ថៃ គ្រោងនឹងរៀបចំការបោះឆ្នោតសភា នៅថ្ងៃទី៧ ខែឧសភាខាងមុខ។ ខណៈការបោះឆ្នោតជិតមកដល់ នាយករដ្ឋមន្រ្តីថៃ លោកប្រាយុទ្ធ ចន្ទអូចា ធ្លាប់បានលើកឡើងថា​ លោកនឹងរំលាយសភាចោល ដើម្បីឱ្យសមាជិករដ្ឋសភាត្រៀមខ្លួនសម្រាប់ការបោះឆ្នោតខាងមុខ។ យ៉ាងណាមិញ ប្រមុខរដ្ឋាភិបាលរូបនេះ មិនបានបញ្ជាក់ពីពេលវេលា ដែលត្រូវរំលាយសភាចោលឡើយ។​

 

តាមការបញ្ជាក់របស់រដ្ឋមន្រ្តីការិយាល័យនាយករដ្ឋមន្រ្តី លោក Thanakorn Wangboonkongchana សភាថៃនឹងរំលាយចោលនៅថ្ងៃទី២០ ខែមីនា ក្នុងអំឡុងពេលលោកកំពុងធ្វើដំណើរទៅចូលរួមក្នុងកិច្ចប្រជុំគណៈរដ្ឋមន្រ្តីប្រចាំសប្តាហ៍។ មិនតែប៉ុណ្ណោះ កិច្ចប្រជុំគណៈរដ្ឋមន្រ្តី ដែលលោកចូលរួមនោះ អាចជាកិច្ចប្រជុំចុងក្រោយ មុនពេលគណៈរដ្ឋមន្រ្តីបណ្តោះអាសន្ន រៀបចំឡើង។​

 

«នេះអាចជាកិច្ចប្រជុំគណៈរដ្ឋមន្រ្តី [ក្រោមអាជ្ញាធរពេញលេញរបស់រដ្ឋាភិបាល] ដូចរបាយការណ៍របស់សារព័ត៌មាន»។ រដ្ឋមន្រ្តីការិយាល័យនាយករដ្ឋមន្រ្តី បានបញ្ជាក់បែបនេះ នៅក្នុងថ្ងៃទី១៤ ខែមីនា។ 

 

គួររំឭកថា នៅសប្តាហ៍មុន ឧបនាយករដ្ឋមន្រ្តីថៃ លោក Wissanu Krea-ngam បានអះអាងថា បើទោះសភាត្រូវរំលាយក៏ដោយ លោកប្រាយុទ្ធនៅតែអាចផ្លាស់ប្តូរគណៈរដ្ឋមន្រ្តី ហើយរដ្ឋមន្រ្តីក៏មានសិទ្ធិលាលែងពីតំណែងដែរ៕