ជាតិ
នយោបាយជាតិ
លោក យឹម ស៊ីណន ត្រូវបានដោះលែងឱ្យនៅក្រៅឃុំ
× លោក យឹម ស៊ីណន ត្រូវបានសាលាដំបូងរាជធានីភ្នំពេញ ដោះលែងឱ្យនៅក្រៅឃុំ នៅព្រលប់ថ្ងៃទី២៨ មីនានេះ បន្ទាប់ពីជាប់ឃុំឃាំង១សប្តាហ៍។ នេះបើយោងតាម ដីកាបង្គាប់របស់ លោក យី សុខវួច ចៅក្រមស៊ើបសួរសាលាដំបូងរាជធានីភ្នំពេញ ចុះថ្ងៃទី២៨ មីនា ឆ្នាំ២០២៣។
នៅមុនការសម្រេចរបស់តុលាការនេះ លោក យឹម ស៊ីណន ជាត្រូវគេស្គាល់ថាជាសកម្មជនស្និទ្ធនឹងលោក កឹម សុខា បានចេញវីដេអូ និងសរសេរលិខិតមួយ សូមព្រះរាជទានទោសពីព្រះមហាក្សត្រ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ពាក់ព័ន្ធនឹងការបង្ហោះសាររបស់ខ្លួន កាលពីថ្ងៃទី២១ មីនាកន្លងទៅ ពាក់ព័ន្ធនឹងព្រះមហាក្សត្រ។ លោក ក៏បានសូមទោសសម្តេចនាយករដ្ឋមន្ត្រី ហ៊ុន សែន ជុំវិញការបង្ហោះសាររបស់ខ្លួនដែរ។
សូមរំឭកថា លោក យឹម ស៊ីណន ត្រូវបានសមត្ថកិច្ចចាប់ខ្លួន នៅល្ងាចទី២១ មីនា ក្រោយបានបង្ហោះសារនៅលើគណនីហ្វេសប៊ុកខ្លួនដែលមានខ្លឹមសារញុះញង់ពាក់ព័ន្ធនឹងរូបភាពអង្គព្រះមហាក្សត្រ ដែលទ្រង់យាងព្រះរាជទានព្រះអគ្គិជ័យកីឡា សម្រាប់ព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ នាថ្ងៃទី២១ ខែមីនានេះ នៅប្រាសាទអង្គរវត្ត ខេត្តសៀមរាប។ សកម្មជនស្និទ្ធនឹងលោក កឹម សុខាម្នាក់ទៀត គឺលោក ហ៊ុន កុសល ក៏ត្រូវអាជ្ញាធរឃាត់ខ្លួនពាក់ព័ន្ធនឹងករណីដូចគ្នានេះដែរ៕
© រក្សាសិទ្ធិដោយ thmeythmey.com