ជាតិ
បន្ទាយមានជ័យ មានរមណីយដ្ឋាន១៣កន្លែង ដែលទាក់ទាញទេសចរជាង ៦លាននាក់ នា៥ឆ្នាំនេះ រូបភាពពី ហ្វេសប៊ុកលោកស្រី ម៉ៅ មាល័យ
×
ដោយ៖ គិត បុប្ផា
ភ្នំពេញ៖ បន្ទាយមានជ័យ ជាខេត្តស្ថិតនៅភាគពាយ័ព្យនៃប្រទេសកម្ពុជា។ ខេត្តដែលនៅជិតព្រំដែនថៃនេះ មានរមណីយដ្ឋានប្រវត្តិសាស្រ្ត វប្បធម៌ និងធម្មជាតិចំនួន ១៣កន្លែង និងទាក់ទាញភ្ញៀវទេសចរជាង ៦លាននាក់ ក្នុងរយៈពេល៥ឆ្នាំកន្លងមក។ នេះបើតាមការលើកឡើងរបស់លោក អ៊ុំ រាត្រី អភិបាលខេត្តបន្ទាយមានជ័យ។
ទោះឆ្ងាយពីរាជធានីភ្នំពេញ ខេត្តបន្ទាយមានជ័យ ក៏មានសក្ដានុពល និងទាក់ទាញទេសចរជាតិ-អន្តរជាតិផងដែរ។ ខេត្តបន្ទាយមានជ័យ ជាទីតាំងប្រវត្តិសាស្រ្ត និងវប្បធម៌ ដែលមានរមណីយដ្ឋានទេសចរណ៍ចំនួន ១៣កន្លែង ផ្ដល់ភាពរីករាយដល់ទេសចរ។
បើតាមលោក អ៊ុំ រាត្រី អភិបាលខេត្តបន្ទាយមានជ័យ ខេត្តនេះ មានសណ្ឋាគារចំនួន ២៨កន្លែង, ផ្ទះសំណាក់ចំនួន ៨៣កន្លែង, ផ្ទះស្នាក់ (Home Stay) ចំនួន ៦កន្លែង ដែលផ្ដល់សេវាជូនភ្ញៀវទេសចរ។ ជាមួយគ្នានេះ បន្ទាយមានជ័យ ក៏កន្លែងលក់អាហារឆ្ងាញ់ជាច្រើន រួមមាន ភោជនីយដ្ឋានចំនួន ៣០កន្លែង, អាហារដ្ឋានចំនួន ៧៨កន្លែង កំពុងបម្រើសេវាចំណីអាហារប្រកបដោយភាពកក់ក្ដៅ និងមានគុណភាពជូនដល់ភ្ញៀវជាតិ និងអន្តរជាតិ។
លោក អ៊ុំ រាត្រី អភិបាលខេត្តបន្ទាយមានជ័យ។ រូបភាពពីអង្គភាពអ្នកនាំពាក្យ
លោក អ៊ុំ រាត្រី បន្តថា ក្នុងរយៈពេល៥ឆ្នាំកន្លងមកនេះ រមណីយដ្ឋាន សណ្ឋាគារទាំងអស់នេះ បានទាក់ទាញភ្ញៀវទេសចរជាតិ និងអន្តរជាតិ មកទស្សនាខេត្តបន្ទាយមានជ័យចំនួន ៦ ០០៦ ០៧១នាក់ផងដែរ។ កំណើនភ្ញៀវទេសចរ បានផ្តល់ផលប្រយោជន៍ ដល់សហគមន៍មូលដ្ឋាន តាមរយៈការបង្កើតការងារដល់ប្រជាពលរដ្ឋ និងប្រាក់ចំណូលបន្ថែម៕
Tag:
ទេសចរណ៍
បន្ទាយមានជ័យ
© រក្សាសិទ្ធិដោយ thmeythmey.com