ឯកសារសម្ងាត់ដែលបែកធ្លាយ ត្រូវបានបង្ហាញជាលើកដំបូងដោយកាសែត The New York Time កាលពីថ្ងៃទី៧ ខែមេសា បន្ទាប់ពីត្រូវបានចែកចាយលើបណ្ដាញសង្គមជាច្រើនកាលពីខែមុនមកម្ល៉េះ។ ឯកសារបែកធ្លាយដែលសុទ្ធសឹងជាការវាយតម្លៃ និងព័ត៌មានចារកិច្ច ត្រូវចែកជាព័ត៌មានសម្ងាត់ និងសម្ងាត់បំផុត។ 

 

បើតាមទីភ្នាក់ងារព័ត៌មាន Reuters ក្នុងឯកសារមួយដែលកំណត់ជាព័ត៌មានសម្ងាត់ ប្រព័ន្ធស្ទាក់មីស៊ីលអ៊ុយក្រែន S-300 នឹងអស់សមត្ថភាពនៅត្រឹមថ្ងៃទី២ ខែឧសភា បើគិតលើការប្រើប្រាស់ដូចសព្វថ្ងៃ។ ឯឯកសារមួយទៀតដែលកំណត់ជាព័ត៌មានសម្ងាត់បំផុត ទីភ្នាក់ងារចារកិច្ចអ៊ីស្រាអែល Mossad បានជំរុញឱ្យមានការតវ៉ាប្រឆាំងការប៉ុនប៉ងរបស់នាយករដ្ឋមន្រ្តី បេនចាមីន ណេតាន់យ៉ាហ៊ូ លើការកែទម្រង់ប្រព័ន្ធយុត្តិធម៌។ 

 

ភាពពិតប្រាកដនៃឯកសារដែលត្រូវបានទម្លាយនេះ កំពុងត្រូវបានអាម៉េរិកស៊ើបអង្កេត។ ក្រសួងយុត្តិធម៌អាម៉េរិក បានបើកការស៊ើបអង្កេតជុំវិញបទល្មើសនៃការទម្លាយឯកសារទាំងនេះ។ អ្នកនាំពាក្យក្រសួងការពារជាតិអាម៉េរិក Sabrina Singh និយាយថា មន្ទីរបញ្ចកោណកំពុងវាយតម្លៃផលប៉ះពាល់របស់ឯកសារបែកធ្លាយ និងភាពត្រឹមត្រូវរបស់ឯកសារដែលមានព័ត៌មានសម្ងាត់ជាច្រើន។

 

«កិច្ចប្រឹងប្រែងអន្តរទីភ្នាក់ងារ កំពុងតែបង្កើនដោយផ្ដោតលើការវាយតម្លៃផលប៉ះពាល់នៃឯកសារដែលត្រូវបានថតចម្លងទាំងនេះដែលអាចមានលើសន្តិសុខជាតិអាម៉េរិក សម្ព័ន្ធមិត្ត និងដៃគូ។» អ្នកនាំពាក្យខាងលើបញ្ជាក់បែបនេះ។

 

មិនត្រឹមព័ត៌មានសម្ងាត់ខាងលើ ឯកសារដដែល ក៏បង្ហាញដែរថា​ អាម៉េរិកលួចស្ដាប់ការជជែករបស់សម្ព័ន្ធមិត្តខ្លួនថែមទៀតដោយក្នុងនោះមានឈ្មោះកូរ៉េខាងត្បូងតែម្ដង។ បើតាម New York Times អ្វីដែលអាម៉េរិកលួចស្ដាប់ គឺការពិភាក្សាក្នុងចំណោមមន្រ្តីទីក្រុងសេអ៊ូលលើការផ្ដល់អាវុធឱ្យអ៊ុយក្រែន។ 

 

រដ្ឋាភិបាលសេអ៊ូល ក៏កំពុងពិនិត្យមើលរបាយការណ៍ខាងលើ ហើយនឹងជជែកជាមួយអាម៉េរិកបន្ថែមទៀត។ បក្សប្រជាធិបតេយ្យ ដែលជាបក្សប្រឆាំងធំជាងគេ ទាមទារឱ្យរដ្ឋាភិបាលកូរ៉េខាងត្បូងបញ្ជាក់ពីអ្វីដែលបែកធ្លាយ ហើយក៏ចាត់ទុកការលួចស្ដាប់សម្ព័ន្ធមិត្តខ្លួនជារឿងមិនអាចទទួលបានទៀតផង៕