ជាតិ
សេដ្ឋកិច្ច
ព្រលានយន្តហោះសៀមរាប-អង្គរ តម្លៃជិត៩០០លានដុល្លារ នឹងបើកដំណើរការសាកល្បងនៅខែមិថុនា
× អាកាសយានដ្ឋានអន្តរជាតិសៀមរាប-អង្គរថ្មី នឹងត្រូវដាក់ឱ្យដំណើរការសាងល្បងនាអំឡុងខែមិថុនា ហើយប្រកាសដំណើរការជាផ្លូវការ នៅថ្ងៃទី២៣តុលា ឆ្នាំ២០២៣។ ព្រលានយន្តហោះថ្មីតម្លៃជិត៩០០លានដុល្លារដែលជាការវិនិយោគរបស់ក្រុមហ៊ុនAngkor International Airport Investment(AIAI) នេះ គឺមានសមត្ថភាពមានផ្ទុកដំណើរបាន៧លាននាក់ក្នុងមួយឆ្នាំ។
អាកាសយានដ្ឋានអន្តរជាតិសៀមរាប-អង្គរថ្មី ត្រូវបានសាងសង់រួចរាល់នៅក្នុងខែមីនា ហើយបច្ចុប្បន្នក្រុមការងារកំពុងរៀបចំប្រតិបត្តិការនិងត្រៀមដាក់ដំណើរការសាកល្បងនៅក្នុងខែមិថុនា។ ក្នុងពិធីសម្ពោធជើងហោះហើរត្រង់រវាងទីក្រុងហ្សាកាតានិងរាជធានីភ្នំពេញរបស់ក្រុមហ៊ុនអាកាសចរណ៍ Air Asia នៅស្ថានទូតឥណ្ឌូណេស៊ីប្រចាំកម្ពុជានាថ្ងៃទី១០មេសា លោក ថោង រដ្ឋសក្តិ រដ្ឋលេខាធិការនៃក្រសួងទេសចរណ៍ បានបញ្ជាក់ថា អាកាសយានដ្ឋានអន្តរជាតិសៀមរាប-អង្គរថ្មី នឹងសម្ពោធដាក់ឱ្យដំណើរការជាផ្លូវការនៅថ្ងៃទី២៣ ខែតុលា ឆ្នាំ២០២៣។
លោកបន្តនិយាយដូច្នេះ៖ « អាកាសយានដ្ឋានថ្មីនេះ គឺជាអាកាសយានដ្ឋានអន្តរជាតិលំដាប់4E ដែលមានលេខកូដ ICAO VDSA និង IATA Code name SAI។ អាកាសយានដ្ឋានថ្មីនេះ មានសមត្ថភាពផ្ទុកអ្នកដំណើរបានរហូតដល់ ៧លាននាក់ក្នុងមួយឆ្នាំ ហើយឈានដល់ ១០លាននាក់ក្នុងឆ្នាំ២០២៤»។
អាកាសយានដ្ឋានអន្តរជាតិលំដាប់4Eនេះ មានផ្លូវបត់រត់ប្រវែង៣ ៦០០ម៉ែត្រ និងមានសមត្ថភាពឱ្យយន្តហោះគ្រប់ប្រភេទចុះចតបាន ដោយបំពាក់បច្ចេកវិទ្យាថ្មីបំផុតសម្រាប់សុវត្ថិភាពនិងសន្តិសុខដល់អ្នកដំណើរ។ អាកាសយានដ្ឋានមានចំណតយន្តហោះរហូតដល់ទៅ៣៨។
សូមជម្រាបថា អាកាសយានដ្ឋានអន្តរជាតិសៀមរាបនេះ គឺមានផ្ទៃដី១ ៧០០ហិកតា ស្ថិតនៅក្នុងឃុំតាយ៉ែក ស្រុកសូទ្រនិគម ខេត្តសៀមរាប ដោយប្រើរយៈពេល៣៦ខែដើម្បីសាងសង់ឡើង ពោលគឺចាប់ពីថ្ងៃទី១៥ មីនា ឆ្នាំ២០២០មក។ ដោយឡែក នៅក្នុងឆ្នាំ២០២៤ កម្ពុជាគ្រោងបញ្ចប់ការសាងសង់អាកាសយានដ្ឋានអន្តរជាតិចំនួន២កន្លែងទៀត។ ក្នុងនោះ មានអាកាសយានយន្តអន្តរជាតិភ្នំពេញតេជោក្រោមទុនវិនិយោគប្រមាណ១ ៥០០លានដុល្លារ ពីក្រុមហ៊ុនក្រុមហ៊ុនសាជីវកម្មវិនិយោគក្រៅប្រទេសកម្ពុជា (OCIC) និងអាកាសយានដ្ឋានអន្តរជាតិ តារា សាគរ អង្គរ ក្នុងខេត្តកោះកុង ដែលត្រូវបានអភិវឌ្ឍដោយក្រុមហ៊ុនចិន Tianjin Union Development Group(UDG) ជាមួយទុនវិនិយោគ ៣៥០លានដុល្លារ។
ក្រៅពីព្រលានយន្តហោះអន្តរជាតិខាងលើនេះ កម្ពុជាក៏មានគ្រោងអភិវឌ្ឍលើព្រលានយន្តហោះក្នុងស្រុកផ្សេងៗទៀត។ ដូចជា៖ ព្រលានយន្តហោះនៅក្នុងខេត្តកោះកុង ខេត្តបាត់ដំបង ខេត្តបន្ទាយមានជ័យ និង ខេត្តមណ្ឌលគិរី ជាដើម៕
Tag:
សៀមរាប
អាកាសយានដ្ឋានអន្តរជាតិ
© រក្សាសិទ្ធិដោយ thmeythmey.com