កញ្ញា ហ៊ុយ សុភា ជាយុវតីមួយរូបរស់នៅភូមិកំពង់លើ ឃុំក្បាលត្រាច ខេត្តពោធិ៍សាត់ ដែលបានលើកឡើងពីកង្វល់របស់ខ្លួន ជុំវិញបញ្ហារំលោភបំពានផ្លូវភេទលើស្ត្រី និងកុមារនេះ។ សម្រាប់យុវតី វ័យ១៨ឆ្នាំរូបនេះ បញ្ហានេះធ្វើឱ្យ​ខ្លួនមិនមានសិទ្ធិសេរីភាពពេញលេញក្នុងការធ្វើដំណើរ ឬមានអារម្មណ៍ខ្លាចរអា រាល់ពេលធ្វើដំណើរពេលយប់។ «ខ្ញុំខ្លាចតើ​! ខ្លាចវា(ករណីរំលោភ)កើតឡើង​ ដែលបង្កដោយសារពួកបែកថ្នាំបែកអី។ ហើយម្ដុំនេះសុទ្ធតែស្រីៗ។ ពេលយប់មិនទាន់ទេ ចូលផ្ទះអស់ហើយ»។ នេះជាការលើកឡើងរបស់ កញ្ញា ហ៊ុយ សុភា ជុំវិញកង្វល់ពីការរំលោភបំពានលើស្ត្រី និងកុមារីក្នុងមូលដ្ឋានខ្លួន។ 

 

 

កញ្ញា ហ៊ុយ សុភា ស្នើដល់អាជ្ញាធរ និងសមត្ថកិច្ចខ្លួន បង្កើនការយកចិត្តទុកដាក់ ក្នុងការចុះយាមល្បាត ឱ្យបានញឹកញាប់ និងទៅដល់តំបន់ដែលប្រឈម នឹងហានិភ័យ ដូចជាទីងងឹតគ្មានភ្លើងបំភ្លឺផ្លូវ ឬកន្លែងស្ងាត់ជាដើម និងការភ្លើងបំភ្លឺនៅតាមទីតាំងប្រឈមទាំងនោះ។ 

 

ជាមួយគ្នានេះ អ្នកស្រី ឈឺន ឈុន ដែលជាអាណាព្យាបាលរបស់ កញ្ញា សុភា ក៏បង្ហាញក្ដីកង្វល់របស់ខ្លួនផងដែរ ជុំវិញបញ្ហាការរំលោភផ្លូវភេទលើស្ត្រី និងកុមារីក្នុងមូលដ្ឋានខ្លួន។ ស្របនឹងក្ដីកង្វល់នេះ អ្នកស្រីថា កន្លងមកខ្លួនមិនដែលបង្ហាញក្ដីកង្វល់ខ្លួនទៅកាន់អាជ្ញាធរមានសមត្ថកិច្ចបានដឹងឡើយ ប៉ុន្តែអ្នកស្រីតែទូន្មានកូនៗរបស់ខ្លួន ឱ្យមានការប្រុងប្រយ័ត្ន និងមិនឱ្យធ្វើដំណើរពេលយប់តែម្នាក់ឯងឡើយ។ 

 

ជុំវិញបញ្ហាការរំលោភបំពានផ្លូវភេទលើស្ត្រី និងកុមារី នៅក្នុងភូមិ-ឃុំ ក្បាលត្រាចនេះ គឺជាការយកចិត្តទុកដាក់មួយ ក្នុងការរក្សាសណ្ដាប់ធ្នាប់ សន្តិសុខ និងសុវត្ថិភាព សម្រាប់ពលរដ្ឋ ជាពិសេសស្រ្តី និងកុមារី ពីកម្លាំងសមត្ថកិច្ច។ 

 

​លោក ម៉ៅ រដ្ឋា មេប៉ុស្ដិ៍នគរបាលឃុំក្បាលត្រាច ​បញ្ជាក់ថា ក្នុងឃុំធ្លាប់មានករណីចាប់ប៉ុនប៉ង​រំលោភលើក្មេងស្រីមិនបានសម្រេចមួយករណី ដែលកើតឡើង កាលពីដើមឆ្នាំ២០២២។  ​លោកពន្យល់បន្ថែថា៖ «រយៈពេល៣ឆ្នាំដែលឆ្នាំមកកាន់មកនេះ បើប្រៀបធៀបនឹងពីមុនៗ ឃើញថាមានការថយចុះ។ ពាក់ព័ន្ធនឹងបទល្មើសរំលោភ ដោយសារតែមានមុខសញ្ញាប្រើប្រាស់គ្រឿងញៀន។ ដូច្នេះមួយរយៈចុងក្រោយនេះ ខាងប៉ុស្ដិ៍បានចុះចាប់ បង្ក្រាបមុខសញ្ញាប្រើប្រាស់គ្រឿងញៀនទៅ

ហើយបទល្មើសហ្នឹង(រំលោភ)ហ្នឹងក៏វាថយ»។ 

 

ក្រៅពីការចុះបង្ក្រាបមុខសញ្ញាបទល្មើសគ្រឿងញៀនដែលបង្កជាការរំលោភបំពានកុមារី និងស្ត្រីនេះ លោកមេប៉ុស្ដិ៍បញ្ជាក់ថា សមត្ថកិច្ចក៏បានចុះផ្សព្វផ្សាយដល់ពលរដ្ឋឱ្យយកចិត្តទុកដាក់បន្ថែមទៀតដែរលើកូនៗរបស់ពួកគេ ជុំវិញការធ្វើដំណើរទៅកាន់ទីកន្លែងស្ងាត់ផ្សេង​ៗ​​។ បើទោះបីបច្ចុប្បន្នស្ថានភាពការរំលោភបំពានផ្លូវភេទ មិនមានការកើតឡើង ក៏សមត្ថកិច្ចនៅតែបារម្ភ និងមានសកម្មភាពចុះផ្សព្វផ្សាយ បង្ក្រាប និងតាមដានជាប់ជាប្រចាំដែរដើម្បីបង្ការកុំឱ្យកើតមានឡើង។ ជាមួយគ្នានេះ ប្រជាពលរដ្ឋគ្រប់រូប តាមភូមិនីមួយៗ មានលេខទូរស័ព្ទសមត្ថកិច្ចគ្រប់ដៃ ដើម្បីទាក់ទង ពេលមានករណីកើតឡើង ឬរាយការណ៍ផ្សេងៗជាដើម៕ 

 

អានអត្ថបទពាក់ព័ន្ធផ្សេងទៀត៖ យុវជនសកម្មសេវាល្អ