ជំនួបរវាងលោកស្រី Tsai Ing-wen ប្រធានាធិបតីចិន និងលោក Kevin McCarthy ប្រធានសភាតំណាងអាម៉េរិក នៅក្នុងដីអាម៉េរិក បានធ្វើឱ្យចិនខឹងសម្បាយ៉ាងខ្លាំង។ ក្រោយជំនួបនេះ ចិន បានធ្វើសមយុទ្ធយោធា ក៏ដូចជាបញ្ជូននាវាចម្បាំង និងនាវាដឹកយន្តហោះចម្បាំងល្បាតនៅច្រកសមុទ្រតៃវ៉ាន់ថែមទៀត ដើម្បីបង្ហាញសាច់ដុំ ក៏ដូចជាគំរាមកម្លាំងគាំទ្រឯករាជ្យតៃវ៉ាន់។ 

 

«ការគំរាមកំហែងដ៏ខ្លាំងចំពោះសន្តិភាពលើច្រកសមុទ្រ គឺកម្លាំងគាំទ្រឯករាជ្យតៃវ៉ាន់, សកម្មភាពខុសច្បាប់របស់បរទេស និងការគាំទ្ររបស់ពួកគេចំពោះកម្លាំងតៃវ៉ាន់»។ លោក Wang បានបញ្ជាក់បែបនេះទៅកាន់សំណួររបស់អ្នកសារព័ត៌មាន ដែលបានសួរពាក់ព័ន្ធនឹងសមយុទ្ធយោធានៅថ្ងៃទី១០ ខែមេសា។ 

 

ទន្ទឹមនេះ មន្រ្តីក្រសួងការបរទេសចិនរូបនេះ បានបន្ថែមថា ការប្រកាសឯករាជ្យរបស់តៃវ៉ាន់ និងសន្តិភាពនៅច្រកសមុទ្រតៃវ៉ាន់ រួមទាំងស្ថិរភាព គឺមិនអាចលាយជាមួយគ្នាបានឡើយ ដោយសារវាប្រៀបដូចជាទឹក និងភ្លើង។ 

 

កន្លងមក ចិន បានប្តេជ្ញាបង្រួបបង្រួមដែនដីទាំងពីរ ប្រកបដោយសន្តិភាព។ យ៉ាងណាមិញ រដ្ឋាភិបាលក្រុងប៉េកាំង ក៏មិនភ្លេចព្រមានពីការចាត់វិធានការឱ្យបានរឹតរ៉ឹងបំផុត ក្នុងករណីក្រុងតៃប៉ិ ហ៊ានប្រកាសឯករាជ្យពីខ្លួន។ បើទោះតៃវ៉ាន់មានរដ្ឋាភិបាលផ្ទាល់ខ្លួនក្តី ប៉ុន្តែចិនតែងតែចាត់ទុកដែនកោះមួយនេះ ជាផ្នែកមួយរបស់ខ្លួន។ 

 

ក្នុងសន្និសីទសារព័ត៌មានដដែល លោក Wang ក៏បានការពារពីសកម្មភាពយោធាចិននៅជុំវិញតៃវ៉ាន់ផងដែរ ដោយអះអាងថា វាជាការព្រមានចំពោះសកម្មភាពបង្ករឿងពីសំណាក់កម្លាំងគាំទ្រឯករាជ្យតៃវ៉ាន់ និងការចូលដៃជើងពីសំណាក់បរទេស។ 

 

ត្រង់ចំណុចនេះ អ្នកនាំពាក្យក្រសួងការបរទេសចិន គឺចង់សំដៅទៅអាម៉េរិក ដែលតែងមានទំនាក់ទំនងជាមួយតៃវ៉ាន់ និងលក់អាវុធឱ្យដែនកោះមួយនេះ ក្រោមហេតុផលការពារប្រជាធិបតេយ្យ និងច្បាប់ទំនាក់ទំនងតៃវ៉ាន់ឆ្នាំ១៩៧៩។ 

 

សមយុទ្ធចិននៅជុំវិញតៃវ៉ាន់ «Joint Sword» បានបិទបញ្ចប់ហើយនៅថ្ងៃទី១០ ខែមេសា ក្រោយធ្វើឡើងរយៈពេល បីថ្ងៃ ដោយផ្តើមឡើងនៅថ្ងៃទី៨ ខែមេសា។ មិនខុសពីអ្នកនាំពាក្យក្រសួងការបរទេសចិនឡើយ លោក Shi Yi អ្នកនាំពាក្យបញ្ជាការដ្ឋានភូមិភាគខាងកើត បានបញ្ជាក់ថា សមយុទ្ធយោធាចិន ជាការព្រមានចំពោះសកម្មភាពការចូលដៃគ្នារវាងកម្លាំងគាំទ្រឯករាជ្យតៃវ៉ាន់ និងកម្លាំងបរទេស រួមទាំងប្រឆាំងនឹងសកម្មភាពបង្ករឿង។ បើតាមអ្នកនាំពាក្យរូបនេះ សមយុទ្ធរបស់ចិន បានទទួលជោគជ័យលើគ្រប់ផែនការទាំងអស់៕