បើតាមទីភ្នាក់ងារសារព័ត៌មាន Mizan របស់អ៊ីរ៉ង់ លោក Alireza Akbari ដែលជាអតីតអនុរដ្ឋមន្រ្តីការពារជាតិអ៊ីរ៉ង់ ត្រូវបានប្រហារជីវិតក្រោមការចោទប្រកាន់ពីបទធ្វើចារកម្មឱ្យចក្រភពអង់គ្លេស។ ក្រោយការប្រហារជីវិតនេះ នាយករដ្ឋមន្រ្តីអង់គ្លេស​បាន​និយាយ​ថា មិនគួរមានការ​កាត់ទោស​ប្រហារ​ជីវិត​ឡើយ។

 

«ខ្ញុំរន្ធត់ចិត្តចំពោះការប្រហារជីវិតពលរដ្ឋអង់គ្លេស-អ៊ីរ៉ង់លោក Alireza Akbari នៅអ៊ីរ៉ង់»។ នាយករដ្ឋមន្ត្រីចក្រភពអង់គ្លេសលោក Rishi Sunak លើកឡើងបែបនេះលើបណ្ដាញសង្គម Twitter រួចបន្តថា នេះជា​ទង្វើ​ដ៏​កំសាកដែល​អនុវត្ត​ដោយ​របប​ព្រៃផ្សៃ​ដោយ​មិន​គោរព​សិទ្ធិមនុស្ស​របស់​ប្រជាជន​ខ្លួន។

 

ឯរដ្ឋមន្ត្រីការបរទេសអង់គ្លេស លោក James Cleverly ក៏បានសរសេរនៅលើ Twitter ផងដែរថា ទង្វើដ៏ព្រៃផ្សៃនេះ សមនឹងទទួលបានការថ្កោលទោសក្នុងលក្ខខណ្ឌដ៏ខ្លាំងក្លាបំផុត។

 

ក្រោយមកចក្រភពអង់គ្លេសបញ្ជាក់ថា ខ្លួនបានដាក់ការបង្កកទ្រព្យសម្បត្តិ និងការហាមឃាត់ការ​ធ្វើ​ដំណើរលើអគ្គរដ្ឋអាជ្ញាអ៊ីរ៉ង់លោក Mohammad Jafar Montazeri ដោយសារតែលោក​ជាប់​ពាក់ព័ន្ធ និងទទួលខុសត្រូវចំពោះការចូលរួមផ្តល់ការគាំទ្រ និងការលើកកម្ពស់​ការ​រំលោភ​សិទ្ធិ​មនុស្ស​ធ្ងន់​ធ្ងរ​នៅ​ក្នុងអ៊ីរ៉ង់៕