ប្រធានាធិបតីតៃវ៉ាន់លោកស្រី Tsai Ing-wen បានលាលែងពីតំណែងជាប្រធានគណបក្សប្រជាធិបតេយ្យជឿនលឿន (DPP) ដែលកំពុងកាន់អំណាចបន្ទាប់ពីចាញ់ការបោះឆ្នោតថ្នាក់តំបន់នៅថ្ងៃទី២៦ ខែវិច្ឆិកា។ ម្យ៉ាងលោកស្រី Tsai ក៏មិនអាចកាន់តំណែងនៅអាណត្តិទីបី បានបន្តទៀតដែរ ដោយសារតែការហាមឃាត់រដ្ឋធម្មនុញ្ញរបស់តៃវ៉ាន់។

 

ក្រោយតំណែងប្រធានបក្សនៅទំនេរជាច្រើនខែ អនុប្រធានាធិបតីតៃវ៉ាន់ លោក William Lai នៅថ្ងៃទី១៥ ខែមករា ត្រូវបានបោះឆ្នោតជ្រើសជាប្រធានបក្សប្រជាធិបតេយ្យជឿនលឿន។ អគ្គលេខាធិការបក្សស្តីទីរបស់បក្សកាន់អំណាច Sidney Lin បានប្រាប់អ្នកសារព័ត៌មានថា លោក William ត្រូវបានជ្រើសជាប្រធានបក្ស ហើយលោកនឹងចូលកាន់តំណែងនេះ នៅថ្ងៃទី១៨ ខែមករា ខាងមុខ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។​

 

ក្នុងសេចក្តីថ្លែងការណ៍មួយ បន្ទាប់ពីជាប់ជាប្រធានបក្សថ្មី លោក William បានសន្យាកសាងទំនុកចិត្តសាធារណៈ រួមទាំងការពារតៃវ៉ាន់ និងលើកតម្កើងប្រជាធិបតេយ្យ សនិ្តភាព វិបុលភាពនៅក្នុងបរិបទអន្តរជាតិដ៏ស្មុគស្មុញ។ បើទោះលោក William មិនបានលើកឡើងពីការចូលរួមក្នុងការបោះឆ្នោតរើសប្រធានាធិបតីនៅក្នុងឆ្នាំ ២០២៤ខាងមុខ ប៉ុន្តែតំណែងមួយនេះ ជាការត្រួតត្រួយផ្លូវសម្រាប់រូបលោក ក្នុងការប្រជែងតំណែងប្រធានាធិបតី។ 

 

សូមបញ្ជាក់ថា លោក William ធ្លាប់ធ្វើជានាយករដ្ឋមន្រ្តីតៃវ៉ាន់, ជាអភិបាលក្រុង Tainan ចាប់ពីឆ្នាំ២០១០ ដល់២០១៧ និងជាសមាជិកសភានៅចន្លោះឆ្នាំ១៩៩៩ ដល់ឆ្នាំ២០១០ មុននឹងក្លាយជាអនុប្រធានាធិបតីនៅក្នុងឆ្នាំ២០២០៕