អន្តរជាតិ
×![]()
ដោយ: ងួន សុភាវត្តី
ទីក្រុងមូស្គូ និងទីក្រុងមីនស្កិ៍នៅថ្ងៃទី២ ខែមេសា ប្រារព្ធទិវានៃការរួបរួម ដែលរំលឹកដល់ចំណងមិត្តភាពរបស់ភាគីទាំង២តាំងពីឆ្នាំ១៩៩៦ មក នៅពេលប្រធានាធិបតីបេឡារុស Alexander Lukashenko និងអតីតប្រធានាធិបតីរុស្ស៊ី Boris Yeltsin បានចុះហត្ថលេខាលើសន្ធិសញ្ញាដែលមានគោលបំណងបង្កើតរដ្ឋសហភាពនៃប្រទេសទាំង២។ 
រុស្សី និងបេឡារុស ទំនាក់ទំនងយ៉ាងជិតស្និទ្ធខ្លាំង ដ្បិតបេឡារុសធ្លាប់ជារដ្ឋមួយរបស់សហភាពសូវៀត។ បើទោះបីជា សហភាពសូវៀតបានដួលរលំហើយក្តី ប៉ុន្តែរុស្សី និងបេឡារុសពីរនៅឆ្នាំ១៩៩៦ បានចុះហត្ថលេខាលើសន្ធិសញ្ញាដែលមានគោលដៅចង់បង្កើតរដ្ឋសហភាពមួយ និងដើម្បីរក្សាចំណងមិត្តភាព។
កន្លងមក បេឡារុស ធ្លាប់ចាប់អារម្មណ៍បង្កើតទំនាក់ទំនងជាមួយប្រទេសលោកខាងលិច ប៉ុន្តែគោលបំណងនេះបានផ្លាស់ប្តូរនៅឆ្នាំ ២០២០ បន្ទាប់ពីទីក្រុងមូស្គូបានលូកដៃជួយរដ្ឋាភិបាលបេឡារុសក្នុងបាតុកម្មដ៏ធំកន្លងមក។ ប្រធានាធិបតីបេឡារុសលោក Alexander Lukashenko បានប្រឈមមុខនឹងការតវ៉ាដ៏ធំប្រឆាំងរដ្ឋាភិបាលរបស់លោក។ នៅពេលនោះ រុស្ស៊ីបានអះអាងថា ខ្លួនបានត្រៀមខ្លួនជាស្រេចក្នុងការបញ្ជូនទ័ពទៅគាំទ្ររដ្ឋាភិបាលលោក Alexander Lukashenko។
ក្នុងរយៈពេលមួយឆ្នាំចុងក្រោយនេះ ខណៈដែលរុស្ស៊ីវាយប្រហារអ៊ុយក្រែន បេឡារុសបានផ្ដល់ការគាំទ្រដល់រុស្ស៊ី ហើយថ្មីៗនេះបានយល់ព្រមឱ្យរុស្ស៊ីដាក់អាវុធនុយក្លេអ៊ែរយុទ្ធសាស្ត្ររបស់រុស្ស៊ីលើទឹកដីខ្លួន ដែលជាសញ្ញាបង្ហាញពីទំនាក់ទំនងកាន់តែរឹងមាំ។
ក្រោមសន្ធិសញ្ញាដែលមានគោលបំណងបង្កើតរដ្ឋសហភាពរវាងរុស្សី និងបេឡារុស ទោះបីជាមិនបានសម្រេចពេញលេញក៏ដោយ ភាគីទាំងពីរបានទទួលអត្ថប្រយោជន៍មួយចំនួនពីសន្ធិសញ្ញានេះ។ បាតុកម្មប្រឆាំងលោក Lukashenko និងការហុចដៃជួយពីរុស្ស៊ី បានធ្វើឱ្យសន្ធិសញ្ញានេះវិវត្តកាន់តែលឿន។
សន្ធិសញ្ញានេះ ក៏បានធ្វើឱ្យកិច្ចសហប្រតិបត្តិការយោធារវាងប្រទេសទាំងពីរកាន់តែស៊ីជម្រៅផងដែរ។ ក្នុងការឈ្លានពានអ៊ុយក្រែនរបស់រុស្ស៊ីកាលពីឆ្នាំមុន ទាហានរុស្ស៊ីរាប់ម៉ឺននាក់ត្រូវបានគេដាក់ពង្រាយនៅបេឡារុស ក្រោមរូបភាពបង្ហាញពីលំហាត់ហ្វឹកហ្វឺន។ សកម្មភាពនេះបានធ្វើឱ្យបេឡារុសបានរងទណ្ឌកម្មរបស់ប្រទេសលោកខាងលិចផងដែរ៕
Tag:
រុស្ស៊ី
បេឡារុស
© រក្សាសិទ្ធិដោយ thmeythmey.com
