បើគ្មានការប្រែប្រួលទៀតទេ សម្តេច ហ៊ុន សែន នឹងជួបសំណេះសំណាល និងពិសារអាហារជាមួយគ្រួសារកីឡានៅថ្ងៃទី៣មេសា

ជាតិ

បើគ្មានការប្រែប្រួលទៀតទេ សម្តេច ហ៊ុន សែន នឹងជួបសំណេះសំណាល និងពិសារអាហារជាមួយគ្រួសារកីឡានៅថ្ងៃទី៣មេសា

03, Mar 2023 , 12:09 pm

រូបភាព

សម្តេចនាយករដ្ឋមន្ត្រី ហ៊ុន សែន ក្នុងពិធីជួបសំណេះសំណាលនិងអាហារសាមគ្គីជាមួយមហាគ្រួសារកីឡានៅកោះពេជ្រ កាលពីឆ្នាំ២០១៩

ដោយ: ទេព ពិទូរ្យ

សម្តេចនាយករដ្ឋមន្ត្រី ហ៊ុន សែន នឹងជួបសំណេះសំណាល និងពិសារអាហារសាមគ្គីជាមួយគ្រួសារកីឡានៅថ្ងៃទី៣ ខែមេសា ឆ្នាំ២០២៣ វិញ ដោយមុនដំបូងគ្រោងធ្វើនៅថ្ងៃទី៤ ខែមេសា។ ជំនួបលើកទី៦ នេះនឹងត្រូវធ្វើឡើងជាថ្មី ក្រោយអាក់ខានពីរឆ្នាំជាប់គ្នា ដោយសារជំងឺកូវីដ-១៩។

បើគ្មានការប្រែប្រួលអ្វីទៀតនោះទេ នៅថ្ងៃទី៣ ខែមេសា ឆ្នាំ២០២៣ ខាងមុខ សម្តេចនាយករដ្ឋមន្ត្រី ហ៊ុន សែន នឹងជួបសំណេះសំណាលនិងពិសារអាហារជាមួយថ្នាក់ដឹកនាំ គ្រូបង្វឹក អត្តពលិក និងអ្នកធ្វើការពាក់ព័ន្ធវិស័យកីឡាទាំងអស់នៅកម្ពុជា។ នេះសេចក្តីជូនដំណឹងរបស់គណៈកម្មាធិការជាតិអូឡាំពិកកម្ពុជា (NOCC) នៅព្រឹកថ្ងៃទី៣ ខែមីនា ជុំវិញការផ្លាស់ប្តូរថ្ងៃរៀបចំពិធីប្រចាំឆ្នាំនេះ ដែលដំបូងឡើយគ្រោងធ្វើនៅថ្ងៃទី៤ ខែមេសា ដូចឆ្នាំមុនៗ។

យ៉ាងណាក៏ដោយ NOCC នៅមិនទាន់បញ្ជាក់ទីតាំងផ្លូវការសម្រាប់ការជួបជុំរវាងក្រុមគ្រួសារកីឡាកម្ពុជាលើកទី៦ ជាមួយប្រមុខរដ្ឋាភិបាលនៅឡើយទេ។

ជំនួបប្រចាំឆ្នាំ ៥លើកកន្លងមក ធ្វើឡើងដើម្បីលើកទឹកចិត្តថ្នាក់ដឹកនាំ គ្រូបង្វឹក និងអត្តពលិក ដែលបានខិតខំប្រឹងប្រែងអភិវឌ្ឍន៍វិស័យកីឡា និងបានសាងស្នាដៃជូនជាតិលើឆាកអន្តរជាតិ។ កាលពីជំនួបលើកទី៥ ឆ្នាំ២០២០ ប្រមុខដឹកនាំរាជរដ្ឋាភិបាលកម្ពុជា បានផ្តល់ដំបូន្មាន និងមតិរិះគន់ស្ថាបនា និងបញ្ហាប្រឈមមួយចំនួន ដល់មន្ត្រី គ្រូបង្វឹក និងអត្តពលិកផងដែរ។

ដោយសារឆ្នាំ២០២៣ ជាឆ្នាំដែលកម្ពុជាត្រូវធ្វើម្ចាស់ផ្ទះកីឡាស៊ីហ្គេមជាលើកដំបូងរបស់ខ្លួនផង ដូច្នេះពិធីជួបជុំលើកទី៦ ទំនងមិនអាចអាក់ខានទៀតឡើយ។

កម្ពុជារៀបចំពិធីនេះ៥លើករួចមកហើយ ដោយលើកចុងក្រោយនៅឆ្នាំ២០២០។ ឆ្នាំ២០២១ និង២០២២ ត្រូវបានអាក់ខាន ដោយសារជំងឺកូវីដ-១៩ វាយលុកខ្លាំង៕