ខណៈសង្រ្គាមអ៊ុយក្រែននៅតែបន្ត លោក ឈីន កាង រដ្ឋមន្រ្តីការទូតចិន បាននិយាយទូរសព្ទជាមួយសមភាគីអ៊ុយក្រែន លោក Dmytro Kuleba លើស្ថានភាពសង្រ្គាម ក៏ដូចជាកិច្ចចរចាស្វែងរកសន្តិភាព។ 

 

«ចិនសង្ឃឹមថា ភាគីទាំងអស់នឹងរក្សាភាពស្ងៀមស្ងាត់ ហេតុផល និងរឹតត្បិត ហើយចាប់ផ្តើមកិច្ចចរចាសន្តិភាពឱ្យបានចាប់រហ័ស»។ លោក ឈីន កាង រដ្ឋមន្រ្តីការបរទេសចិន បានសង្កត់ធ្ងន់បែបនេះ នៅថ្ងៃទី១៦ ខែមីនា ដោយបន្តថា ភាគីទាំងពីរ នឹងមិនបិទទ្វារចំពោះច្រកចេញនយោបាយ។ 

 

តាមសេចក្តីថ្លែងការណ៍ក្រសួងការបរទេសចិន លោកឈីន បានបញ្ជាក់ផងដែរថា រដ្ឋាភិបាលក្រុងប៉េកាំងត្រៀមខ្លួនជាស្រេចដើម្បីធ្វើការជាមួយក្រុងកៀវ ដើម្បីលើកតម្កើងការអភិវឌ្ឍប្រកបដោយសន្តិភាព និងស្ថិរភាពរវាងប្រទេសទាំងពីរក្នុងរយៈពេលយូរ។ 

 

ចំណែករដ្ឋមន្រ្តីការបរទេសអ៊ុយក្រែនវិញ បានអះអាងថា ចិនមិនត្រឹមជាដៃគូដ៏សំខាន់សម្រាប់អ៊ុយក្រែនប៉ុណ្ណោះទេ ប៉ុន្តែមានតួនាទីដ៏សំខាន់នៅក្នុងកិច្ចការអន្តរជាតិ។ មិនតែប៉ុណ្ណោះ លោក Kuleba បានសន្យាគោរពគោលការណ៍ចិនតែមួយ និងអធិបតេយ្យចិន រួមទាំងចង់ពង្រឹងកិច្ចសហប្រតិបត្តិការទ្វេភាគីលើវិស័យជាច្រើន។ 

 

ក្នុងកិច្ចសន្ទនានេះ លោកឈីន បានបង្ហាញក្តីបារម្ភផងដែរថាជុំវិញការរីកសាយនៃជម្លោះ និងបន្តរក្សាកិច្ចចរចា មិនថាមានភាពលំបាក និងបញ្ហាប្រឈមអ្វីក៏ដោយ។ 

 

គួររំឭកថា កន្លងមក ចិនបានដាក់ចេញផែនការ ១២ចំណុច ទាក់ទិននឹងការដោះស្រាយជម្លោះនៅអ៊ុយក្រែន។ ក្នុងនោះ ចិនបានបញ្ជាក់ពីការរក្សាជំហរនៅកណ្តាល និងជំរុញឱ្យមានការគោរពអធិបតេយ្យប្រទេសនីមួយៗ៕