ក្រសួងវប្បធម៌អំពាវនាវប្រជាជនខ្មែរ ផ្ដល់ក្ដីស្រឡាញ់ទៅគ្រួសារនិងជនរួមជាតិ ក្នុងថ្ងៃ១៤កុម្ភៈ

ជាតិ

ក្រសួងវប្បធម៌អំពាវនាវប្រជាជនខ្មែរ ផ្ដល់ក្ដីស្រឡាញ់ទៅគ្រួសារនិងជនរួមជាតិ ក្នុងថ្ងៃ១៤កុម្ភៈ

14, Feb 2023 , 7:59 am

រូបភាព

ដោយ: ប៉ូ សាគុន

ភ្នំពេញ៖ “ទិវានៃក្ដីស្រឡាញ់” នៅកម្ពុជា គួរជាឱកាសក្នុងការចែកចាយ និងធានានូវក្ដីស្រឡាញ់ប្រកបដោយភាពទូលំទូលាយ និងសន្ដានចិត្តស្មោះសរ ចំពោះមនុស្សដែលនៅជុំវិញខ្លួន និងសង្គមជាតិ។

តាមរយៈសេចក្ដីអំពាវនាវ ក្រសួងវប្បធម៌ និងវិចិត្រសិល្បៈ ថាការផ្ដល់ក្ដីស្រឡាញ់នោះ ក្រោមរូបភាព ការជួបជុំពិភាក្សាគ្នា ឬទទួលទានអាហាររួមគ្នា ដោយក្ដីសោមនស្សរីករាយ ការសរសេរលិខិតជូនពរ ការជូនអំណោយផ្សេងៗ ដើម្បីបញ្ជាក់ពីភាពកត្តញ្ញូតាធម៌ ក្ដីស្រឡាញ់ និងការយកចិត្តទុកដាក់របស់ខ្លួន ចំពោះអ្នកមានគុណ បុព្វការីជន ។ ជាពិសេសមនុស្សដែលខ្លួនស្រឡាញ់ និងជនរួមជាតិ ដូចជា ជនមានពិការភាព កុមារកំព្រា និងអ្នកដែលខ្សត់ខ្សោយជាងខ្លួនជាដើម។

ក្រសួងវប្បធម៌ និងវិចិត្រសិល្បៈ ក៏អំពាវនាវដល់មាតា បិតា អាណាព្យាបាល សមត្ថកិច្ចពាក់ព័ន្ធគ្រប់លំដាប់ថ្នាក់ ជាពិសេសយុវជន ចូលរួមផ្សព្វផ្សាយ អប់រំ និងក្រើនរំលឹកដល់បងប្អូន កូន ចៅ ក្នុងគោលដៅប្រើប្រាស់ “ទិវានៃក្ដីស្រឡាញ់” ថ្ងៃទី១៤កុម្ភៈ ឱ្យស្របតាមគន្លងប្រពៃណី ដ៏ត្រកាលរបស់ខ្មែរ ដើម្បីកិត្តិយស និងភាពថ្លៃថ្នូររបស់ខ្លួន និងគ្រួសារ ព្រមទាំងរួមចំណែកលើកកម្ពស់ កិត្យានុភាពនៃសង្គមជាតិ។

បើតាមក្រសួងវប្បធម៌ និងវិចិត្រសិល្បៈ ថ្ងៃទី១៤កុម្ភៈ ត្រូវបានមនុស្សមួយចំនួន ជាពិសេសគ្រិស្ដសាសនិកជន បានកំណត់ថាជា“ទិវានៃក្ដីស្រឡាញ់”។ បច្ចុប្បន្នទិវានេះ កំពុងជ្រៀតចូលក្នុងសង្គមកម្ពុជា ជាពិសេសក្នុងស្រទាប់យុវជន បណ្ដាលឱ្យមនុស្សមួយចំនួន ភ័ន្តច្រឡំ ដែលនាំឱ្យមានផលប៉ះពាល់ដល់វប្បធម៌ ទំនៀមទម្លាប់ និងប្រពៃណីជាតិទៀតផងដែរ។

ក្រសួងវប្បធម៌ បានណែនាំឱ្យប្រជាជន ពិសេសយុវជនកម្ពុជា ត្រូវសិក្សាឈ្វេងយល់ឱ្យស៊ីជម្រៅចំពោះវប្បធម៌ ប្រពៃណី ដែលជាមរតកដ៏ថ្លៃថ្លារបស់ដូនតា។ បន្ថែមពីនោះត្រូវសិក្សាឱ្យគ្រប់ជ្រុងជ្រោយពីខ្លឹមសារ និងឥទ្ធិពលនៃវប្បធម៌ ទំនៀមទម្លាប់ពីខាងក្រៅ ដើម្បីបន្ស៊ីចូលទៅក្នុងឥរិយាបថ និងបរិបទ នៃសង្គមរបស់ខ្លួន ក្នុងគោលដៅរក្សាឱ្យបាននូវអត្ថិភាព ជាប្រជាជាតិថ្លៃថ្នូរមួយ ដែលមានវ័យចំណាស់ រាប់ពាន់ឆ្នាំមកហើយ នៅទ្វីបអាស៊ី។

“ការរក្សាការពារ វប្បធម៌ ប្រពៃណីដ៏ថ្លៃថ្លារបស់ជាតិ ជាកាតព្វកិច្ចនៃយើងទាំងអស់គ្នា”៕