អន្តរជាតិ
រុស្ស៊ីថា រថក្រោះដែលអង់គ្លេសបញ្ជូនឱ្យអ៊ុយក្រែន នឹងត្រូវដុតចោល
× អ្នកនាំពាក្យវិមានក្រេមឡាំង Dmitry Peskov នៅថ្ងៃទី១៦ ខែមករា បានព្រមានថា រថក្រោះដែលចក្រភពអង់គ្លេស គ្រោងបញ្ជូនទៅអ៊ុយក្រែន នឹងត្រូវដុតបំផ្លាញ។ លោកក៏គំរាមលោកខាងលិចថា ការផ្គត់ផ្គង់អាវុធទំនើបៗបន្ថែមទៀតដល់អ៊ុយក្រែននឹងមិនផ្លាស់ប្តូរលទ្ធផលនៃសង្គ្រាមនោះទេ។
តាមការស្នើសុំរបស់អ៊ុយក្រែន ចក្រភពអង់គ្លេស កាលពីថ្ងៃទី១៤ ខែមករាបានប្រកាសបញ្ជូនរថក្រោះប្រយុទ្ធ Challenger 2 ចំនួន១៤គ្រឿង ក៏ដូចជាការផ្គត់ផ្គង់កាំភ្លើងធំកម្រិតខ្ពស់ផ្សេងទៀតនៅក្នុងប៉ុន្មានសប្តាហ៍ខាងមុខនេះឱ្យអ៊ុយក្រែន។ ប្រទេសលោកខាងលិចឯទៀត ក៏ត្រៀមបញ្ជូនរថក្រោះប្រភេទផ្សេងៗឱ្យទីក្រុងកៀវដែរ។
ដូចរាល់ដង រុស្ស៊ីប្រតិកម្មភ្លាមៗចំពោះការបន្តផ្ដល់ជំនួយយោធាឥតឈប់ឈររបស់លោកខាងលិចសម្រាប់អ៊ុយក្រែន។
«ពួកគេកំពុងប្រើប្រាស់ប្រទេសនេះ (អ៊ុយក្រែន) ជាឧបករណ៍មួយដើម្បីសម្រេចបាននូវ គោលដៅប្រឆាំងរុស្ស៊ីរបស់ពួកគេ»។ អ្នកនាំពាក្យវិមានក្រេមឡាំងលោក Dmitry Peskov បញ្ជាក់បែបនេះ រួចគំរាមថា រថក្រោះទាំងនោះនឹងត្រូវដុតឆេះដូចរថក្រោះមុនៗដែរ។ អ្នកនាំពាក្យរូបនេះអះអាងថា ការផ្គត់ផ្គង់ថ្មីៗពីអង់គ្លេស និងប៉ូឡូញ នឹងមិនផ្លាស់ប្តូរស្ថានភាពសង្គ្រាម តែផ្ទុយទៅវិញវានឹងនាំមកបញ្ហាកាន់តែច្រើនសម្រាប់អ៊ុយក្រែន។
ជុំវិញរឿងនេះ អ្នកអធិប្បាយទូរទស្សន៍រដ្ឋរុស្ស៊ី Rossiya 1 លោក Vladimir Solovyev ក៏ចេញមុខធ្វើប្រតិកម្ម ដោយនិយាយថា ប្រទេសលោកខាងលិចណាដែលផ្គត់ផ្គង់អាវុធទំនើបជាងនេះទៅឱ្យអ៊ុយក្រែនគួរតែត្រូវបានចាត់ទុកថាជាគោលដៅស្របច្បាប់សម្រាប់រុស្ស៊ី។ លោក Solovyev បានប្រាប់កម្មវិធីជជែកកម្សាន្តនៅរាត្រីថ្ងៃទី១៥ ខែមករាថា អង់គ្លេសបានចូលក្នុងសង្រ្គាមហើយហើយលោកចាត់ទុកអង់គ្លេសឥឡូវនេះជាគោលដៅស្របច្បាប់សម្រាប់រុស្ស៊ី៕
© រក្សាសិទ្ធិដោយ thmeythmey.com