លោក វ៉ី សំណាង បានលើកឡើងថា ក្នុងចំណោមរោងចក្រ សហគ្រាស និងគ្រឹះស្ថានទាំងនេះ មានវិស័យវាយនភ័ណ្ឌកាត់ដេរសម្លៀកបំពាក់ និងស្បែកជើងចំនួន ១៨៩កន្លែង ដោយមានកម្មករនិយោជិតជាង ១៤ម៉ឺននាក់ ក្នុងនោះស្រីមានជាង ១១ម៉ឺននាក់។
 

អភិបាលខេត្តរូបនេះ បានបន្តថា ចំពោះរោងចក្រធុនធំមានចំនួន ២២៩មូលដ្ឋាន ដែលប្រើប្រាស់កម្លាំងពលកម្មជាង ១៣ម៉ឺននាក់ ក្នុងនោះស្រីជាង ១០ម៉ឺននាក់ និងប្រើប្រាស់ទុនវិនិយោគសរុបជិត ១៧១៥លានដុល្លារអាម៉េរិក។ សម្រាប់រោងចក្រធុនតូច និងមធ្យម និងសិប្បកម្ម មានចំនួន ១ ១៣០មូលដ្ឋាន ប្រើប្រាស់កម្លាំងពលកម្មជិត ១៥ពាន់នាក់ ក្នុងនោះស្រី ៧៧០០នាក់ ដែលប្រើទុនវិនិយោគជាង ២៦លានដុល្លារអាម៉េរិក។
 

លោក វ៉ី សំណាង បានបញ្ជាក់យ៉ាងដូច្នេះ៖« ក្នុងខេត្តកំពង់ស្ពឺ បើសិនជាគ្មានរោងចក្រសហគ្រាស ពលរដ្ឋច្រើននាក់ ប្រឈមនឹងកង្វះអត់មានការងារធ្វើ អ៊ឹចឹងបើអត់មានការងារពួកគាត់អត់មានចំណូលទេ ដូច្នេះមិនអាចកាត់បន្ថយភាពក្រីក្របានទេ»។
 

ខេត្តកំពង់ស្ពឺ មានផ្ទែដីសរុប ៦ ៩៦៥,៦៣ គីឡូម៉ែត្រការ៉េ ប្រជាជន ៩១៧ ២៧៧នាក់។ ទំហំសេដ្ឋកិច្ចមានប្រមាណ ១៦១២លានដុល្លារ ស្មើនឹង ៥,៩៥ភាគរយ នៃសេដ្ឋកិច្ចជាតិ។ ក្នុងឆ្នាំ២០២១ ប្រាក់ចំណូលបានជាមធ្យមមនុស្សម្នាក់ៗមាន ១៨៣៤ដុល្លារ បើធៀបនឹងឆ្នាំ២០១៨ មានការកើនឡើង ២,៥៦ភាគរយ។ នេះបើតាមលោក វ៉ី សំណាង៕