប់រហ័សជាងមុន។ ជុំវិញការចុះបញ្ជីស្មាម ធ្វើអត្រានុកូលដ្ឋានទាំង៣ មានសំបុត្រកំណើត សំបុត្រមរណភាព និងសំុបុត្រអាពាហ៌ពិពាហ៌ រួមទាំងធ្វើឯកសារផ្សេងៗទៀត។ លោក ម៉ម ធន បញ្ជាក់ថា៖« ពួកខ្ញុំធ្វើគ្មានពេលលស់មួយថ្ងៃទេ ចាប់ពីថ្ងៃចន្ទ ដល់អាទិត្យ ប្រសិនបើមានតម្រូវការចាំបាច់ របស់ប្រជាពលរដ្ឋ ពិសេសកម្មកររោងចក្រ»។
មេឃុំរូបនេះបានបន្តថា ប្រជាពលរដ្ឋដែលនៅក្នុងឃុំ មកធ្វើឯកសារនៅថ្ងៃចន្ទ ដល់ថ្ងៃសុក្រ ។ រីឯពលរដ្ឋដែលទៅធ្វើការតាមរោងចក្រ ឬទៅធ្វើការនៅតាមបណ្ដាខេត្តឆ្ងាយៗ គឺអាចមកធ្វើនៅថ្ងៃសៅរ៍-អាទិត្យ ព្រោះនៅឃុំមានក្រុមងារប្រចាំការជារៀងរាល់ថ្ងៃ។ «ខ្ញុំបានរៀបចំផែនការនេះ ដើម្បីជួយដល់ពលរដ្ឋក្នុងឃុំ អាចមកទទួលសេវាគ្រប់ៗគ្នា ជៀសវាងការចំណាយពេល ការចំណាយសេវាក្រៅផែនការច្រើន ឬសេវាឯកជន ទើបខ្ញុំរៀបចំឡើងយ៉ាងយកចិត្តទុកដាក់»។ នេះបើតាមលោក ម៉ម ធន មេឃុំអូរសណ្ដាន់ បានលើកឡើង ដោយបានបន្ថែមថា ចំពោះការធ្វើឯកសារខ្លះ មិនមានគិតកម្រៃសេវានោះទេ ហើយឯកសារខ្លះ មានគិតកម្រៃទៅតាមតម្លៃ ដែលបានបិទនៅលើក្ដារខៀន។ ប៉ុន្តែបើពលរដ្ឋ ឱ្យកម្រៃតាមបនោសញ្ចេតនា អ្នកផ្តល់សេវាអាចទទួល តែមិនកំណត់ទេ។
ជាមួយគ្នានេះ លោក ម៉ម ធន បានសំណូមពរឱ្យប្រជាពលរដ្ឋនៅក្នុងឃុំអូរសណ្ដាន់ ជជែកគ្នាដោយបើកចំហត្រង់ទៅត្រង់មក ប្រសិនបើមានរឿងអ្វីមិនពេញចិត្ត ដើម្បីងាយស្រួលដោះស្រាយរាល់បញ្ហាដែលពួកគេជួបប្រទះ ជៀសវាងការនិយាយតៗគ្នា។ លោកបន្តថា ប្រជាពលរដ្ឋដែលរស់នៅក្នុងឃុំមានសរុប ២ ០១២គ្រួសារ ដោយមានពលរដ្ឋជាង ៦ ៨៧៦នាក់៕
(អត្ថបទនេះ គឺជាស្នាដៃរបស់ក្រុមយុវជន និងត្រូវបានរៀបរៀងឡើង ក្រោមជំនួយហិរញ្ញវត្ថុរបស់សហភាពអឺរ៉ុប និងទីភ្នាក់ងារសហប្រតិបត្តិការអភិវឌ្ឍអន្តរជាតិស៊ុយអ៊ែត តាមរយៈអង្គការតម្លាភាពកម្ពុជា និងអង្គការអាក់សិនអេតកម្ពុជា។ រាល់ខ្លឹមសារនៅក្នុងអត្ថបទនេះ គឺជាការទទួលខុសត្រូវរបស់ស្មេរ ឬផលិតករ ហើយមិនឆ្លុះបញ្ចាំងអំពីទស្សនៈរបស់សហភាពអឺរ៉ុប និងទីភ្នាក់ងារសហប្រតិបត្តិការ អភិវឌ្ឍអន្តរជាតិស៊ុយអ៊ែតនោះទេ)
Tag:
ផ្ដល់សេវាសាធារណ
ឃុំអូរសណ្ដាន់
ពោធិ៍សាត់
© រក្សាសិទ្ធិដោយ thmeythmey.com